វិធីសាស្ត្រទាំងនេះជួយអ្នក «កុំឲ្យឆាប់មួម៉ៅ ហើយចង់តែឈ្លោះគ្នាទៀត»
មនុស្សម្នាក់ៗ បើសិនជា ជួបរឿងស្មុគស្មាញ រឿងមិន សមនឹងបំណង ពួកគេតែងតែធ្វើអ្វីមួយដើម្បីលើកតម្កើងខ្លួនឯង។ កំហឹងនិងការឈ្លោះប្រកែកគ្នា កើតឡើងដោយសារតែមានបុគ្គល២នាក់ មានគំនិតផ្ទុយគ្នា ហើយលើក តម្កើងគំនិតឯងជាធំ។ បើគិតថារាល់ថ្ងៃនេះ អ្នកតែងតែមានអារម្មណ៍មួម៉ៅ ហើយឧស្សាហ៍មានរឿងឈ្លោះប្រកែកគ្នា អ្នកគួរអានវិធីសាស្ត្រខាងក្រោមនេះសិនទៅ៖
១) នៅម្នាក់ឯងសិនទៅ៖ ប្រសិនបើអ្នកមានអារម្មណ៍មិនល្អហើយ ឆាប់រកកន្លែងណានៅម្នាក់ឯង ដើម្បីបន្ធូរអារម្មណ៍សិនទៅ។ បើអ្នកអាចដឹងខ្លួនឯងថា អារម្មណ៍កំពុងមិនល្អហើយ អ្នកគួររកកន្លែងស្ងប់ស្ងាត់ ប្រសើរជាង ការតទល់នឹងនរណាម្នាក់ ដែលនឹងធ្វើឲ្យអ្នកស្ដាយក្រោយ ។
២) ជៀសវាងសេពគ្រឿងស្រវឹង៖ ដូចដែលអ្នកដឹងហើយ ការសេពគ្រឿងស្រវឹង នឹងធ្វើឲ្យអ្នកគ្រប់គ្រងខ្លួនឯងលែងជាប់។ ហើយបើមាននរណាម្នាក់មកជំទាស់នឹងពាក្យអ្នកនិយាយ ពេលនោះអ្នកនឹងទប់ខ្លួនឯងលែងជាប់ ហើយចាប់ផ្ដើមបង្កជាបញ្ហាតែម្ដង។ នេះហើយឥទ្ធិពលនៃស្រា ដែលធ្វើឲ្យអ្នកជាមនុស្សស្លូតក្លាយជាមនុស្សកាច។
៣) ដកដង្ហើមវែង ៗ៖ ការស្រាវជ្រាវបង្ហាញថា ៖«ការដកដង្ហើមវែងៗ គឺជាការហាត់ប្រាណមួយជួយបន្ថយសម្ពាធឈាម ហើយបន្ថយភាព តានតឹង។» ដោយគ្រាន់តែដកដង្ហើមវែងៗ អ្នកអាចសម្រួលអារម្មណ៍ពីមួម៉ៅមកធម្មតាវិញបានដោយងាយ។
៤) មិន ត្រូវនិយាយសំឡេងធ្ងន់៖ កម្រិតនៃភាពតានតឹងអ្នកអាចនឹងកើនឡើង តែសូមប្រយ័ត្នពាក្យសម្ដីព្រមទាំងសំឡេងដែលអ្នកប្រើផង។ ព្រោះថាសំឡេងកំហក ខ្លាំងៗ ក៏អាចបង្កជាជម្លោះហិង្សាបានដែរ។
៥) ញញឹម៖ គ្រាន់តែបញ្ចេញស្នាមញញឹម គឺវាមិនពិបាកឡើយ។ ដូចនេះបើសិនជាអ្នកមានបញ្ហាឬក៏ជម្លោះកំពុងកើតមានចំពោះមុខអ្នក អ្នក គួរបញ្ចេញស្នាមញញឹមឡើង។ ស្នាមញញឹមអាចធ្វើឲ្យមនុស្សទាំងសងខាង ទម្លាក់កំហឹងចុះបាន៕
ប្រែសម្រួល៖ ព្រំ សុវណ្ណកណ្ណិកា
