ស៊ីរីមិនខ្ចីញញើត! យន្តហោះចាប់ផ្ដើមពង្រាយនៅមូលដ្ឋានទ័ពអាកាសដែលអាមេរិកបាញ់មីស៊ីលជិត ៦០គ្រាប់
ស៊ីរីពិតជាមិនញញើតអាមេរិកនោះឡើយព្រោះថាមូលដ្ឋានទ័ពអាកាសមួយកន្លែងដែលអាមេរិកបាញ់មីស៊ីល Tomahawk ៥៩គ្រាប់កម្ទេចនោះ ឥឡូវគេឃើញមានយន្តហោះមកដាក់ពង្រាយឡើងវិញ។ នេះបើយោងតាមសេចក្ដីរាយការណ៍ដោយ Business Insider។
យោងតាមមន្ត្រីក្រសួងការពារជាតិអាមេរិកពីររូប បានឱ្យដឹងថា យន្តហោះចម្បាំង Su-22 និង MiG-23 ត្រូវបានដាក់ពង្រាយនៅមូលដ្ឋានទ័ពអាកាស Shayrat និងផ្នែកផ្សេងទៀតនៃប្រទេសអំឡុងពេលប៉ុន្មានសប្ដាហ៍កន្លងទៅ។ ទោះជាយ៉ាងណា មិនទាន់មានការបញ្ជាក់ពីចំនួនយន្តហោះចម្បាំងសរុបដែលត្រូវបានដាក់ពង្រាយនោះទេ។
លោក James Mattis រដ្ឋមន្ត្រីក្រសួងការពារជាតិអាមេរិកបានប្រកាសនៅក្នុងសេចក្ដីថ្លែងការមួយកាលពីខែមេសា ថា ការវាយប្រហារដោយគ្រាប់មីស៊ីល ៥៩គ្រាប់នៅលើមូលដ្ឋានទ័ពអាកាសនោះបានបំផ្លាញមូលដ្ឋានទ័ពអាកាសរបស់រដ្ឋាភិបាលស៊ីរីអស់ ២០%។
សូមបញ្ជាក់ថា ការវាយប្រហារដោយមីស៊ីលនេះ គឺបន្ទាប់ពីសហរដ្ឋអាមេរិកចោទប្រកាន់ថា រដ្ឋាភិបាលស៊ីរីបានសម្លាប់ប្រជាជនប្រមាណ ៨០នាក់ក្នុងនោះមានក្មេងភាគច្រើនដោយប្រើអាវុធគីមីនៅខេត្ត Idlib៕
ដោយ៖ យោធិន
