​ក្រុមហ៊ុន LG ​ថ្មីៗ​នេះ បាន​បង្ហាញ​ចេញ​កញ្ចក់​អេក្រង់​ទំនើប អាច​ពត់​បាន (flexible) ​ទំហំ​ធំ​បំផុត​លើ​លោក ប្រភេទ OLED ​និង​មាន​លក្ខណៈ​ថ្លា​មើល​ឆ្លុះ​ពី​ម្ខាង​ទៅ​ម្ខាង។ អេក្រង់​ទំនើប​នេះ មាន​ទំហំ ៧៧អ៊ីញ​ អម​ដោយ​កម្រិត​បង្ហាញ​រូប Ultra HD ​ទំហំ 3820x2160x ​ហើយ​ថ្លា​កម្រិត ៤០% និង​មាន​កាំ (radios) ៨០មិល្លីម៉ែត្រ។

​នេះ​មាន​ន័យ​ថា អេក្រង់​អាច​ឱ្យ​គេ​រមូល​ចូល ទៅ​ជា​ទម្រង់​ស៊ីឡាំង​មួយ​បាន ឬ​ទៅ​ជា​រាង​ដូច​បំពង់​ ដោយ​មិន​ប៉ះពាល់​ដល់​គុណភាព​អេក្រង់​ឡើយ ដែល​វា​នឹង​ផ្ដល់​សក្ដានុពល​សម្រាប់​ការ​ប្រើ និង​គោលបំណង​ចែកចាយ​លើ​ទីផ្សារ។ បច្ចេកវិទ្យា​អេក្រង់​ពត់ពែន​បាន Flexible Display នេះ គឺ​ត្រូវ​បាន​បណ្ដា​ក្រុមហ៊ុន​អេឡិចត្រូនិក​ធំៗ​មួយ​ចំនួន​ចាប់អារម្មណ៍ ចង់​សាកល្បង​អភិវឌ្ឍ រយៈពេល​ប៉ុន្មាន​ឆ្នាំ​ចុងក្រោយ​នេះ។ ប៉ុន្តែ​វា​មិន​ទាន់​ត្រូវ​ផលិត​ចេញ​ជា​រូបរាង​ពិតប្រាកដ​នៅ​ឡើយ ដោយសារ​មាន​បញ្ហា​ទាក់ទង​នឹង​ការ​ចែកចាយ​អេឡិចត្រូនិក​ទៅ​ផ្គត់ផ្គង់​អេក្រង់។ ​

​LG ​អាច​ជា​ក្រុមហ៊ុន​មួយ កំពុង​ជម្នះ ដោយ​ព្យាយាម​ផលិត​អេក្រង់​ទំនើប អាច​ពត់​បាន ជាក់ស្ដែង​ទើប​បញ្ចេញ​គំរូ​បឋម​នៃ​អេក្រង់ Flexible ទំហំ​ធំ​ដល់ ៧៧អ៊ីញ ប្រភេទ OLED។ វា​មិន​មែន​ជា​លើក​ទីមួយ​នោះ​ទេ ដែល LG បង្ហាញ​គំរូ​អេក្រង់​ពត់​បាន គ្រាន់តែ​អេក្រង់​ថ្មី​នេះ កាន់តែ​ត្រូវ​បាន​ផលិត​ឱ្យ​មាន​ទំហំ​ធំ​ជាង​មុន ឬ​អាច​ហៅ​ថា ជា​អេក្រង់​ពត់​បាន ធំ​ជាង​គេ​លើ​លោក សម្រាប់​ពេល​បច្ចុប្បន្ន។ គួរ​រំលឹក​ថា កាលពី​ឆ្នាំ២០១៤ LG ក៏​ធ្លាប់​បង្ហាញ​ចេញ​អេក្រង់​ពត់​បាន OLED ​រួច​មក​ហើយ ដែល​វា​មាន​ទំហំ​ត្រឹម ១៨អ៊ីញ flexible OLED ​ប៉ុណ្ណោះ ជាមួយ​កាំ​ត្រឹម ៣០មិល្លីម៉ែត្រ។ លុះ​រយៈពេល ២ឆ្នាំ​ក្រោយ ក្រុមហ៊ុន​កូរ៉េ​នេះ ក៏​បាន​បន្ត​ផលិត​ចេញ​អេក្រង់​ថ្លា OLED ​ទំហំ ៥៥អ៊ីញ ជាមួយ​កម្រិត​ថ្លា ៤០%៕   ប្រែ​សម្រួល៖ រឹទ្ធិរាជ ប្រភព៖ techspot