សេដ្ឋីវ័យក្មេងអាយុជាង២០ លោក Brain Wong ប្រាប់ពីគន្លឹះរកឲ្យឃើញពីអំណាចដ៏អស្ចារ្យក្នុងខ្លួនយើង
មានសហគ្រិនជាច្រើនរូប កំពុងតែរះឡើង និង ជោគជ័យជាបន្តបន្ទាប់នៅលើពិភពលោក ដែលនេះបង្ហាញថាអ្វីៗដែលអ្នកប្រាថ្នាចង់បានដោយចេញពីចិត្តស្រឡាញ់ពិតប្រាកដ ស្ថិតនៅក្នុងដែនកំណត់របស់អ្នក។ តួយ៉ាងក៏មានសហគ្រិនវ័យ២៦ឆ្នាំមួយរូប ដែលបានក្លាយជាម្ចាស់គ្រប់គ្រងក្រុមហ៊ុនដែលរកបានចំណូល២០លានដុល្លារសម្រាប់ឆ្នាំ២០១៧ ដែលជាក្រុមហ៊ុនផ្សព្វផ្សាយតាមទូរស័ព្ទដៃមួយ ដែលមានឈ្មោះថា Kiip។
សហគ្រិនវ័យក្មេងរូបនេះគឺចង់សំដៅលើលោក Brain Wong ដែលជាCEOនិងជាសហស្ថាបនិករបស់ Kiip នេះឯង។ លោក បានបញ្ជាក់ថា ការរកឲ្យឃើញនូវអំណាចដ៏អស្ចារ្យក្នុងខ្លួនរបស់យើង គឺពិតជាសំខាន់ ក្នុងដំណើរឆ្ពោះទីទៅរកភាពជោគជ័យ។
លោក Brain Wong គឺជាឧទាហរណ៍មួយដែលបានបង្ហាញថាអាយុគ្រាន់តែជាតួលេខ ហើយភាពជោគជ័យស្ថិតនៅក្នុងដែនកំណត់របស់អ្នកប៉ុណ្ណោះ ។ អាយុត្រឹម១៩ឆ្នាំ គាត់បានបង្កើតក្រុមហ៊ុន Kiip មួយនេះឡើង ហើយត្រឹមតែ១ឆ្នាំកន្លងផុតទៅ សហគ្រិនជនជាតិកាណាដារូបនេះក៏បានក្លាយជាម្ចាស់គ្រប់គ្រងទៅលើទ្រព្យសម្បត្តិចំនួន១លានដុល្លារនៅអាយុត្រឹមតែ២០ឆ្នាំប៉ុណ្ណោះ។ តើអ្វីទៅគឺជាគ្រឿងផ្សំដ៏សំខាន់ដែលនាំលោកទៅរកភាពជោគជ័យដ៏អស្ចារ្យមិននឹកស្មានដល់បែបនេះ ?
នៅក្នុងការសម្ភាសមួយរបស់ CNBC គាត់បានផ្ដល់នូវចម្លើយដ៏សាមញ្ញបំផុតមួយ ដែលជាគ្រឿងផ្សំនាំលោកទៅសម្រេចភាពជោគជ័យ ដែលនោះគឺជាការស្គាល់ថាថាមពលដ៏អស្ចារ្យរបស់ខ្លួនអ្នកគឺជាអ្វីនេះឯង។ ថាមពលដ៏អស្ចារ្យនៅទីនេះគឺចង់សំដៅទៅលើអ្វីដែលអ្នកធ្វើបានល្អជាងអ្នកដទៃ ហើយគ្រប់គ្នាសុទ្ធតែមាននូវថាមពលដ៏អស្ចារ្យទាំងនេះរៀងៗខ្លួន ដូច្នេះអ្នកត្រូវស្វែងរកថាមពលអស្ចារ្យរបស់អ្នកឲ្យឃើញ និងយកវាមកប្រើប្រាស់ដើម្បីសម្រេចភាពជោគជ័យដែលអ្នកចង់បាន។
បើអ្នកមិនយកវាមកប្រើប្រាស់ទេ នោះអ្នកគឺជាមនុស្សឆ្កួតហើយ។ បើគោលដៅរបស់អ្នកគឺជាអ្វីដែលអ្នកពិតជាចង់បានមែន ដូច្នេះកុំអល់អែកនឹងការបញ្ចេញសកម្មភាពធ្វើវា ហើយក៏មិនចាំបាច់ខ្វល់ខ្វាយពីអ្នកដទៃគេគិតយ៉ាងណាឬនិយាយយ៉ាងណានោះដែរ។ បើអ្នកខ្វះខាតដើមទុន ត្រូវរកដើមទុនដោយខ្លួនឯង គឺថាត្រូវធ្វើយ៉ាងណាឲ្យតែអាចបង្កើតក្រុមហ៊ុនរបស់អ្នកបាន។
បើអ្នកចង់បង្កើតអ្វីមួយ ត្រូវបង្កើតវាឡើងជាមួយនឹងជំនាញដែលអ្នកមាន ឬសំដៅលើថាមពលអស្ចារ្យរបស់អ្នកនេះឯង ហើយបើអ្នកមិនចេះអ្វី ត្រូវរៀនសូត្របន្ថែមអំពីអ្វីដែលអ្នកខ្វះខាតនោះ។ អ្នកត្រូវចេះបង្កើតសំណាងឲ្យខ្លួនឯង ពុំមែនចាំសំណាងធ្លាក់ពីលើមេឃ ឬដេកចាំថាមាននរណាម្នាក់ពីស្ថានសួគ៌មកប្រស់អ្នកឲ្យក្លាយជាមហាសេដ្ឋីរាប់ពាន់លាននោះដែរ៕
ដោយ៖ ស្រីពៅ
