​លទ្ធផល​ហិរញ្ញវត្ថុ​ សម្រាប់​របាយការណ៍​សារពើពន្ធ​នៅ​ត្រីមាស​ទិ២ ឆ្នាំ២០១៧ របស់ Apple ត្រូវ​បាន​ប្រកាស​ហើយ ដោយ​ក្រុមហ៊ុន​អាមេរិក​នេះ អាច​លក់​ទូរស័ព្ទ iPhone សរុប​បាន ៥០,៧លាន​គ្រឿង។ បើ​ងាក​មក​មើល Samsung វិញ ក្រុមហ៊ុន​ទូរស័ព្ទ​កូរ៉េ​នេះ អាច​លក់​ស្មាតហ្វូន Galaxy S7 / S7 edge របស់​ខ្លួន​ដាច់​បាន ៥៥លាន​គ្រឿង។

ផ្អែក​តាម​របាយការណ៍​របស់​ក្រុមហ៊ុន​វិភាគ​ទីផ្សារ Strategy Analytics ឱ្យ​ដឹង​ថា ​ក្រុមហ៊ុន Samsung បាន​ក្ដោបក្ដាប់​តួលេខ​លក់​ស្មាតហ្វូន​កំពូល​របស់​ខ្លួន S7/ S7 edge ​បាន​ចំនួន ៥៥លាន​គ្រឿង រាប់​ចាប់តាំង​ពី​ពេល​ចេញ​លក់ មក​ដល់​ពេល​នេះ។ ចំណែក តួលេខ ៥០,៧លាន​គ្រឿង​ដែល Apple ក្ដាប់​បាន​វិញ គឺ​មាន​ការ​ធ្លាក់​ចុះ ប្រៀបធៀប​នឹង​ការ​លក់ iPhone នៅ​ត្រីមាស​ដដែល​កាលពី​ឆ្នាំ២០១៦ ដែល​ក្រុមហ៊ុន​លក់​បាន ៥១,២លាន​គ្រឿង។

របាយការណ៍​ដដែល​ឱ្យ​ដឹង​ទៀត​ថា ក្រុមហ៊ុន Apple បាន​គ្រប់គ្រង​ចំណែក​ទីផ្សារ​លក់​ថេប្លេត iPad របស់​ខ្លួន​បាន​ចំនួន ៨,៩២លាន​គ្រឿង​ផង​ដែរ ដែល​ជា​តួលេខ​ថយ​ចុះ​ផង​ដែរ ប្រៀបធៀប​នឹង ១០,២លាន​គ្រឿង​នៅ​ត្រីមាស​ដដែល កាលពី​ឆ្នាំ​២០១៦។ លោក Tim Cook ​នាយក​ប្រតិបត្តិ Apple បាន​លើកឡើង​ថា “យើង​មាន​មោទនភាព​ចំពោះ​ភាព​រឹងមាំ​នៃ​របាយការណ៍​សារពើពន្ធ​ត្រឹម​ខែ​មីនា ដែល​មាន​ប្រាក់​ចំណូល​កើន​ឡើង​ប្រៀបធៀប​ត្រីមាស​ខែ​ធ្នូ ហើយ​បាន​បន្ត​រឹងមាំ​ថែមទៀត​ដោយ​វត្តមាន iPhone 7 Plus។”

"យើង​បាន​មើល​ឃើញ​ភាព​ពេញចិត្ត​របស់​អតិថិជន ទៅ​លើ​ម៉ូដែល iPhone 7 ​ថ្មី​ពណ៌​ក្រហម Special Edition ​ហើយ​យើង រំភើប​ចិត្ត​ចំពោះ​ជំនួញ​ផ្នែក​សេវាកម្ម​របស់​យើង​ ក៏​រក​ប្រាក់​ចំណូល​បាន​ខ្ពស់​ផង​ដែរ នៅ​ត្រីមាស​រយៈពេល ១៣សប្ដាហ៍​កន្លង​មក​នេះ។ យើង​ក៏​រំភើប ត្រៀម​ស្វាគមន៍​សន្និសីទ​អ្នក​អភិវឌ្ឍ​កម្មវិធី WWDC ​នៅ​ខាង​ក្រោយ ក្នុង​ទីក្រុង San Jose។" ការ​លក់​កុំព្យូទ័រ Mac ​គឺ​កើន​ដល់ ៤,១៩​លាន​គ្រឿង ប្រៀបធៀប​នឹង​ត្រីមាស​ដដែល​ឆ្នាំ​មុន ដែល​លក់​បាន​ត្រឹម ៤,០៣លាន​គ្រឿង ហើយ​ចំណូល​បាន​ពី​សេវាកម្ម​ក៏​មាន​ការ​កើនឡើង ១៨% ​ផង​ដែរ ដោយ​អាច​រក​ប្រាក់​ចំណូល ៧,០៤ពាន់​លាន​ដុល្លារ។ ងាក​មក​មើល​របាយការណ៍​លក់​ស្មាតហ្វូន Galaxy S7/ S7 edge ​របស់ Samsung នៅ​ត្រីមាស​ទី១ វិញ គឺ​អាច​លក់​បាន​ចំនួន ៧,២លាន​គ្រឿង។ ចំពោះ​តួលេខ​លក់​ទូរស័ព្ទសរុប​​គ្រប់​ម៉ូដែល របស់​ក្រុមហ៊ុន​អេឡិចត្រូនិក​យក្ស​កូរ៉េ​ខាង​ត្បូង​នេះ គឺ​លក់​បាន ៩២,៨​លាន​គ្រឿង (ខែ​មករា ដល់ មីនា) ​ហើយ​ក្នុង​នោះ​មាន ៨០លាន​គ្រឿង​ជា​ប្រភេទ​ទូរស័ព្ទ​ស្មាតហ្វូន (Smartphone)។ បើ​គិត​ជា​អត្រា​ចំណែក​ទីផ្សារ​ពិភពលោក​វិញ គឺ​ស្មើ​នឹង ២៣% ដែល Samsung អាច​ក្ដាប់​បាន៕ ​ប្រែ​សម្រួល៖ រឹទ្ធិរាជ ប្រភព៖ Apple, Techmeme, theinvestor.co.kr