ក្រុមហ៊ុន HTC បានប្រកាសចេញស្មាតហ្វូនជំនាន់ថ្មីរបស់ខ្លួនម៉ូដែល U11 ជាផ្លូវការហើយ ដែលភ្ជាប់លក្ខណៈសម្បត្តិទំនើប ក្នុងនោះមាន Edge Sense ដែលអាចច្របាច់គែមអេក្រង់ ដើម្បីដំណើរការកម្មវិធីផ្សេងៗនៅលើស្មាតហ្វូនបាន។ វាជាសមាជិកថ្មីក្នុងត្រកូលស្មាតហ្វូន U ដែលកន្លងមកមានម៉ូដែល U Ultra និង U Play រួចហើយ តែក៏អាចជាទាយាទបន្តពី HTC 10 ស្មាតហ្វូនជោគជ័យកាលពីឆ្នាំមុនផងដែរ។
U11 ភ្ជាប់មកជាមួយមុខងារឆ្លាតវៃ Edge Sense គឺច្របាច់គែមអេក្រង់អាចដំណើរការកម្មវិធីនៅលើទូរស័ព្ទ ឧទាហរណ៍ដូចជា ការថតរូប ដោយគ្រាន់តែកាន់ច្របាច់គែមអេក្រង់ក៏បាន។ អ្នកអាចកំណត់លើកម្រិតសម្ពាធ ធ្ងន់ស្រាល នៃការច្របាច់ដើម្បីទទួលស្គាល់មុខងារ Edge Sense ឱ្យកើតឡើង។
តាមពិតមានមុខងារស្រដៀងនេះ គឺ Sense Companion ដំបូងនៅលើស្មាតហ្វូន U Ultra រួចមកហើយ ហើយឥឡូវក៏នឹងមាននៅលើ U11 ផងដែរ។ U11 ត្រូវសម្ពោធចេញអមមកជាមួយមុខងារ Google Assistant នៅក្នុងនោះរួចជាស្រេច។ ស្មាតហ្វូននេះ ក៏គាំទ្រមុខងារថតសំឡេង ៣៦០ដឺក្រេ real-life recording ជាការថតសំឡេងលក្ខណៈ 3D audio ដោយប្រើប្រាស់នូវរន្ធស្រូបសំឡេង (មៃក្រូហ្វូន) ចំនួន៤។ និយាមរួម U11 គឺជាស្មាតហ្វូនទំនើប ផ្ដល់គុណភាពផ្នែកសំឡេងកម្រិត Hi-Res Audio និង BoomSound Hi-Fi Edition ដូច HTC 10។
HTC U11 បំពាក់ជាមួយឈីបជំនាន់ចុងក្រោយសមត្ថភាពខ្លាំង Snapdragon 835 មាន RAM 4GB អមជាមួយមេម៉ូរី 64GB ហើយក៏អាចបន្ថែម microSD បានទៀត។ ក្រុមហ៊ុន HTC បានផ្ដល់ជម្រើស U11 មាន RAM 6GB និងមេម៉ូរី 128GB មួយទៀត។ អេក្រង់របស់វាមានទំហំ ៥,៥អ៊ីញ QHD super LCD 5 ប្រើកញ្ចក់ការពារ Gorilla Glass 5។ កាមេរ៉ាក្រោយរបស់វាមានទំហំ 12MP អមដោយបច្ចេកវិទ្យា UltraPixel ជាមួយ 1.4 micro pixel កម្រិត f/1.7 aperture និងមុខងារ OIS មានភ្លើង dual-LED flash និងអាចថតវីដេអូកម្រិត 4K។ វាក៏មានមុខងារថតវីដេអូយឺតៗ slow motion ក្នុងកម្រិត 1080p នៅ 120fps។ រីឯកាមេរ៉ាមុខរបស់វាទំហំ 16MP ដែលអាចថតវីដេអូកម្រិត 1080p Full HD ក៏ដូចជាអាចថតក្នុងទម្រង់ Selfie Panorama។ HTC U11 មានរន្ធ USB Type-C, Bluetooth 4.2, Wi-Fi 802.11ac, NCF, GPS, Glonass និង Beidou ប៉ុន្តែគ្មានរន្ធកាស 3.5mm ឡើយ។ U11 ជាស្មាតហ្វូនស៊ីម១ ហើយក៏មានម៉ូដែលស៊ីម២ ផងដែរ។
HTC U11 មានកម្លាំងថ្ម 3000mAh អមដោយបច្ចេកវិទ្យាសាកថ្មលឿន Quick Charge 3.0 របស់ Qualcomm ក៏មានទម្រង់សន្សំសំចៃថ្មពីរម៉ូត (power saving mode)។ វាដំណើរការដោយប្រព័ន្ធប្រតិបត្តិការ Android 7.1 Nougate ជាមួយសូហ្វ៊ែរ UI HTC Sense។ ស្មាតហ្វូនស៊េរីថ្មីរបស់ក្រុមហ៊ុនតៃវ៉ាន់ HTC នេះ មានបច្ចេកវិទ្យាមិនចូលទឹកស្តង់ដារ IP67។
HTC U11 នឹងមានលក់ជាមួយជម្រើសពណ៌ដូចជា ពណ៌ប្រាក់ ខៀវ ខ្មៅ ពណ៌ស និងពណ៌ក្រហម ដែលនឹងវត្តមាននៅលើទីផ្សារពិភពលោកចាប់ពីខែឧសភានេះ ជាមួយតម្លៃប្រហែល ៨៣០ដុល្លារអាមេរិក៕
ប្រែសម្រួល៖ រឹទ្ធិរាជ
ប្រភព៖ gsmarena
