​អ្នក​ប្រើ អាច​នឹង​ប្លែក​ភ្នែក​ជាមួយ​កម្មវិធី​ផ្ញើសារ Facebook Messenger ​ដោយ​ក្រុមហ៊ុន​បណ្ដាញ​សង្គម​នេះ កំពុង​ធ្វើតេស្ត​ដាក់​បញ្ចូល​ផ្ទាំង​ពាណិជ្ជកម្ម (ads) ទៅ​ក្នុង mobile app ​នេះ។ វា​ជា​ការ​ធ្វើតេស្ត​សាកល្បង​ជំនាន់ beta ​នៃ home screen ​Messenger ads ​ទូទាំង​ពិភពលោក មុន​ផ្ទាំង ads ​នឹង​ត្រូវ​បញ្ចូល​ផ្លូវការ​រយៈពេល​ប៉ុន្មាន​សប្ដាហ៍​ខាង​មុខ។

តាម​សេចក្ដី​រាយការណ៍​ពី​គេហទំព័រ engadget ​ឱ្យ​ដឹង​ថា ផ្ទាំង ads ​នឹង​ឃើញ​មាន​នៅ​ក្នុង​កម្មវិធី​ផ្ញើ​ឆាត FB Messenger ​លើ​បណ្ដា​អ្នក​ប្រើ​មួយ​ចំនួន​ជា​បន្តបន្ទាប់ ទម្រាំ​ទម្រង់​ថ្មី​នេះ បង្ហាញ​ដល់​គ្រប់​អ្នក​ប្រើ​ទូទាំង​ពិភពលោក​នៅ​ចុង​ឆ្នាំ២០១៧។ យ៉ាងហោច ក្រុមហ៊ុន​មិន​បាន​រុញរា ឬ​ខ្មាស​អតិថិជន​ខ្លួន ដែល​ជំរុញ​ពាណិជ្ជកម្ម​តាមរយៈ​បញ្ចូល​ផ្ទាំង ads សូម្បី​នៅ​ក្នុង FB Messenger នោះ​ឡើយ។ ​

អ្នក​ដឹកនាំ​ផ្នែក​ផលិតផល Messenger ឈ្មោះ Stan Chudnovsky ​បាន​ប្រាប់​គេហទំព័រ VentureBeat ថា វា​ជា​រឿង​ធម្មតា​ប៉ុណ្ណោះ​ចំពោះ​ប្រភព​ចំណូល​របស់​ស្ថាប័ន ទៅ​លើ​ការ​ផ្សព្វផ្សាយ​ពាណិជ្ជកម្ម គឺ “នេះ​ជា​របៀបដែល​យើង​កំពុង​សាង​ប្រាក់​ចំណូល​ដ៏​ត្រឹមត្រូវ​ក្នុង​ពេល​បច្ចុប្បន្ន”។ ក៏​មាន​ទម្រង់​រក​ចំណូល​ផ្សេង​ទៀត (Business model) ​កំពុង​ត្រូវ​ក្រុមហ៊ុន​ពិចារណា​ផង​ដែរ។ Facebook គឺ​យក​ចិត្ត​ទុកដាក់​លើ​របៀប​នៃ​ការ​បង្ហាញ​ប្រភេទ​ផ្ទាំង​ពាណិជ្ជកម្ម​ដល់​អ្នក​ប្រើប្រាស់​ខ្លួន​បាន​ឃើញ ដែល​អាច​ជា​រឿងរ៉ាវ​ពាក់ព័ន្ធ​ជំនួញ តម្រូវ​តាម​អ្នក​ប្រើ​របស់​ខ្លួន ឬ​ចំណូល​ចិត្ត​ផ្សេង​ៗ៕ ប្រែ​សម្រួល៖ រឹទ្ធិរាជ ប្រភព៖ engadget