សង្វាក់ផលិតកម្ម iPhone 7C នឹងចាប់ផ្ដើមពីខែក្រោយ តម្លៃចន្លោះពី ៤០០ដុល្លារ-៥០០ដុល្លារ
រយៈពេលប៉ុន្មានខែមកនេះ មានព័ត៌មានដែលអាចទៅរួចថា Apple នឹងផលិតទូរស័ព្ទ iPhone អេក្រង់ ៤អ៊ីញនៅឆ្នាំក្រោយ ខណៈដែលចចាមអារ៉ាមខ្លះបានលើកឡើងថា អាចត្រូវក្រុមហ៊ុនប្រកាសចេញនៅក្នុងព្រឹត្តិការណ៍អំឡុងខែមីនា។ មិនត្រឹមតែ iPhone 7C នោះទេ ចំណែកនាឡិកាឆ្លាតវៃ Apple Watch 2 ក៏រំពឹងនឹងបង្ហាញខ្លួនពេលនោះដែរ។
យោងតាមរបាយការណ៍ថ្មីមួយឱ្យដឹងថា ផលិតកម្មទូរស័ព្ទ iPhone 7C ដែលភ្ជាប់អេក្រង់ ៤អ៊ីញត្រូវគេរំពឹងថា នឹងចាប់ផ្ដើមពីខែក្រោយនេះហើយ។ របាយការណ៍ឱ្យដឹងថា Apple បានជោគជ័យមួយផ្នែកតូចពាក់ព័ន្ធសង្វាក់ផលិតកម្ម iPhone 7c ហើយនឹងចាប់ផ្ដើមផលិតពេញលេញចាប់ពីខែមករា ឆ្នាំ២០១៦ ខាងមុខ។ ម្យ៉ាងទៀតរបាយការណ៍ថែមទាំងលើកឡើងថា ទូរស័ព្ទ iPhone អេក្រង់តូចជាងមុននេះ នឹងមាន ៣ពណ៌សម្រាប់អតិថិជនជ្រើសរើស។ របាយការណ៍បន្តទៀតថាទូរស័ព្ទអេក្រង់តូចជាងមុនដែលអាចមានឈ្មោះ iPhone 6C ឬ iPhone 7C នេះ នឹងភ្ជាប់ថាមពលថ្ម 1,642 mAh។ ចំណែកតម្លៃរបស់វានៅពេលចេញលក់ផ្លូវការ អាចស្ថិតក្នុងចន្លោះពី ៤០០ដុល្លារ ទៅ ៥០០ដុល្លារ៕
