សុភាសិតជប៉ុន៖ «កង្កែបនៅក្នុងអណ្ដូងមិនអាចដឹងថា សមុទ្រធំប៉ុណ្ណាទេ»
«កង្កែបនៅក្នុងអណ្ដូងមិនអាចដឹងថា សមុទ្រធំប៉ុណ្ណាទេ»។ នេះជាសុភាសិតជនជាតិជប៉ុន ដែលជាជាតិសាសន៍មួយ ពូកែក្នុងការធ្វើការងារ និង មានចិត្តតស៊ូខ្ពស់។ ក្នុងន័យនេះ ចង់បញ្ជាក់ថា មនុស្សភាគច្រើនតែងវាយតម្លៃ ឬ វិនិច្ឆ័យអ្វីមួយ ដោយផ្អែកលើចំណេះដឹង ឬ បទពិសោធន៍ដែលខ្លួនមានប៉ុណ្ណោះ។
មនុស្សជាច្រើន តែងគិតថា ខ្លួនអស្ចារ្យ និងខ្លាំងគ្មាននរណាប្រៀបបាន ព្រោះពួកគេមិនដែលបានដឹងថា ពិភពលោកនេះធំប៉ុណ្ណា ហើយសម្បូរអ្នកពូកែជាងខ្លួនច្រើនប៉ុណ្ណាទេ អ៊ីចឹងហើយ រាល់ឃ្លាឃ្លោងដែលនិយាយចេញទៅហាក់ដូចជា បញ្ជាក់ថា ខ្លួនដឹងគ្រប់សព្វទាំងអស់ គ្មានចន្លោះត្រង់ណា។ ក្នុងនាមជាមនុស្ស សូមកុំមានអំនួតចំពោះខ្លួនឯងខ្លាំងពេក ព្រោះអំនួតជ្រុលនេះ មិនដែលចំណេញអ្វីឡើយ តែវាតែងនាំមកនូវបញ្ហាជាច្រើនដល់អ្នកទៅវិញ។
ដូច្នេះហើយ គួរបើកចិត្តឲ្យទូលាយដើម្បីស្ដាប់អ្នកដទៃ ជាជាងប្រឹងនិយាយតែម្នាក់ឯង ហើយប្រឹងរៀនសូត្របន្ថែមទៀត ព្រោះមានរឿងច្រើនណាស់ដែលយើងមិនបានដឹង អ៊ីចឹងហើយបើចេះតែ យកចំណេះដឹងក្នុងអណ្ដូងរបស់យើងមកវាយតម្លៃគឺមិនត្រូវនោះឡើយ៕
