ក្នុងតំបន់អាស៊ាន កម្ពុជាតែមួយគត់ ទទួលបានពានរង្វាន់ប្រាក់ពី “ពិព័រណ៍ពិភពលោកឆ្នាំ២០១៥”
ក្នុងតំបន់អាស៊ានមានតែប្រទេសកម្ពុជាមួយគត់ ដែលទទួលបានពានរង្វាន់ប្រាក់មួយគ្រឿង ពីកម្មវិធី ពិព័រណ៍ពិភពលោកឆ្នាំ២០១៥ នៅទីក្រុងមីឡង់ ប្រទេសអ៊ីតាលីដែលបានបញ្ចប់ទៅកាលពីប៉ុន្មានខែមុន។
កាលពីថ្ងៃទី២៤ ខែធ្នូ ឆ្នាំ២០១៥ កន្លងទៅ នៅទីស្តីការក្រសួងពាណិជ្ជកម្ម ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មការអន្តរក្រសួងកម្ពុជាដើម្បីចូលរួមក្នុង “ពិព័រណ៍ពិភពលោកឆ្នាំ២០១៥” នៅប្រទេសអ៊ីតាលី បានរៀបចំសន្និសីទសារព័ត៌មានស្តីអំពីប្រទេសកម្ពុជាទទួលបានពានរង្វាន់ប្រាក់។ ឯកឧត្តមទេសរដ្ឋមន្ត្រី ស៊ុន ចាន់ថុល បានសម្តែងនូវការអបអរសាទរចំពោះ គណៈកម្មការអន្តរក្រសួង អ្នករៀបចំពិព័ណ៌ សិល្បៈករសិល្បៈការនីសម្តែង និងប្រជាជនកម្ពុជារស់នៅអឺរ៉ុប ដែលបានខិតខំប្រឹងប្រែងយ៉ាងខ្លាំងក្លា និងគាំទ្រដល់ការធ្វើឲ្យកម្ពុជាបានចូលរួមក្នុងពិព័រណ៍ពិភពលោក ទទួលបានជោគជ័យបែបនេះ។ នៅក្នុងការតាំងពិព័រណ៍នេះ មានការចូលរួមប្រកួតប្រជែងជាមួយ ៩១ប្រទេស ហើយកម្ពុជាជាប្រទេសតែមួយគត់ក្នុងតំបន់អាស៊ានមានមោទនភាពទទួលបាននូវពានរង្វាន់ប្រាក់ ០១គ្រឿង(Silver Award) ពីគណៈកម្មការរៀបចំពិព័រណ៍ពិភពលោក និងការិយាល័យពិព័រណ៍អន្តរជាតិ (BIE) នៅក្នុងការរចនាពន្លាជាតិសម្រាប់ការអភិវឌ្ឍគំនិតច្នៃប្រឌិតក្រោមប្រធានបទ៖ “ចិញ្ចឹមភពផែនដី ផ្តល់ថាមពលសម្រាប់ជីវិត”។
សូមបញ្ជាក់ថា ពិព័រណ៍នេះត្រូវបានរៀបចំឡើងចាប់ពីថ្ងៃទី០១ ខែឧសភា ដល់ថ្ងៃទី៣១ ខែតុលា ឆ្នាំ២០១៥។ ព្រះពន្លាជាតិកម្ពុជាបានទទួលស្វាគមន៍អ្នកចូលរួមទស្សនាពិព័រណ៍ជាង ២ លាននាក់ សម្រាប់រយៈពេលប្រាំមួយខែ នៅក្នុងការតាំងពិព័រណ៍ នៅទីក្រុងមីឡង់ ប្រទេសអ៊ីតាលី៕
ដោយ៖ រតនៈវិភូ
