ស្ថាបនិក Amazon លោក Jeff Bezos៖ «បើអ្នកមិនយល់ច្បាស់អំពីជំនួញរបស់ខ្លួនទេ នោះអ្នកនឹងបរាជ័យ»
«បើអ្នកមិនយល់ច្បាស់អំពីជំនួញរបស់ខ្លួនទេ នោះអ្នកនឹងបរាជ័យ» ។ នេះជាសម្ដីរបស់លោក Jeff Bezos ដែលជាមហាសេដ្ឋី និង ជាស្ថាបនិករបស់ក្រុមហ៊ុនAmazon។ ក្នុងន័យនេះ លោកចង់បញ្ជាក់ថា ការស្គាល់ច្បាស់ និង យល់ច្បាស់អំពីជំនួញរបស់ខ្លួនឯង គឺជាប្រភពដែលនាំទៅរកភាពជោគជ័យ។
មានមនុស្សជាច្រើន បានបើកជំនួញ ហើយអ្នកខ្លះបើកជំនួញដោយសារតែខ្លួនស្រលាញ់ តែអ្នកខ្លះវិញគឺដោយសារតែឃើញអ្នកដទៃធ្វើទៅជោគជ័យ។ ក្នុងចំណោមមនុស្ស១០នាក់ដែលបើកជំនួញ គឺមាន៧ទៅ៨នាក់ទៅហើយ ដែលបរាជ័យ។ ការបរាជ័យនេះ គឺ ដោយសារតែវាមិនមែនជាអ្វីដែលខ្លួនស្រលាញ់ពិតប្រាកដ ពោលគឺគ្រាន់តែឃើញគេជោគជ័យ ក៏ចង់ធ្វើតាមគេដែរ ដោយភ្លេចគិតថា ខ្លួនជានរណា ហើយស្រលាញ់ឬ ពេញចិត្តប្រភេទអាជីវកម្មនោះឬ អត់ ហើយមិនបានគិតថា ត្រូវធ្វើដូចម្តេចដើម្បីធ្វើឲ្យផលិតផល ឬសេវាកម្មល្អ ឬប្លែកជាងអ្នកដទៃ។
ការយល់ច្បាស់អំពីជំនួញរបស់ខ្លួន គឺពិតជាសំខាន់ខ្លាំងណាស់ ព្រោះថា បើអ្នកបានចំណាយពេលដើម្បីសិក្សាពីវាឲ្យបានច្បាស់មុនពេលបើកនោះ វានឹងជួយឲ្យអ្នកមានតម្រុយច្រើន ក្នុងការបោះជំហានទៅមុខ ហើយបើទោះបីជាជួបបញ្ហាលំបាកប៉ុណ្ណាក៏ នៅតែអាចបន្តដំណើរទៅមុខបាន។ ប៉ុន្តែសម្រាប់មនុស្សដែលមិនយល់ និង ស្គាល់ច្បាស់អំពីការធ្វើជំនួញនោះ គឺពិតជាងាយក្នុងការបរាជ័យខ្លាំងណាស់ ព្រោះវាប្រៀបបាននឹងដើរចូលក្នុងព្រៃដ៏ជ្រៅដោយមិនដឹងទិសដៅនៅឯណា។
ដូច្នេះហើយ បើអ្នកចង់ធ្វើជំនួញមែន ត្រូវតែចំណាយពេលសិក្សាពីវា ទោះបីជាចំណាយពេលយូរបន្តិចក្ដី។ ដើរយឺតបន្តិចក៏មិនអីដែរ វាប្រសើរជាងដើរទៅហើយដួល ដែលនាំឲ្យមានគ្រោះថ្នាក់ធ្ងន់ធ្ងរ៕
អត្ថបទល្អៗផ្សេងទៀត៖ សុភាសិតអ៊ីស្រាអែល៖«បើអ្នកមិនទាន់ឃើញនឹងភ្នែក សូមកុំទាន់និយាយ» ប្រធានាធិបតីអាមេរិកលោកTheodore Roosevelt៖ «បើជឿថាអ្នកអាចធ្វើបាន មានន័យថា អ្នកជោគជ័យបានពាក់កណ្ដាលហើយ»
ដោយ៖ រតនា វិចិត្រ
