លោកបណ្ឌិត តាំង ណាំស៊ុ្រន៖ ដើម្បីជោគជ័យក្នុងជីវិត មនុស្សត្រូវការថ្នាំទិព្វ៣យ៉ាង
លោកបណ្ឌិតតាំង ណាំស៊ុ្រន អគ្គនាយកក្រុមហ៊ុនហង្សនាគបានលើកឡើងថា ដើម្បីជោគជ័យក្នុងជីវិត មនុស្សត្រូវការថ្នាំទិព្វ៣យ៉ាង។ ប្រសាសន៍របស់លោកបណ្ឌិត គឺធ្វើឡើងនៅក្នុងសិក្ខាសាលាចិត្តសាស្ត្រទំនាក់ទំនង កាលពីថ្ងៃអាទិត្យម្សិលមិញ នៅCKCC។ តើថ្នាំទិព្វ ដែលអ្នកបណ្ឌិតនិយាយនោះគឺអ្វីខ្លះទៅ? ថ្នាំពេទ្យទី១គឺការយកឈ្នះចិត្តខ្លួនឯងជាមុនសិន។
មនុស្សជាច្រើនខ្លាចនេះខ្លាចនោះឬគិតថាខ្លួនឯងពុំអាចធ្វើអ្វីមួយបាន។ ប្រសិនអ្នកនៅតែមានផ្នត់គំនិតបែបនេះ កុំនិយាយភាពជោគជ័យ អ្នកប្រហែលជាគ្មានសូម្បីតែការចាប់ផ្តើម។ ដូច្នេះហើយ ជាដំបូង អ្នកត្រូវផ្លាស់ប្តូរការគិតជាមុនសិន អ្នកត្រូវជឿជាក់លើខ្លួនឯងថាអ្នកអាចធ្វើបាន នោះទើបអ្នកមានកម្លាំងក្នុងការចាប់ផ្តើម ហើយការចាប់ផ្តើមនេះឯងដែលនាំអ្នកទៅរកភាពជោគជ័យបាន។ ថ្នាំពេទ្យទី២គឺត្រូវខិតខំប្រឹងប្រែងជានិច្ច មិនត្រូវបោះបង់នោះទេ។ ក្រោយអ្នកចាប់ផ្តើមហើយ អ្នកត្រូវខិតខំប្រឹងប្រែងបើទោះបីជាអ្នកជួបឧបសគ្គលំបាកក្តី កុំឆាប់ចុះចាញ់នឹងបញ្ហាពេក។ សុភាសិតមួយក៏បានលើកឡើងថា៖ «ដំណើររាប់ពាន់គីឡូចាប់ផ្តើមពីជំហានទី១ ហើយអ្នកនឹងមិនអាចសម្រេចដំណើររាប់ពាន់គីឡូប្រសិនជាអ្នកដើរមួយជំហានហើយបោះបង់។ ដូចគ្នានេះដែរ មិនថាអ្នកធ្វើអ្វីនោះទេ អ្នកត្រូវបន្តខិតខំ ដើរទៅមុខជានិច្ចហើយមិនបោះបង់ ថ្ងៃណាមួយអ្នកពិតជាជោគជ័យជាពុំខាន។
ថ្នាំពេទ្យទី៣គឺអ្នកត្រូវរាប់អានមនុស្សសក្ដានុពលឲ្យបានច្រើន។ លោកបណ្ឌិតបានពន្យល់ថាការស្គាល់មនុស្សកាន់តែច្រើន អ្នកកាន់តែមានឱកាសកាន់តែច្រើន។ ក្នុងវិស័យជំនួញ វាពិតជាលំបាកប្រសិនជាអ្នកដើរតែម្នាក់ឯង ពោលគឺអ្នកពិតជាត្រូវការសហការពីក្រុមហ៊ុនដទៃឬការណែនាំឬការផ្លាស់ប្តូរបទពិសោធន៍គ្នាទៅវិញទៅមក។ អ៊ីចឹងហើយ អ្នកគួរតែរាប់អានមនុស្សឲ្យបានច្រើនដើម្បីជាផលប្រយោជន៍នាថ្ងៃអនាគត៕
ដោយ៖ អុឹង មុយយូ
