​ទីភ្នាក់ងារ​សម្ងាត់​ CIA ​របស់​សហរដ្ឋ​អាមេរិក​​បាន​បង្កើត​មជ្ឈមណ្ឌល​មួយ​ដែល​មាន​បេសកកម្ម​​ផ្ដោត​ទៅ​លើ​កម្មវិធី​​ទំនើបកម្ម​នុយក្លេអ៊ែរ​របស់​​ប្រទេស​កូរ៉េខាងជើង។ នេះ​បើ​យោង​តាម​​ការ​ប្រកាស​ពី​ទីភ្នាក់ងារ​ខាង​លើ​នៅ​ថ្ងៃ​ពុធ​នេះ។ លោក​ Mike Pompeo ​នាយក​ CIA ​បាន​​ថ្លែង​នៅ​ក្នុង​សេចក្ដី​ប្រកាស​ព័ត៌មាន​​​ ដូច្នេះ​ថា​ ៖«ការ​បង្កើត​មជ្ឈមណ្ឌល​​មាន​បេសកកម្ម​ផ្ដោត​ទៅ​លើ​កូរ៉េ (The Korea Mission Center) ​អនុញ្ញាត​ឱ្យ​យើង​​ប្រមូល​ផ្ដុំ​ និង​កំណត់​ទិសដៅ​នៃ​កិច្ច​ខិតខំ​ប្រឹងប្រែង​​របស់​ CIA ​ប្រឆាំង​នឹង​ការ​គំរាម​កំហែង​ដល់​សហរដ្ឋ​អាមេរិក​​ និង​ប្រទេស​សម្ព័ន្ធមិត្ត​ពី​កូរ៉េខាងជើង។ ​វា​ក៏​ឆ្លុះ​បញ្ចាំង​ឱ្យ​ឃើញ​ពី​ថាមភាព​ និង​កម្លាំង​ដែល​ CIA ​​ពាំនាំ​ចំពោះ ការ​ដោះ​ស្រាយ​បញ្ហា​សន្តិសុខ​ជាតិ»។ ​មន្ត្រី​ជើង​ចាស​ CIA ម្នាក់​ត្រូវ​បាន​តែង​តាំង​ជា​​ដើម្បី​ដឹក​នាំ​មជ្ឈមណ្ឌល​ថ្មី​នេះ ​ប៉ុន្តែ​ទីភ្នាក់ងារ​មិន​បាន​បញ្ជាក់​ឈ្មោះ​នោះ​ទេ។ ការ​​បង្កើត​​​មជ្ឈមណ្ឌល​​ថ្មី​នេះ​ឡើង​ គឺ​បន្ទាប់​ពី​មាន​ការ​ប្រឈម​មុខ​ដាក់​គ្នា​រវាង​កូរ៉េខាងជើង​ និង​សហរដ្ឋ​អាមេរិក​ជុំវិញ​ការ​សាកល្បង​ និង​កម្មវិធី​នុយក្លេអ៊ែរ​របស់​កូរ៉េខាងជើង៕​​