Qualcomm ​និង Apple ​កំពុង​ស្ថិត​នៅ​ក្នុង​ជម្លោះ ​ពាក់ព័ន្ធ​ការ​បង់​តម្លៃ​សិទ្ធិ (royalties) ​ហើយ​ពេល​នេះ​ក្រុមហ៊ុន Qualcomm ​កំពុង​ព្យាយាម​បំបិទ​ការ​នាំ​ចូល​លក់ ទូរស័ព្ទ iPhone របស់ Apple ​នៅ​ទីផ្សារ​អាមេរិក។ ​ក្រុមហ៊ុន​ទាំងពីរ​នេះ បាន​ដាក់​ពាក្យ​បណ្ដឹង​ទៅ​គណៈកម្មការ​សហព័ន្ធ​ពាណិជ្ជកម្ម​ប្រចាំ​នៅ​សហរដ្ឋអាមេរិក ដោយ​បាន​អះអាង​ថា​ទូរស័ព្ទ iPhone ​បាន​រំលោភ​លើ​ប៉ាតង់​សំខាន់​ដល់​ទៅ ៦ប៉ាតង់​ដែល​ជា​របស់ Qualcomm ​កំពុង​កាន់កាប់។ ​

ការ​បង្កើត​ទាំងឡាយ​របស់ Qualcomm ​គឺ​ជា​បេះដូង​នៃ​រាល់​ទូរស័ព្ទ iPhone ​ហើយ​ក៏​បន្ត​អភិវឌ្ឍ​ដល់​បច្ចេកវិទ្យា​ម៉ូឌឹម (modem) ឬ​ស្តង់ដារ Cellular។ នេះ​បើ​តាម​ការ​បញ្ជាក់​ពី​លោក Don Rosenberg ​អនុប្រធាន​ និង​ជា​មេធាវី​របស់ Qualcomm។ ប៉ាតង់​ដែល​ពាក់ព័ន្ធ​ក្នុង​ជម្លោះ ជា​បច្ចេកវិទ្យា​សំខាន់​ចំនួន៦ ដែល​សុទ្ធ​សឹង​ជា​កូនសោ​នៃ​មុខងារ​ដ៏​សំខាន់​នៅ​លើ iPhone។ Apple ​បន្ត​ប្រើ​បច្ចេកវិទ្យា​របស់ Qualcomm ​ខណៈ​ខ្លួន បដិសេធ​មិន​បង់ប្រាក់​ទៅ​ឱ្យ Qualcomm។ ដោយសារ​បែប​នេះ ទើប​បណ្ដឹង​នេះ ត្រូវ​បាន​ដាក់​ចេញ និង​ស្នើ​ឱ្យ​បញ្ឈប់​ការ​រំលោភ​ប្រើប្រាស់​ប៉ាតង់​បច្ចេកវិទ្យា​ចំនួន៦ របស់ Qualcomm ទៅ​លើ​ផលិតផល Apple។ ប៉ាតង់​ទាំង​៦ រួម​មាន៖ U.S. Patent No. 8,633,936, U.S. Patent No. 8,698,558, U.S. Patent No. 8,487,658, U.S. Patent No. 8,838,949, U.S. Patent No. 9,535,490 និង U.S. Patent No. 9,608,675 ដែល​ជួយ​ដល់​ស្មាតហ្វូន​ឱ្យ​កាន់ថ្ម​បាន​យូរ​ជាង​មុន។ យ៉ាងណា ពេល​នេះ មិន​ទាន់​មាន​ការ​ឆ្លើយតប​ពី​ភាគី Apple ​ទៅ​លើ​ការ​ត្អូញត្អែរ​របស់ Qualcomm ទៅ​​គណៈកម្មការ​សហព័ន្ធ​ពាណិជ្ជកម្ម​ប្រចាំ​អាមេរិក​នៅ​ឡើយ៕ ​ប្រែ​សម្រួល៖ រឹទ្ធិរាជ ប្រភព៖ Qualcomm