លោក George Lorimer៖ «វាពិតជាល្អ ដែលមានលុយហើយមានអ្វីៗដែលលុយអាចទិញបាន តែ...»
«វាពិតជាល្អ ដែលមានលុយហើយមានអ្វីៗដែលលុយអាចទិញបាន តែវារឹតតែល្អបើបានត្រួតពិនិត្យដើម្បីឲ្យប្រាកដថា អ្នកមិនបាត់បង់អ្វីដែលលុយមិនអាចទិញបាន» ។នេះ ជាការលើកឡើងរបស់លោក George Lorimer អតីតអ្នកនិពន្ធដ៏ល្បីរបស់អាមេរិក។ ក្នុងន័យនេះ លោកចង់បញ្ជាក់ថា មានលុយគឺ ពិតជាសំខាន់ ព្រោះលុយប្រើប្រាស់ដើម្បីទិញវត្ថុបានច្រើនយ៉ាង សម្រាប់បម្រើដល់ការរស់នៅរបស់មនុស្ស។ ប៉ុន្តែត្រូវប្រាកដថា អ្នករវល់តែជាមួយវត្ថុឬរបស់ដែលលុយអាចទិញបាន រហូតភ្លេចយកចិត្តទុកដាក់ចំពោះអ្វីៗដែលលុយទិញមិនបាន។
លុយ គឺជារបស់សំខាន់មួយដែលមនុស្សគ្រប់គ្នា ប្រឹងប្រែងដើម្បីវា ព្រោះបើគ្មានវាទេ ជីវិតនឹងជួបបញ្ហាច្រើនមិនខាន។ ប៉ុន្តែអ្វីដែលសំខាន់នោះ មនុស្សមួយចំនួនរវល់តែជាមួយលុយ ឬ អ្វីៗដែលលុយអាចទិញបាន រហូតភ្លេចគិតអំពីតម្លៃមហាសាលនៃអ្វីៗដែលលុយមិនអាចទិញបាន។ អ្វីក៏ដោយដែលលុយអាចទិញបាន គឺមិនទាន់មានតម្លៃខ្លាំងនៅឡើយ ។ វាអាចធ្វើឲ្យអ្នកសប្បាយចិត្តខ្លាំងមួយពេល ប៉ុន្តែវាគ្រាន់តែជាអារម្មណ៍បណ្ដោះអាសន្ន ដែលមិនអាចធ្វើឲ្យអ្នកមានអារម្មណ៍ថា មានសេចក្ដីសុខយូរអង្វែងនោះឡើយ ដូចជាឡាន ទូរស័ព្ទ និង របស់របរប្រើប្រាស់ផ្សេងៗទៀត បើទោះបីជាវាទំនើបប៉ុន្តែក៏ដោយ។
តើអ្វីជារបស់ដែលលុយមិនអាចទិញបាន? មានច្រើនណាស់ ដូចជា គ្រួសារជាទីស្រលាញ់របស់អ្នក មនុស្សជាទីស្រលាញ់ សុភមង្គល ក្ដីសុបិន ភាពស្មោះត្រង់ និង ជាពិសេសនោះសុខភាពរបស់អ្នក។ បើសិនអ្នកមួយថ្ងៃៗមានមោទនភាព ឬ កំពុងរវល់វីវក់ជាមួយអ្វីៗដែលលុយអាចទិញបាននោះ ថ្ងៃណាមួយអ្នកនឹងសោកស្ដាយមិនខាន នៅពេលអ្នកបាត់បង់អ្វីៗដែលលុយមិនអាចទិញបាន ព្រោះបើវាបាត់បង់ហើយ គ្មានឡើយថ្ងៃដែលអ្នកអាចយកវាមកវិញបាន។ ដូច្នេះស្របពេលដែលអ្នកកំពុងព្យាយាមរកលុយ ហើយកំពុងព្យាយាមចង់បានអ្វីដែលលុយអាចទិញបាន សូម្បីកុំបណ្ដោយខ្លួនរហូតបាត់បង់របស់ដ៏មានតម្លៃ ដែលលុយគ្មានតម្លៃស្មើឲ្យសោះ៕
ដោយ៖ រតនា វិចិត្រ
