ជាមួយ​ឈីប​អង្គ​ប្រតិបត្តិ​ថ្មី Ryzen នេះ​ជា​សមិទ្ធផល​របស់​ក្រុមហ៊ុន AMD ដែល​ត្រូវ​បាន​ផលិត សម្រាប់​ប្រកួតប្រជែង​នឹង​ឈីប CPU របស់ Intel។ ប៉ុន្តែ​ប្រិយមិត្ត​ដែល​ប្រញាប់​ចង់​ទទួល​យក​បទពិសោធន៍​ថ្មី​ដំបូង​គេ​ពី​ឈីប AMD Ryzen នេះ អាច​មាន​ការ​ខក​ចិត្ត​ប្រសិន​ទិញ​ពី​គេហទំព័រ Amazon។ យ៉ាង​ហោច អតិថិជន ២នាក់ ទើប​ទិញ​ឈីប Ryzen 1700 ពី​គេហទំព័រ Amazon ប៉ះ​ចំ​ផលិតផល​ក្លែងក្លាយ ពោល​វា​ត្រឹម​ជា​ឈីប Celeron ​ដែល​មើល​ទៅ​ពិត​ជា​ស្រដៀង​ខ្លាំង​នឹង​ផលិតផល AMD។

ថ្មីៗ​នេះ អ្នក​បញ្ចេញ​មតិ​លើ​គេហទំព័រ​ពិភាក្សា Reddit ឈ្មោះ sh00ter999 បាន​បង្ហោះ​រូបថត​ប៉ុន្មាន​សន្លឹក ដែល​គេ​សន្និដ្ឋាន​ថា ជា​ឈីប​ថ្មី Ryzen 1700 របស់​គាត់ … ប៉ុន្តែ​វា​មិន​មែន​នោះ​ឡើយ។ វា​គ្រាន់តែ​ជា​ឈីប​អង្គ​ប្រតិបត្តិ LGA-based Intel Processors ​ដែល​មាន​សញ្ញា​សម្គាល់​បក​បិទ​ទៅ​ជា Ryzen ទៅ​វិញ ទើប​ធ្វើ​ឱ្យ​មាន​ការ​មើល​មិន​ដឹង ច្រឡំ​ទៅ​នឹង​ឈីប​ថ្មី​របស់ AMD នេះ។

CPU នេះ​មិន​ត្រឹមតែ ធ្វើ​ឱ្យ​គេ​ភាន់ច្រឡំ​ទៅ​លើ​ដុំ​ចម្លង​កម្ដៅ heatsink ប៉ុណ្ណោះ​ទេ តែ​សូម្បី​តែ​ការ​វេច​ខ្ចប់​ក៏​ស្រដៀង​គ្នា​ដែរ។ នៅ​ថ្ងៃ​ទី១៥ ខែ​កក្កដា​នេះ មាន User មួយ​ឈ្មោះ Yae-Ko ជា​អ្នក​រងគ្រោះ ទិញ​ប៉ះ​ចំ​ឈីប Ryzen ក្លែងក្លាយ​នេះ ពោល​គឺ​មិន​ត្រូវ​តាម CPU SKU នោះ​ឡើយ។ ទាំង​ទំហំ និង​ទម្ងន់ គឺ​ពិត​ជា​ប្រហាក់ប្រហែល​នឹង​ឈីប​ពិត​ប្រាកដ​អីចឹង ហើយ​ក៏​មាន​ការ​បិទ​រូប​ស្ទីកកឺ ដែល​អាច​បន្លំ​ភ្នែក សូម្បី​តែ​បុគ្គលិក​របស់ Amazon ធ្វើ​ឱ្យ​មើល​ច្រឡំ​របស់​ពិត​ផង​ដែរ។ ក្រុមហ៊ុន Amazon ទំនង​ប្រញាប់​ទទួល​ខុស​ត្រូវ ដោយ​ធ្វើ​ការ​ផ្លាស់ប្ដូរ​ជា​របស់​ពិត ដឹក​ជញ្ជូន​ឱ្យ​អតិថិជន​យ៉ាង​ឆាប់​រហ័ស និង​ភ្ជាប់​ជាមួយ​កាត​អំណោយ (gift card) ដើម្បី​ជា​ការ​លួង​ចិត្ត​ដល់​អតិថិជន​ខ្លួន។ វា​នឹង​ក្លាយ​ជា​មេរៀន​ធំ​មួយ សម្រាប់​ក្រុមហ៊ុន​ Amazon ដោយ​ត្រូវ ត្រួត​ពិនិត្យ​ឱ្យ​បាន​ម៉ត់ចត់​លើ​រាល់​ផលិតផល​ដាក់​លក់​តាម​គេហទំព័រ​ខ្លួន៕ ​ប្រែ​សម្រួល៖ រឹទ្ធិរាជ ប្រភព៖  techspot