​iPhone ​ដែល​ជា​សមាជិក​ថ្មី មាន​ការ​ចាប់អារម្មណ៍​ខ្លាំង​ពី​មហាជន​ សម្រាប់​ឆ្នាំ២០១៧ នេះ នឹង​ត្រូវ​វែកមុខ​ផ្លូវការ​អំឡុង​ខែ​កញ្ញា​ខាង​មុខ។ iPhone 8 ​ត្រូវ​បណ្ដាញ​ព័ត៌មាន​ទាំង​ជាតិ និង​អន្តរជាតិ​កំពុង​ហៅ​ពេញៗ​មាត់ វា​នឹង​ជា​កំពូល​ស្មាតហ្វូន​ ជំនាន់​ចុងក្រោយ​របស់ Apple។ iPhone 8 ​នឹង​ទំនើប បំបាក់​ដោយ​កញ្ចក់​អេក្រង់ OLED មាន​គែម​អេក្រង់​ស្ដើង ទាន់សម័យ។ ត្រឹម​លក្ខណៈ​សម្បត្តិ​លេច​ធ្លាយ​កន្លង​មក គឺ​ហាក់​ទទួល​បាន​ការ​ចាប់អារម្មណ៍​ខ្លាំង​ពី​សាធារណជន ពិសេស​គឺ​ Fan ​ដែល​តែង​ប្រើ​ទូរស័ព្ទ iPhone កន្លង​មក។ បើ​តាម​ការ​ស្រង់​ស្ថិតិ​លើ​អ្នក​ប្រើ iPhone នៅ​សហរដ្ឋ​អាមេរិក ក្នុង​ចំណោម​អ្នក​ទាំង​នោះ គឺ​មាន ២៦% ដែល​ពួក​គេ មាន​គម្រោង​ផ្លាស់ប្ដូរ​ស៊េរី iPhone ដែល​ខ្លួន​កំពុង​ប្រើ​បច្ចុប្បន្ន ទៅ​ប្រើ iPhone 8 ​ត្រៀម​នឹង​ចេញ​ចុង​ឆ្នាំ​នេះ។

ចំណុច​អាច​ទៅ​រួច​ដំបូង​គេ គឺ​ថា iPhone 8 ​អាច​នឹង​ប្រើ​អេក្រង់​ប្រភេទ OLED ​ដែល​ផលិត​ដោយ​ក្រុមហ៊ុន Samsung។ វា​ក៏​នឹង​បង្ហាញ​ខ្លួន​ជាមួយ​បច្ចេកវិទ្យា​ថ្មី បង្កប់​ទ្រនាប់​ស្កេន​ក្រយៅដៃ Touch ID fingerprint scanner ​នៅ​ក្រោម​កញ្ចក់​អេក្រង់។ ​iPhone 8 ​ក៏​នឹង​មាន​ល្បឿន​ដំណើរការ​លឿន​ជាង​មុន ដោយ​វា​អាច​ត្រូវ​បំពាក់​ឈីប​ស៊េរី​ថ្មី Apple A11 ​ហើយ​ក៏​អាច​ភ្ជាប់ Sensor ទំនើប​ផ្នែក​ខាង​មុខ ប្រភេទ 3D sensor ​អាច​ឱ្យ​អ្នក​ប្រើ​ចំណាំ​ផ្ទៃ​មុខ​ម្ចាស់​ទូរស័ព្ទ​បាន មិន​ចាញ់ Galaxy Note 8/8+ នោះ​ទេ។

​តាម​លទ្ធផល​ស្ថិតិ​ពី Branding Brand ​បង្ហាញ​ថា ២៦% នៃ​អ្នក​ប្រើ iPhone ​បច្ចុប្បន្ន​នៅ​អាមេរិក ពួក​គេ​មាន​បំណង​ប្ដូរ​ស៊េរី​ឡើង​ទៅ iPhone 8, រីឯ​អ្នក​មាន​បំណង​ទិញ​ប្រើ​ស៊េរី iPhone 7 មាន ១៤% ​ចំណែក ១២% ផ្សេង​ទៀត នឹង​ជ្រើសរើស​ប្រើ​ស៊េរី iPhone 6។ ២% ផ្សេង​ទៀត ពួក​គេ​ថា មាន​គម្រោង​ផ្លាស់ប្ដូរ​ទៅ​ប្រើ​ស្មាតហ្វូន Android វិញ ខណៈ ១% ទៀត​ គេ​ថា អាច​នឹង​ប្រើ iPhone SE៕ ​ប្រែ​សម្រួល៖ រឹទ្ធិរាជ ប្រភព៖ phonearena