អតីតប្រធានាធិបតីអាមេរិក លោក ចន អាដាម ៖ «ព្យាយាមហើយបរាជ័យមិនអីទេ កុំឲ្យតែបរាជ័យក្នុងការព្យាយាម»
«ព្យាយាមហើយបរាជ័យមិនអីទេ កុំឲ្យតែបរាជ័យក្នុងការព្យាយាម» ។ នេះជាពំនោលរបស់លោក ចន អាដាម ( John Adams ) ដែលជាអតីតប្រធានាធិបតីអាមេរិក (ទី៦)។ ក្នុងន័យនេះ លោកចង់បញ្ជាក់ថា បើអ្នកព្យាយាមហើយ នៅតែបរាជ័យ នោះវាមិនមែនជារឿងប្លែក ឬ រឿងអាក្រក់អ្វីដែលគួរបារម្ភនោះទេ តែបើអ្នកមិនព្យាយាមធ្វើអ្វីមួយទាល់តែសោះ នោះហើយជាបញ្ហា។
គ្មាននរណាម្នាក់ដែលអាចគេចផុតពីពាក្យថា «បរាជ័យ»នោះឡើយ ឬ មិនធ្លាប់ខុស ព្រោះមនុស្សមិនមែនជាទេវតា។ បើគេសង្កេតមើលបុគ្គលដែលជោគជ័យធំៗក្នុងលោក គឺគ្មានម្នាក់ណាដែលអះអាងថា ខ្លួនមិនដែលបរាជ័យសោះក្នុងមួយជីវិតរបស់ខ្លួននោះឡើយ ហើយអ្នកខ្លះទៀតពាក្យថា បរាជ័យនេះគឺកើតឡើងសឹងរាប់ភ្លេចទម្រាំសម្រេចអ្វីដែលខ្លួនចង់បាន។
បើសូម្បីតែពួកអ្នកប្រាជ្ញ និងបុគ្គលជោគជ័យល្បីៗក្នុងលោក គេចមិនផុតផង ចុះទម្រាំមនុស្សទូទៅ។ មនុស្សខ្លះព្រោះតែខ្លាចបរាជ័យ គឺធ្វើអ្វីក៏មិនហ៊ានដោយខ្លាចនេះខ្លាចនោះ រហូតមួយថ្ងៃកន្លងផុតទៅ ហើយរយៈកាលមួយខែក៏ចូលមកបញ្ចប់ដែរ ហើយបាំងតែភ្នែក រយៈពេលមួយ១ឆ្នាំ ១០ឆ្នាំ ក៏កន្លងផុតទៅ។ ចុងក្រោយគឺ ជីវិតហាក់គ្មានខ្លឹមអ្វីទាំងអស់ ព្រោះមិនបានព្យាយាមធ្វើអ្វីមួយទាល់តែសោះ។
ការរស់នៅក្នុងជីវិតបែបនេះ មិនមែនជាផ្លូវដែលមនុស្សយើងគួរដើរនោះទេ ព្រោះជីវិតគឺមានតែមួយ បើជ្រុលតែកើតមកលើផែនដីនេះហើយ គឺត្រូវប្រើវាឲ្យអស់ពីលទ្ធភាព មុនពេលយើងត្រឡប់ទៅរកប្រភពដើមវិញ៕
ដោយ៖ រតនា វិចិត្រ
