ពិតទេដែលព្រះចៅអធិរាជបារាំង Napoleon Bonaparte ស្លាប់ដោយសារប៉ះនឹងជាតិអាសេនិច ?
រយៈកាលជិត២សតវត្សតាំងពីឆ្នាំ១៨២១ដែលព្រះចៅអធិរាជបារាំង Napoleon Bonaparte បានស្លាប់បាត់បង់ជីវិតនៅក្នុងជម្រកភៀសខ្លួន ដែលជាតំបន់ដាច់ស្រយាលមួយស្ថិតនៅខាងត្បូងមហាសមុទ្រអាត្លង់ទិច ក្រោយការចាញ់សង្គ្រាមនៅឯ The Battle of Waterloo ក្នុងឆ្នាំ១៨១៥ បន្ទាប់ពីបានបន្តរាជបល្ល័ង្កពីព្រះបិតា ជាស្ដេចគ្រប់គ្រងចក្រភពបារាំងនៅក្នុងវ័យ៣៥ឆ្នាំ។ សម័យកាលគ្រប់គ្រងរបស់ព្រះចៅអធិរាជ Napoleon គឺជាសម័យកាលដ៏ល្បីល្បាញបំផុតមួយក្នុងប្រវត្តិសាស្ត្រជាមួយនឹងសមត្ថភាពដ៏អង់អាចរបស់ទ្រង់ ដែលទឹកដីស្ទើរតែគ្រប់ផ្នែកទាំងអស់របស់អឺរ៉ុបស្ថិតនៅក្រោមចំណុះរបស់ទ្រង់។ យ៉ាងណាមិញ ការស្លាប់របស់ទ្រង់បានក្លាយជាប្រធានបទដែលបន្តការជជែកវែកញែកឥតឈប់ឈរ និងសិក្សាស្រាវជ្រាវរហូតមកទល់បច្ចុប្បន្ន ថាតើអ្វីទៅជាមូលហេតុពិតប្រាកដនៅពីក្រោយការស្លាប់យ៉ាងអាថ៌កំបាំងនេះ ?
ក្នុងនោះមានចម្លើយមួយបានផ្ដល់ថា Napoleon ស្លាប់ដោយសារប៉ះពាល់ជាមួយជាតិអាសេនិចបន្តិចម្ដងៗដោយមិនដឹងខ្លួនពេញមួយជីវិតរបស់គាត់។ អំឡុងសតវត្សទី១៩ អាសេនិច ដែលត្រូវបានគេចាត់ទុកជា "ស្ដេចនៃជាតិពុល" អាចបង្កជាជំងឺធ្ងន់ធ្ងរជាច្រើនប្រភេទ ថែមទាំងបណ្ដាលឲ្យបាត់បង់ជីវិតនៅពេលប៉ះពាល់វាក្នុងបរិមាណច្រើន ត្រូវបានមនុស្សសម័យនោះយកមកប្រើប្រាស់ជាធម្មតាក្នុងជីវិតប្រចាំថ្ងៃក្នុងកម្រិតមួយដែលសម័យបច្ចុប្បន្នចាត់ទុកថាគ្រោះថ្នាក់បំផុត។ គេប្រើសារធាតុអាសេនិចទៅបង្កើតជាពណ៌បៃតងភ្លឺថ្លា ប្រើប្រាស់សម្រាប់គូរផ្ទាំងគំនូរ ផលិតផលក្រដាស ទៀន សាប៊ូ និងក្រណាត់ជាដើម។ នៅទីកន្លែងចុងក្រោយដែលទ្រង់បានភៀសខ្លួន មានតាំងនូវផ្ទាំងគំនូរក្នុងបន្ទប់ដែលមានជាតិអាសេនិច ហើយនៅពេលសីតុណ្ហភាពឡើងក្ដៅ ជាតិអាសេនិចនឹងរំភាយចេញពីផ្ទាំងគំនូរដែលប្រើប្រាស់ពណ៌បៃតងដែលមានសារធាតុអាសេនិចនេះ។
ដូច្នេះហើយដើម្បីបកស្រាយចម្ងល់ជាសកលមួយនេះ ក្នុងឆ្នាំ២០០៨អ្នកសិក្សារបស់អ៊ីតាលីមួយក្រុមបានធ្វើការពិសោធន៍លើសក់របស់ Napoleon ក្នុង៤ដំណាក់កាលនៃជីវិតរបស់ទ្រង់ ចាប់តាំងពីវ័យកុមារភាព អំឡុងពេលរស់នៅទីភៀសខ្លួន នៅពេលស្លាប់ និងក្រោយពេលស្លាប់។ មិនតែប៉ុណ្ណោះ ពួកគេក៏បានយកសក់របស់បុត្រា Napoleon ដែលជា Napoleonទី២ ព្រមទាំងភរិយារបស់បុត្រាទ្រង់មកពិសោធន៍ផងដែរ។ ក្រោយការពិសោធន៍ បានបង្ហាញថាសក់របស់ពួកគេសុទ្ធតែមានផ្ទុកនូវជាតិអាសេនិចក្នុងកម្រិតដ៏ខ្ពស់មួយប្រហាក់ប្រហែលគ្នាទាំងអស់។ ប៉ុន្តែអ្វីដែលជាភាពភ្ញាក់ផ្អើលនោះគឺ កម្រិតអាសេនិចក្នុងសក់របស់ពួកគេមាន១០០ដងច្រើនជាងសក់របស់មនុស្សរស់នៅធម្មតាបច្ចុប្បន្ន។
ការប៉ះពាល់នឹងសារធាតុពុលអាសេនិចអាចជាមូលហេតុសមហេតុផលមួយ ដែលអាចជាត្រីវិស័យចង្អុលបង្ហាញពីមូលហេតុនៃការស្លាប់របស់ព្រះចៅអធិរាជបារាំងរូបនេះ។ យ៉ាងណាមិញ វាអាចគ្រាន់តែជាចំណែករួមមួយផ្នែកប៉ុណ្ណោះ ព្រោះបើយោងតាមឯកសារដែលមានបន្សល់ពីគ្រូពេទ្យប្រចាំគ្រួសាររបស់ Napoleon គឺ Francesco Antommarchi បានបកស្រាយថានៅរយៈពេល៦ឆ្នាំចុងក្រោយនៃជីវិតរបស់ទ្រង់ គឺជាដំណាក់កាលដែលសុខភាពរបស់ទ្រង់ទន់ខ្សោយជាខ្លាំង មានការឈឺចាប់ធ្ងន់ធ្ងរក្នុងក្រពះ និងអាការៈក្អួតចង្អោរ បែកញើសពេលយប់ និងទ្រុឌទ្រោមបន្តិចម្ដងៗ។ វាជារោគសញ្ញាជំងឺម្យ៉ាងដែលសូម្បីតែអ្នកវិទ្យាសាស្ត្របច្ចុប្បន្នក៏គាំទ្រជាមួយគ្រូពេទ្យ Francesco ដែរនោះគឺជា មហារីកក្រពះ។
អ្នកសិក្សាជំនាន់ក្រោយក៏ពុំមែនចេះតែជឿដោយមិនមានការពិសោធន៍ជាក់ស្ដែងនឹងភ្នែកផ្ទាល់ដែរ ដូច្នេះហើយនៅក្នុងសារព័ត៌មាន Nature Gastroenterology and Hepatology បានធ្វើការពិសោធន៍ពិនិត្យមើលសាកសពរបស់ទ្រង់ ហើយអ្នកវិទ្យាសាស្ត្រក៏បានរៀបរាប់ថា៖ "ក្រពះនេះត្រូវបានផ្ទុកទៅដោយវត្ថុពណ៌ខ្មៅម្យ៉ាង ដែលស្រដៀងនឹងម្សៅកាហ្វេ ដែលវាជាការចង្អុលបង្ហាញដ៏មានទម្ងន់មួយថាមានការចេញឈាមនៅផ្នែកខាងលើនៃក្រពះ ដែលអាចជាមូលហេតុចម្បងនៃការស្លាប់"។ ការសិក្សាមួយជ្រុងទៀតដែលបានបន្ថែមភស្តុតាងដែលបញ្ជាក់ថាការស្លាប់របស់ទ្រង់គឺមកពីជំងឺមហារីកក្រពះនេះ គឺមានអ្នកស្រាវជ្រាវមួយក្រុមទៀតជឿថាខោរបស់បុរសអាចបញ្ជាក់ពីអាថ៌កំបាំងជាច្រើន។ ដូច្នេះហើយពួកគេក៏បានទៅសារមន្ទីរអឺរ៉ុបដើម្បីប្រមូលយកភស្តុតាងនេះមកសិក្សាស៊ីជម្រៅបន្ត។ ពួកគេទទួលបានខោចំនួន១២ដែលជារបស់ Napoleon ដែលក្នុងនោះមាន៨ដែលទ្រង់បានស្លៀកវានៅអំឡុងពេលរស់នៅភៀសខ្លួន។ របាយការណ៍របស់អ្នកស្រាវជ្រាវទាំងនោះបានបង្ហាញថា ៦ខែចុងក្រោយនៃជីវិតរបស់ទ្រង់ សង្កេតឃើញចង្កេះខោបានរួមពី៤៣អ៊ីញនៅសល់៣៨អ៊ីញ និងស្រកអស់៣០ផោននៅអំឡុងរយៈពេលប៉ុន្មានខែចុងក្រោយ។ ភស្តុតាងពីការសិក្សាទាំងនេះបង្ហាញពីទំនាក់ទំនងជាមួយជំងឺមហារីកក្រពះ ដែលមិនទាក់ទងអ្វីឡើយជាមួយរោគសញ្ញាពីការពុលជាតិអាសេនិច៕
ដោយ៖ ស្រីពៅ
