សុភាសិតចក្រភពរ៉ូម៖ «ដរាបណាជីវិតនៅតែមាន នោះក្ដីសង្ឃឹមក៏មិនទាន់រលត់»
«ដរាបណាជីវិតនៅតែមាន នោះក្ដីសង្ឃឹមក៏មិនទាន់រលត់» ។ នេះជាសុភាសិតរបស់ចក្រភពរ៉ូម ដែលចង់លើកទឹកចិត្តដល់មនុស្សទាំងឡាយឲ្យមានក្ដីសង្ឃឹមជានិច្ច ក្នុងការបន្តធ្វើការងារដែលខ្លួនចង់បាន ដរាបណាជីវិតមិនទាន់រលត់។
ក្តីសង្ឃឹម របស់មនុស្សម្នាក់ៗ ពិតជាដើរតួយ៉ាងសំខាន់ ក្នុងការជំរុញឲ្យអ្នកមានទឹកចិត្តក្នុងការខិតខំបំពេញរាល់ការងារដែលខ្លួនពេញចិត្ត។ ប៉ុន្តែបើគ្មានក្តីសង្ឃឹមទេ នោះពួកគេរស់នៅត្រឹមជាមួយសំបកខ្លួនប៉ុណ្ណោះ ខណៈខ្លឹមក្នុងខ្លួនលែងមានទៀតហើយ។ អ្នកខ្លះដោយសារតែឆាប់អស់សង្ឃឹមពេក ក៏មើលឃើញពិភពលោកទាំងមូលថា ជាពិភពខ្មៅងងឹត ហើយក៏សម្រេចចិត្តបញ្ចប់ជីវិត។ អ្វីៗគឺអាស្រ័យលើការគិតរបស់អ្នកប៉ុណ្ណោះ បើទោះបីជាវាមិនអាចកើតឡើងដូចការគិតរបស់អ្នកមួយរយភាគរយក៏ដោយ។ ប៉ុន្តែបើអ្នកគិតអវិជ្ជមាន ហើយបោះបង់ក្តីសង្ឃឹមចោលនោះ វាប្រៀបបាននឹងចូលក្នុងបន្ទប់តូចចង្អៀត ហើយបិទយ៉ាងជិត ហើយឃុំខ្លួនឯងនៅទីនោះជារៀងរហូត។ ដូច្នេះហើយ មិនថា មានអ្វីកើតឡើងនោះទេ អ្នកត្រូវតែបណ្ដុះក្តីសង្ឃឹមរបស់ខ្លួនឲ្យមានជានិច្ច ព្រោះវាជាប្រៀបដូចជា ដង្ហើមរបស់អ្នកអ៊ីចឹង។ បើគ្មានវានោះ អ្វីៗក៏ត្រូវចប់ដែរ៕
ដោយ៖ រតនា វិចិត្រ
