តើអ្វីជាវិប្បដិសារីធំបំផុតរបស់លោក ចេក ម៉ា ក្នុងនាមជាមហាសេដ្ឋីមានទ្រព្យរហូតដល់ជាង៣០ពាន់លានដុល្លារ?
លោកចេក ម៉ា ជាមហាសេដ្ឋីកំពូលរបស់ចិន និង ជានាយកប្រតិបត្តិរបស់ក្រុមហ៊ុនAlibaba ហើយបច្ចុប្បន្ននេះគឺមានទ្រព្យសម្បត្តិសរុបប្រមាណ ៣១,៤ពានលានដុល្លារអាមេរិក។
ថ្វីបើបានក្លាយជាមនុស្សដ៏អស្ចារ្យមួយក្នុងលោកក្ដី តែលោកនៅតែមានវិប្បដិសារីដ៏ធំក្នុងជីវិត នោះគឺការបង្កើតក្រុមហ៊ុនយក្ស Alibabaនេះតែម្ដង។ ហេតុអ្វីបានជា ក្លាយជាមនុស្សអស្ចារ្យតាមរយៈការបង្កើតក្រុមហ៊ុននេះ តែបែរជាមានការសោកស្ដាយព្រោះវាទៅវិញ?
«កំហុសដ៏ធំបំផុតក្នុងជីវិតរបស់ខ្ញុំ គឺការបង្កើតក្រុមហ៊ុន Alibaba។ ខ្ញុំមិនដែលគិតថា ការបង្កើតក្រុមហ៊ុននេះអាចផ្លាស់ប្ដូរពិភពលោកបាននោះទេ។ ខ្ញុំកាលនោះគ្រាន់តែព្យាយាមបង្កើតក្រុមហ៊ុនតូចមួយប៉ុណ្ណោះ តែវាបានរីកធំឡើង ហើយវាធ្វើឲ្យខ្ញុំមានការទទួលខុសត្រូវដ៏សែនធំ និង បញ្ហាជាច្រើនបានកើតឡើង»។ នេះជាសម្ដីរបស់លោកចេក ម៉ា ក្នុងកម្មវិធីវេទិកាសេដ្ឋកិច្ចពិភពលោក កាលពីឆ្នាំ២០១៦។
ក្នុងន័យនេះបញ្ជាក់យ៉ាងច្បាស់ថា ក្នុងនាមជាអ្នកដឹកនាំក្រុមហ៊ុនយក្សមួយនេះ គឺមិនមែនជារឿងងាយស្រួលនោះទេ ព្រោះលោកត្រូវមានទំនួលខុសត្រូវខ្ពស់បំផុត ដែលពេលខ្លះលោកបានចំណាយពេលយ៉ាងច្រើនលើសលប់ទៅលើវា ជាជាងផ្ដល់ភាពកក់ក្ដៅដល់គ្រួសារ ដែលធ្វើឲ្យជីវិតផ្ទាល់ ហាក់ដូចជាគ្មានភាពរីករាយនោះឡើយ។
មហាសេដ្ឋីរូបនេះ បានលើកឡើងថា បើសិនជាមានជាតិក្រោយមែន លោកមិនចង់ធ្វើជាអ្នកជំនួញ ជាពិសេសអ្នកជំនួញដ៏ធំបែបនេះឡើយ ព្រោះ រវល់ណាស់ ហត់ណាស់ ហើយគ្មានពេលក្នុងការរីករាយក្នុងជីវិតផ្ទាល់ខ្លួននោះឡើយ។ សូមបញ្ជាក់ថា មុនពេលបើកក្រុមហ៊ុននេះ លោក ចេក ម៉ាធ្វើធ្វើជាគ្រូបង្រៀនអង់គ្លេសម្នាក់ ក្នុងទសវត្សឆ្នាំ៩០ ហើយទោះបីជាទទួលបានប្រាក់ខែតិចមែន តែលោកពិតជារីករាយក្នុងជីវិតខ្លាំងណាស់៕
ដោយ៖ រតនា វិចិត្រ
