ចំណុចដែលអ្នកគួរពិចារណាស្វែងយល់អំពីខ្លួនឯង នៅមុនរាល់ការសម្រេចចិត្តរៀនភាសាបរទេសនិងចំណេះដឹងផ្សេងទៀត
ក្រៅពីភាសាជាតិកំណើតរបស់ខ្លួនឯងម្នាក់ៗហើយ អ្នកណាក៏ចង់ចេះភាសាដទៃទៀតដែរ។ ហេតុអ្វី ? បើទោះជាមនុស្សម្នាក់ៗមានគោលដៅផ្សេងៗគ្នាសម្រាប់ការរៀនភាសាបរទេស ទោះជាយ៉ាងណាក៏ដោយហេតុផលមួយដែលមនុស្សគ្រប់គ្នាមាននោះគឺការចេះភាសាច្រើនធ្វើឲ្យបុគ្គលម្នាក់នោះមានភាពកក់ក្ដៅនិងសុវត្ថិភាព។ កក់ក្ដៅមិនមែនមានន័យតូចចង្អៀតសំដៅត្រឹមតែដំណើរកម្សាន្តក្រៅប្រទេសនោះឡើយ ប៉ុន្តែសមត្ថភាពដែលបុគ្គលនោះអាចប្រើប្រាស់សម្រាប់អាន និយាយ និងយល់ពីភាសាដទៃ បានបើកឱកាសសម្រាប់ពួកគេឲ្យមើលឃើញពិភពលោកកាន់តែទូលំទូលាយជាងមុន និងពង្រីកដែនកំណត់របស់ពួកគេក្នុងការទទួលបានឱកាសល្អៗពីអ្វីៗនៅជុំវិញខ្លួនដែរ។
ហេតុនេះ ចំណុចសំខាន់បំផុតដែលអ្នកគួរគិតពិចារណា មុនពេលពុះកញ្ជ្រោលចិត្តចង់បង្កើនចំណេះដឹងលើភាសាដទៃ អ្នកគួរស្វែងរកគោលដៅជាក់ច្បាស់មកទប់ខ្លួនឯងជាមុនសិន។ ហេតុអ្វីត្រូវរកមូលហេតុជាក់លាក់មកទប់ខ្លួនឯង ? ទប់ខ្លួនឯងឲ្យជាប់ពីការអូសទាញនៃអារម្មណ៍ទាំងឡាយដែលដឹកនាំអ្នកទៅរកការបោះបង់ហើយបរាជ័យអស់មួយជីវិតនេះឯង។ នៅពេលអ្នកចាប់ផ្ដើមឈានជើងចេញពីតំបន់សុវត្ថិភាពដែលអ្នកធ្លាប់តែស្រណុកសុខស្រួលពីទម្លាប់ដដែលៗ ឬសកម្មភាពដដែលៗ អ្នកនឹងជួបប្រទះនូវបញ្ហាឧបសគ្គជាច្រើនរាប់មិនអស់។ ហើយត្រូវចងចាំថាមិនមែនមានតែអ្នកនោះទេដែលលំបាក ព្រោះអ្នកណាក៏លំបាកដែរ។ ភាពជោគជ័យគឺជារបស់មានតម្លៃ របស់មានតម្លៃមិនធ្លាក់ទៅលើដៃមនុស្សខ្ជិលនិងគ្មានការអត់ធ្មត់នោះឡើយ។ យ៉ាងណាមិញ បើអ្នកមានមូលហេតុច្បាស់លាស់មកដាស់តឿនខ្លួនឯងរាល់ពេលជួបការលំបាក នោះអ្នកនឹងគ្មានថ្ងៃបោះបង់នោះឡើយ ឬសូម្បីតែគិតក៏មិនធ្លាប់គិតដល់ដែរ បើទោះជាធ្លាប់គិត តែមូលហេតុរបស់អ្នកនឹងផ្ដល់ជាសំឡេងបញ្ចេញពីខាងក្នុងមកប្រាប់អ្នកជានិច្ច ក៏ព្រោះតែវាជាអ្វីដែលអ្នកចង់បានពិតប្រាកដ។ ប៉ុន្តែ បើដូចខ្លែងដាច់ខ្សែ នោះវានឹងហោះហើរលើអាកាសមិនបានយូរនោះឡើយ គង់តែធ្លាក់មកលើដីវិញមិនខាន។ នៅពេលអ្នកស្វែងរកគោលដៅសម្រាប់ទប់ខ្លួនឯងឲ្យជាប់ហើយ។
អ្នកគួរស្វែងយល់អំពីខ្លួនឯងថាតើការរៀនសូត្រតាមរបៀបណា ទើបអ្នកឆាប់ចាប់បានបំផុត ? វិធីសាស្ត្រណាដែលមានប្រសិទ្ធភាពបំផុតសម្រាប់ខួរក្បាលអ្នក ? ព្រោះមនុស្សម្នាក់ៗមិនមែនរៀនសូត្រចេះតាមរបៀបដូចៗគ្នានោះឡើយ។ ទៅអង្គុយរៀនស្ដាប់គ្រូយកចិត្តទុកដាក់នៅសាលាប៉ុណ្ណាក៏ដោយ បើអ្នកមិនស្គាល់ខ្លួនឯងថាវិធីសាស្ត្រមួយនេះល្អសម្រាប់អ្នកឬអត់ នោះវានឹងខ្ជះខ្ជាយពេលវេលា ប្រាក់កាស និងកម្លាំងកាយចិត្តអ្នកទៅវិញនោះទេ។ មានអ្នកខ្លះរៀនចេះដោយកម្លាំងជំរុញពីខាងក្នុងខ្លួនពួកគេ ឬមានខ្លួនឯងជាអ្នកដឹកនាំខ្លួនឯង គឺជាកម្លាំងជំរុញដែលចង់ចេះចង់ដឹងដែលរុញច្រានពួកគេឲ្យពោរពេញដោយថាមពលក្នុងការបង្កើនការចេះដឹងរបស់ខ្លួន ដើម្បីចៀសឆ្ងាយពីភាពអវិជ្ជានិងល្ងង់ខ្លៅ។ ប៉ុន្តែក៏មានអ្នកខ្លះទៀតត្រូវការការដឹកនាំពីគ្រូនិងមិត្តភ័ក្ដិ ដើម្បីអាចរៀនសូត្រចេះដឹងបាន។ នេះបញ្ជាក់ថាវិធីសាស្ត្រតែម្យ៉ាងពុំអាចប្រើការបានចំពោះគ្រប់មនុស្សទាំងអស់នោះឡើយ។ វាអាស្រ័យលើអ្នកជាអ្នកស្វែងយល់ខ្លួនឯង ព្រោះមានតែអ្នកខ្លួនឯងទេដែលស្គាល់ខ្លួនឯងច្បាស់ជាងនរណាៗទាំងអស់។ ជំហានបន្ទាប់បន្សំមកគឺស្ថិតនៅលើអ្នកខ្លួនឯង ជាអ្នកអនុវត្ត ស្រាវជ្រាវបន្ថែម ហ្វឹកហាត់បន្ថែម និងប្ដេជ្ញាសម្រេចទៅឲ្យដល់គោលដៅ ដោយពុំមែនគ្រាន់តែអង្គុយគិតបានតែគំនិតល្អ ហើយមិនធ្វើនោះឡើយ។ ម្យ៉ាងទៀតចំណុចសំខាន់ទាំងនេះក៏មិនមែនប្រើការសម្រាប់តែការរៀនភាសាបរទេសនោះឡើយ ប៉ុន្តែវាគឺជាអ្វីដែលអ្នកគួរគិតនៅមុនការសម្រេចចិត្តរៀនសូត្រគ្រប់អ្វីៗក៏ដោយ៕
ដោយ៖ ស្រីពៅ
