ព្រឹត្តិការណ៍​ដ៏​មហស្ចារ្យ​ Audi Summit ​​​បាន​ប្រព្រឹត្តទៅ​ដោយ​ជោគជ័យ​​នៅ​មជ្ឈមណ្ឌល​ Fira ​លើ​ផ្ទៃដី​ទំហំ​ជាង​ ១​ម៉ឺន​ម៉ែត្រ​ការ៉េ​​ ​នៅ​ទីក្រុង​បាសេឡូណា​ ប្រទេស​អេស្ប៉ាញ។ កម្មវិធី​នេះ​ គឺ​ប្រព្រឹត្ត​​​ទៅ​ចាប់​ពី​​ម៉ោង ៩:៣០​នាទី​ព្រឹក​ ​រហូត​ដល់​ម៉ោង ១១​យប់ (ម៉ោង​នៅ​ប្រទេស​អេស្ប៉ាញ)។  ក្នុង​កម្មវិធី​​នេះ​ មាន​ភ្ញៀវ​កិត្តិយស​ប្រមាណ​ជាង​ ២០០០​នាក់​មក​ពី​ជុំ​វិញ​ពិភពលោក​ចូលរួម ហើយ​អ្វី​ដែល​គួរ​ឱ្យ​កត់​សម្គាល់​បំផុត​នោះ​គឺ​ Audi បាន​បង្ហាញនូវ​បច្ចេកវិទ្យា​ចូលរួម​ផ្លាស់ប្ដូរ​ពិភពលោក​​ថ្មីៗ​ជា​ច្រើន រួម​នឹង​រថយន្ត​ថ្មី​សន្លាង​ Audi A8 ជំនាន់​ទី៤។  ​កិច្ច​​ជួប​ជុំ​កំពូល​​ Audi Summit ឆ្នាំ​នេះ​ គឺ​ជា​ព្រឹត្តិការណ៍​ដំបូង​ ​ដែល​​បាន​បង្ហាញ​ពី​ដំណោះស្រាយ​ឈាន​មុខ​​​គេ​លើ​អនាគត​​នៃ​បំឡាស់​ប្ដូរ​នៅ​ក្នុង​ទីក្រុង​ (urban mobility) ​ដោយ​គិត​ពី​សេវាកម្ម​​លំដាប់​ខ្ពស់​នៃ​​បំឡាស់​ប្ដូរ​​ ​រហូត​ដល់​​បច្ចេកវិទ្យា​​គំរូ​​​​នៃ​ការ​បើកបរ​ និង​ចត​យានយន្ត។  អ្វី​ដែល​ជា​ចំណុច​លេច​ធ្លោ​ជាង​គេ​បំផុត​នោះ​ គឺ​ការ​ដាក់​បង្ហាញ​រថយន្ត​ Audi A8 ជំនាន់​ចុង​ក្រោយ​ និង​បច្ចេកវិទ្យា​ថ្មី​ៗ​ដែល​ក្រុម​ហ៊ុន​ទើប​សម្រេច​បាន​ជា​ច្រើន​ទៀត។ ​​​​​​​​​ភ្ញៀវ​កិត្តិយស​ទាំង​អស់​ ​​ទទួល​បាន​បទ​​ពិសោធន៍​​​នៃ​សេវាកម្ម​ថ្មី​ៗ​របស់​ក្រុមហ៊ុន​​​​អំពី​​បច្ចេកវិទ្យា​បំឡាស់​ទី​​​ផ្សារភ្ជាប់​នឹង​​ឌីជីថល​ និង​​ប្រកប​ដោយ​ចិរភាព​សម្រាប់​ទីក្រុង​​ឆ្លាតវៃ (smart city) នា​ពេល​អនាគត។ ប្រធាន​បទ​សំខាន់​ៗ​នៃ​ការ​បង្ហាញ​​ថ្ងៃ​នេះ​មាន​ពាក់​ព័ន្ធ​នឹង​ ការ​ផលិត​ប្រកប​ដោយ​ចិរភាព  ការ​ស្ថាបនា​ដោយ​មាន​ទម្ងន់​ស្រាល​ ការ​តភ្ជាប់​ និង​​បច្ចេកវិទ្យា​រថយន្ត​​បើកបរ​ដោយ​ខ្លួន​ឯង និង​មាន​សេវាកម្ម​ជា​ឌីជីថល​ជា​ច្រើន​ទៀត។ ​ការ​តាំង​បង្ហាញ​​ត្រូវ​បាន​បែង​ចែក​ជា​​​កម្មវិធី​ធំ​ៗ​ ២​​ក្នុង​​ព្រឹត្តិការណ៍​ដដែល​នេះ​ គឺ​​ ការ​តាំង​បង្ហាញ​​រថយន្ត​បច្ចេកវិទ្យា​ថ្មី​​៧០​គ្រឿង​ ​​រយៈ​ពេល​មួយ​​ម៉ោង​នៅ​តាម​ឆ្នេរ​សមុទ្រ​មេឌីទែរ៉ាណេ​ ​និង​កម្មវិធី​មួយ​ទៀត​គឺ​ការ​ដាក់​តាំង​បង្ហាញ​​រថយន្ត​បច្ចេកវិទ្យា​ចុង​ក្រោយ​ Audi A8។ ​ក្រុមហ៊ុន​ Audi AG ​បាន​​បង្ហាញ​បច្ចេកវិទ្យា​ថ្មី Audi AI ដែល​នឹង​ធ្វើ​ឱ្យ​អ្នក​បើកបរ​កាន់​តែ​ងាយ​ស្រួល​​ដោយ​មាន​ជំនួយ​ពី​ ​​បច្ចេកវិទ្យា​បញ្ញា​សិប្បនិម្មិត (artificial intelligence) នា​ពេល​អនាគត។ ក្រុមហ៊ុន​ Audi AG មាន​គោលដៅ​អភិវឌ្ឍន៍​បច្ចេកវិទ្យា​​ Vorsprung ​ឱ្យ​កាន់​តែ​ទំនើប​និង​ពិសេស​ថែម​ទៀត។ ដោយ​ស្ថិត​នៅ​លើ​មាគ៌ា​នៃ​ការ​អភិវឌ្ឍ​បច្ចេកវិទ្យា​​​ឌីជីថល​បំពាក់​លើ​រថយន្ត​ Audi បាន​និង​កំពុង​ដាក់​ដំណើរការ​បច្ចេកវិទ្យា​ឌីជីថល​​ដើម្បី​​បង្កើត​ដំណោះស្រាយ​​ប្រកប​ដោយ​ចិរភាព​​សម្រាប់​បំឡាស់​ទី​នៅ​ក្នុង​ទីក្រុង។ ​​BizKhmer  បាន​ផ្ដិត​យក​ទិដ្ឋភាព​ជា​ច្រើន​អំពី​ការ​បង្ហាញ​នូវ​​​ដំណោះស្រាយ​​​​រាប់​តាំង​ពី​ផលិតផល​កម្ម​ ​ស្ដុក​​ ការ​លក់​ និង​ការ​​ធ្វើ​ទីផ្សារ​ទៀត​ផង។ ​ ទៅ​អនាគត ការ​ដំឡើង​រថយន្ត​របស់​ក្រុមហ៊ុន គឺ​ប្រើ​បច្ចេកវិទ្យា​​ស្វ័យប្រវត្តិ​មាន​ដូច​ជា​មនុស្ស​យន្ត​ និង​ម៉ាស៊ីន​ស្វ័យ​ប្រវត្តិជា​ដើម។ ចំណុច​នេះ​គឺ​ក្រុមហ៊ុន​មាន​គោលដៅ​​បង្កើត​ចង្វាក់​​ផលិតកម្ម​របស់​ខ្លួន​ឱ្យ​​អាច​ដំណើរការ​បាន​ដោយ​គ្មាន​ខ្សែ​​ចង្វាក់​​​ដំឡើង (assembly lines) ពោលគឺ​ការ​ប្រើ​បច្ចេកវិទ្យា​ស្វ័យ​ប្រវត្តិ​ដើម្បី​កាត់​បន្ថយ​​ប្រើ​កម្លាំង​ពលកម្ម​មនុស្ស​ ហើយ​ចំណេញ​ពេល​វេលា​ និង​មាន​ប្រសិទ្ធភាព​ខ្ពស់​ថែម​ទៀត​ផង។ អត្ថបទ​លម្អិត​ជុំ​វិញ​លក្ខណៈ​ពិសេស​របស់​ Audi A8 ជំនាន់​ចុង​ក្រោយ និង​បច្ចេកវិទ្យា​ថ្មី​ៗ​ផ្សេង​ទៀត​ នឹង​ចេញ​ផ្សាយ​ជូន​លោក​អ្នក​នា​ពេល​​ក្រោយ។ សូ​ម​កុំ​ភ្លេច​តាម​ដាន​ជា​មួយ​ BizKhmer៕