ចំណុចទាំងនេះហើយដែលធ្វើឲ្យអ្នកមិនជោគជ័យក្នុងមុខជំនួញរបស់ខ្លួន
មិនថាអ្នកធ្វើជំនួញអ្វីក៏ដោយ ការមានគម្រោងច្បាស់លាស់គឺជារឿងសំខាន់ ប៉ុន្តែការសម្រេចនូវគម្រោងដែលអ្នកបានកំណត់ទើបជារឿងលំបាក។ អ្នកជំនួញមិនតិចនាក់នោះទេដែលចង់បោះបង់ជំនួញក្រោយពីរបីខែដោយសារតែអ្វីៗមិនដូចសេចក្ដីប្រាថ្នា។ ខាងក្រោមនេះគឺជាហេតុផលដែលរារាំងអ្នកមិនឲ្យជោគជ័យ ហើយក៏ជាឧបសគ្គដែលអ្នកត្រូវតែយកឈ្នះឲ្យបាន៖
១) ស្រួលស្រមៃតែមិនហ៊ាននឹងលះបង់៖ នៅពេលដែលយើងទើបតែចាប់ផ្តើមជំនួញដំបូង យើងតែងតែមានផែនការចង់សម្រេចនូវចំណុចនេះចំណុចនោះជាដើម។ ប៉ុន្តែ ភាពជាក់ស្ដែង ដំណើរជីវិតជាអ្នកជំនួញមិនមែនជារឿងងាយស្រួលនោះទេ។ ពេលខ្លះ អ្វីៗមិនដើរដូចអ្វីដែលយើងបានគិតទុកឡើយ ម៉្យាងវិញទៀត បញ្ហាឬឧបសគ្គចេះតែកើតមានឡើងជានិច្ច ហើយវាធ្វើឲ្យអ្នកជំនួញជាច្រើនស្រ្តេស ហើយចង់លំហែកាយបន្ធូរអារម្មណ៍ទៅវិញ។ ប៉ុន្តែ ដើម្បីសម្រេចគោលដៅជំនួញបាន អ្នកជំនួញគ្រប់រូបត្រូវតែហ៊ានលះបង់ លះបង់ទាំងពេលវេលាផ្ទាល់ខ្លួន លះបង់ទាំងថាមពល ខិតខំធ្វើការដើម្បីសម្រេចគោលដៅឲ្យបាន។
២) ស្ដាប់គំនិតអវិជ្ជមាន៖ ក្នុងខួរក្បាលយើងនេះតែងមានសំឡេងអវិជ្ជមានមកខ្សឹកខ្សួលយើងថាយើងមិនអាចធ្វើវាបានទេ យើងគ្មានសំណាង យើងគ្មានសមត្ថភាព។ យើងចាំបាច់ត្រូវតែយកឈ្នះនូវគំនិតអវិជ្ជមានទាំងនេះឲ្យបាន បើមិនដូច្នេះហើយ អ្នកអាចនឹងមានអារម្មណ៍ថាខ្លួនឯងពិតជាអសមត្ថភាព គ្មានបានការមែន ហើយចាប់ផ្តើមមានគំនិតចង់បោះបង់ជំនួញតែម្តង។
៣) ខ្លាចសម្ដីអ្នកដទៃនិងភាពបរាជ័យ៖ អ្នកជំនួញខ្លះខ្លាចការបរាជ័យ ខ្លាចអ្នកដទៃមើលមកខ្លួនឯងថាគ្មានបានការ មិនអាចសម្រេចអ្វីបានសោះ។ អ្នកខ្លាចគំនិតអ្នកដទៃដែលគិតមកលើអ្នកជាជាងភាពបរាជ័យក្នុងជំនួញទៅទៀត។ ប៉ុន្តែ អ្នកត្រូវចងចាំបានភាពបរាជ័យគឺជាផ្នែកមួយនៃជំនួញតែប៉ុណ្ណោះ គ្មានជំនួញណាដែលមិនធ្លាប់ភាពបរាជ័យនោះទេ។ អ្វីដែលសំខាន់គឺអ្នកហ៊ានប្រឈមមុខ ទទួលស្គាល់ការពិត រៀនពីវាហើយផ្លាស់ប្តូរយុទ្ធសាស្ត្រថ្មី។ នៅទីបំផុត គ្មាននរណាម្នាក់គិតពីភាពបរាជ័យនោះទេ។ ដូច្នេះហើយ អ្នកត្រូវខំប្រឹងរហូតដល់អ្នកជោគជ័យ៕
ប្រែសម្រួល៖ អុឹង មុយយូ ប្រភព៖ entrepreneur.com
