ហេតុផលទាំង៤យ៉ាងដែលអ្នកគួរសន្សំលុយនាថ្ងៃនេះ
ជាការពិតមិនអាចប្រកែកបាននោះទេថាអ្នកមានជម្រើសជាច្រើនក្នុងការសន្សំលុយ។ អ្នកអាចសន្សំលុយនៅផ្ទះហើយអាចឃើញសាច់ប្រាក់នៅចំពោះមុខភ្លាមៗទៀតផង ឬការសន្សំលុយនៅធនាគារដោយទទួលបានការប្រាក់បន្ថែម។
មិនថាអ្នកជ្រើសរើសវិធីសន្សំលុយមួយណានោះទេ ការសន្សំលុយគឺមានសារៈសំខាន់និងសារប្រយោជន៍ជាច្រើន។ ខាងក្រោមនេះជាហេតុផល៤យ៉ាងធំៗដែលអ្នកគួរចាប់ផ្តើមសន្សំលុយនៅថ្ងៃនេះ៖
១) មានលុយពេលអ្នកត្រូវការ
ក្នុងជីវិតមនុស្ស លុយនិងមនុស្សគឺមានការទាក់ទងគ្នាយ៉ាងស្អិតល្មួត។ តម្រូវការរបស់មនុស្សគឺមានការផ្លាស់ប្តូរជាប្រចាំដោយសារតែចំណង់ចំណូលចិត្ត។ អ្នកអាចចង់ទិញទូរស័ព្ទស៊េរីថ្មី ទិញកុំព្យូទ័រឬទិញម៉ូតូ។ល។ ដូច្នេះហើយ ប្រសិនជាអ្នកមានលុយសន្សំ អ្នកមានលុយសម្រាប់បំពេញតម្រូវការបានភ្លាមៗ។
២) មានលុយពេលគ្រាមានអាសន្ន
រឿងហេតុពិតជាមិនអាចទាយទុកបានឡើយ។ ថ្ងៃនេះអ្នកប្រហែលជាគ្មានបញ្ហាឬត្រូវការលុយឡើយ តែថ្ងៃស្អែកគឺអ្នកមិនអាចដឹងនោះទេ។ អ្នកអាចជួបគ្រោះថ្នាក់ចរាចរណ៍ អ្នកអាចត្រូវចោរប្លន់ឬក៏អ្នកអាចបាត់បង់ការងារនៅថ្ងៃណាមួយ លុយដែលអ្នកសន្សំនឹងហើយដែលអាចជួយអ្នកបាន។ បើមិនដូច្នេះទេ អ្នកនឹងត្រូវធ្វើមុខក្រាស់ដើរខ្ចីលុយគេសម្រាប់អាសន្ននេះហើយ។
៣) លុយសម្រាប់ការអប់រំ
មិនថាអ្នកអាយុប៉ុន្មានក៏ដោយ អ្នកតែងតែអាចរៀនអ្វីដែលថ្មីឬពង្រឹងសមត្ថភាពបន្ថែម។ មនុស្សជាច្រើនបានត្រឡប់មកសាលាវិញដើម្បីពង្រឹងភាសាឬរៀនជំនាញបន្ថែម។ តែប្រសិនជាអ្នកសន្សំលុយទុកសម្រាប់អនាគតកូន វាក៏មិនខុសដែរ។ ការដែលអ្នកសន្សំលុយបានកាន់តែច្រើន វាក៏ជួយធានាដល់អនាគតកូនរបស់លោកអ្នកដែរ។
៤) សន្សំសម្រាប់ពេលអ្នកចូលនិវត្តន៍
ការសន្សំលុយសម្រាប់ការចូលនិវត្តន៍គឺមានសារៈសំខាន់ខ្លាំងណាស់។ ប្រសិនជាអ្នកបានចាប់ផ្តើមបានឆាប់ អ្នកនឹងមិនរងទុក្ខឬពិបាកនាថ្ងៃអនាគតដែលអ្នកគ្មានលុយពេលអ្នកឈឺឡើយ។ ម៉្យាងវិញទៀត ប្រសិនជាអ្នកសន្សំលុយនៅធនាគារ អ្នកនឹងមានការប្រាក់ថែមមួយកម្រិតទៀត៕
ប្រែសម្រួល៖ មុយយូ
ប្រភព៖ mymoneycoach.ca
