អ្នកប្រាជ្ញ ឡៅ សឺ៖ «មនុស្សដែលមិនជឿជាក់អ្នកដទៃទាល់តែសោះ ក៏មិនត្រូវបានអ្នកដទៃជឿជាក់វិញដែរ»
«មនុស្សដែលមិនជឿជាក់អ្នកដទៃទាល់តែសោះ ក៏មិនត្រូវបានអ្នកដទៃជឿជាក់វិញដែរ»។ នេះជាសម្ដីរបស់អ្នកប្រាជ្ញចិន លោក ឡៅ សឺ ដែលក្នុងន័យនេះលោកចង់ផ្ដល់តម្លៃខ្លាំងលើភាពជឿជាក់រវាងគ្នានឹងគ្នាក្នុងការរស់នៅក្នុងសង្គម។
អ្នកមិនអាចរស់នៅយ៉ាងមានក្ដីសុខ ជាមួយដៃគូរបស់ខ្លួនដោយមួយថ្ងៃៗចេះតែសង្ស័យនេះសង្ស័យនោះ។ អ្នកក៏មិនអាចធ្វើការងារក្រុមយ៉ាងជោគជ័យនោះដែរ ប្រសិនបើសមាជិកនិមួយៗ មិនជឿជាក់គ្នា ហើយក៏មិនផ្ដល់តម្លៃលើការជឿជាក់នោះដែរ។
ជាទូទៅមនុស្សដែលពូកែសង្ស័យ និង ជឿជាក់លើអ្នកដទៃនោះ គឺពួកគេព្យាយាមមើលទៅលើចំណុចខ្មៅជាជាងមើលទៅលើចំណុចពិសេសរបស់នរណាម្នាក់ បើទោះបីជាចំណុចខ្មៅគឺតូចក៏ដោយ ប៉ុន្តែដោយសារតែគិតរឿងនេះអ៊ីចឹងហើយ ទោះមិនធំក៏ពាក់កែវយឹត ដើម្បីមើលឲ្យឃើញធំដែរ។
ក្នុងន័យនេះ មិនមែនមានន័យថា យើងត្រូវតែទុកចិត្ត និង ជឿជាក់ជ្រុលហួសហេតុ ដោយមិនផ្ទៀងផ្ទាត់លើព័ត៌មាន និង ហេតុផលនោះទេ ដើម្បីប្រាកដថា ការផ្ដល់ការជឿជាក់របស់អ្នកទៅលើនរណាម្នាក់ នឹងមិនធ្វើឲ្យអ្នកក្លាយជាជនរងគ្រោះ៕
ដោយ៖ រតនា វិចិត្រ
