តើហាងឆេងមាសនៅឆ្នាំ២០១៦ នឹងទៅជាយ៉ាងណា? លោកអ្នកគួរទិញទុកទេ?
ធនាគារ HSBC បានថ្លែងកាលពីចុងខែវិច្ឆិកា កន្លងទៅថា មាសនឹងមានហាងឆេងឡើងវិញនៅឆ្នាំក្រោយ បន្ទាប់ពីធ្លាក់ចុះក្នុងរយៈពេលប៉ុន្មានឆ្នាំចុងក្រោយនេះ។
ធនាគារដ៏ធំក្នុងលោកមួយនេះ បានយល់ឃើញថា តម្លៃមាសគិតជាមធ្យមឆ្នាំនេះ គឺ ១១៦០ដុល្លារក្នុងមួយអោន (៨ជី៣ហ៊ុន) ប៉ុន្តែនៅឆ្នាំក្រោយអាចនឹងកើនដល់ ១២០៥ដុល្លារ និងនៅឆ្នាំ២០១៧ នឹងកើនដល់ ១៣០០ដុល្លារ។ ធនាគារបានឱ្យដឹងទៀតថា តម្លៃមាស អាចនឹងកើននៅក្នុងចន្លោះពី ១០២៥ដុល្លារ ដល់ ១២៧៥ដុល្លារនៅឆ្នាំ២០១៦។
កត្តាមួយចំនួនដែលធ្វើឱ្យតម្លៃមាសកើនឡើងបើផ្អែកតាមការវិភាគរបស់អ្នកជំនាញធនាគារដដែល។
១) តម្រូវការនៅទីផ្សារកំពុងលូតលាស់ បានកំណត់តម្លៃទាបបំផុត (price floor) រួចទៅហើយ។ ការទិញមាសពីឥណ្ឌា និងចិនដែលបូកចូលគ្នាស្មើនឹង ២ភាគ៣នៃការប្រើគ្រឿងអលង្ការនិងមាសគីឡូពិភពលោកលោក នឹងកើនឡើងនៅឆ្នាំក្រោយ។ ២) ទោះជាចិនមានកំណើនសេដ្ឋកិច្ចទាបជាងមុន ប៉ុន្តែប្រាក់ចំណូលប្រជាជនប្រទេសនេះនឹងបន្តកើនឡើង ដែលនឹងធ្វើឱ្យតម្រូវការទិញកើនឡើងដែរ។ ៣) រដ្ឋាភិបាលឥណ្ឌាបានដាក់ចេញវិធានការថ្មីពាក់ព័ន្ធនឹងការនាំចូលមាស Gold Monetization Scheme តែប្រហែលមិនធ្វើឱ្យប៉ះពាល់ដល់តម្រូវការនោះទេ៕
ដោយ៖ រតនៈវិភូ
