សុភាសិតចិន៖ «ពេលវេលា ជាមាសប្រាក់ តែលុយមិនអាចទិញពេលវេលាបានឡើយ»
«ពេលវេលា ជាមាសប្រាក់ តែមាសប្រាក់មិនអាចទិញពេលវេលាបានឡើយ»។ នេះជាសុភាសិតរបស់ប្រទេសចិន ដែលចង់បង្ហាញពីតម្លៃដ៏ខ្ពង់ខ្ពស់របស់ពេលវេលាដែលយើងមិនអាចយកអ្វីមកប្រៀបបានដោយងាយ។
មនុស្សមួយចំនួន តែងតែនិយាយថា ខ្លួនកើតមកគឺមិនដឹងថា យ៉ាងម៉េចទេ ព្រោះមិនដែលជោគជ័យអ្វីសោះ។ ប៉ុន្តែរឿងមួយកើតឡើង វាមិនដែលប្រាសចាកពីហេតុនោះឡើយ ពោលគឺ មិនមែនសុខៗវាកើតឡើងបែបហ្នឹងទេ។ បើយើងព្យាយាមសម្លឹងមើលសកម្មភាពរបស់មនុស្សទាំងនោះ យើងឃើញថា ពួកគេមិនចេះប្រើប្រាស់ពេលវេលា ឬ មិនសូវឲ្យតម្លៃពេលវេលានោះទេ អ៊ីចឹងហើយ ពេលវេលាចេះតែកន្លងផុតទៅយ៉ាងឥតប្រយោជន៍។
ដោយឡែកមនុស្សដែលឲ្យតម្លៃលើពេលវេលាវិញ គឺដឹងច្បាស់ថា មួយថ្ងៃគឺមានតែ២៤ម៉ោងប៉ុណ្ណោះ ដូច្នេះហើយពួកគេនឹងព្យាយាមឲ្យអស់ពីលទ្ធភាព ដើម្បីច្នៃពេលដែលមាននោះដើម្បីសម្រេចការងារសំខាន់ៗ។ អ៊ីចឹងហើយលទ្ធផលគឺចេញមកវិជ្ជមានតែម្តង។ ពេលវេលា ជាមាសប្រាក់ មានន័យថា បើអ្នកចេះគ្រប់គ្រងពេលវេលាឲ្យបានល្អ និង ប្រើវាឲ្យមានប្រសិទ្ធភាពនោះ វានឹងជួយឲ្យអ្នកទទួលបានមាសប្រាក់ និង លាភសក្ការៈជាច្រើន។
ត្រូវចាំថ្ងៃ ត្បិតពេលវេលា មានន័យស្មើនឹងមាសប្រាក់ ប៉ុន្តែយើងមិនដោយអាចយកមាសប្រាក់ទៅប្រៀបនឹងពេលវេលាបានឡើយ ព្រោះថា បើពេលវេលាកន្លងផុតហើយ គឺមានន័យថា ចប់ហើយ ដោយមិនអាចយកមាសប្រាក់ទៅទិញវា ឬ ទាញពេលវេលាឲ្យត្រលប់ក្រោយឡើយ៕
ដោយ៖ រតនា វិចិត្រ
