មហាសេដ្ឋីចិន លោក ចេក ម៉ា៖ «ប្រសិនបើអ្នកមិនធ្វើទេ ស្អីក៏មិនអាចទៅរួចដែរ»
«ប្រសិនបើអ្នកមិនធ្វើទេ ស្អីក៏មិនអាចទៅរួចដែរ»។ នេះជាសម្ដីរបស់លោកចេក ម៉ា ដែលគ្រប់គ្នាស្គាល់ច្បាស់ថា ជាអ្នកមានផុតលេខនៅចិន ដែលវិវត្តខ្លួនចេញពីជនសាមញ្ញមួយរូប ហើយធ្លាប់ត្រូវបានគេសើចចំអកលើគំនិត និងផែនការអាជីវកម្មរបស់ខ្លួន។ ក្នុងន័យន័យនេះ លោកចង់បញ្ជាក់ថា បើគ្មានការតស៊ូដើម្បីធ្វើទេនោះ កុំសង្ឃឹមថា បានសម្រេចកិច្ចការអ្វីឲ្យសោះ។
កាលពីមុន ជាពិសេសក្នុងទសវត្សឆ្នាំ៩០ គឺគ្មាននរណាម្នាក់គិតថា លោកចេក ម៉ា ដែលជាបុរសសំគមល្អិតនេះ មានវាសនាអាចធ្វើឲ្យគំនិតអាជីវកម្មរបស់ខ្លួនជោគជ័យនោះឡើយ ហើយការក្លាយខ្លួនទៅជាមហាសេដ្ឋី គឺរឹតតែអត់សង្ឃឹមទៅទៀត។ អ្នកដទៃគិតយ៉ាងណា គឺមិនសំខាន់ពេកនោះទេ តែអ្វីដែលសំខាន់នោះ គឺលោក ចេក ម៉ាមិនបាននៅស្ងៀម ឬ មិនបានទោរទន់ទៅតាមពាក្យសម្ដីរបស់អ្នកដទៃនោះឡើយ ពោលគឺនៅតែបន្តធ្វើកិច្ចការដែលខ្លួនគិតថា អាចទៅរួច ហើយនឹងជោគជ័យនៅថ្ងៃណាមួយ ទោះបីជាមិនធ្លាប់គិតថា នឹងអាចក្លាយជាអ្នកមានផុតលេខនៅចិនក៏ដោយ។
ការជម្នះ និង បន្តធ្វើការងារដែលខ្លួនយល់ថា ត្រឹមត្រូវ និង អាចសម្រេចបែបនេះហើយ ទើបធ្វើឲ្យវាសនារបស់លោកបានផ្លាស់ប្ដូរទាំងស្រុង បើទោះបីជារយៈពេលប្រហែល៣ឆ្នាំដំបូងនៃអាជីវកម្មរបស់លោកចេក ម៉ា មិនទទួលបានប្រាក់ចំណូលសមប្រកបក៏ដោយ តែអ្វីដែលសំខាន់នោះ គឺការមិនបោះបង់ ទើបធ្វើឲ្យលោកមានថ្ងៃនេះ។ ប្រសិនបើលោកទោរទន់ទៅតាមពាក្យសម្ដីរបស់អ្នកដទៃ ហើយមិនព្រមបន្តអាជីវកម្មរបស់ខ្លួនទេនោះ ម្ល៉េះគ្មានឈ្មោះ ចេក ម៉ា ដែលត្រូវបានពិភពលោកស្គាល់ និង កត់ត្រាទុកក្នុងប្រវត្តិសាស្ត្រនោះឡើយ។
ដូច្នេះហើយ នេះជាមេរៀនមួយដ៏សំខាន់ដែលយើងគួរតែរៀនសូត្រ ព្រោះបើយើងមិនព្រមធ្វើអ្វីមួយទេ នោះកុំសង្ឃឹមថា មានរឿងល្អ ឬ រឿងអស្ចារ្យណាមួយកើតឡើងក្នុងជីវិតឲ្យសោះ៕ អត្ថបទល្អៗផ្សេងទៀត៖ ជូគឺលាង (Zhuge Liang ) ៖«ជឿជាក់ជ្រុលហួសហេតុពេក នាំឲ្យបរាជ័យ» សុភាសិតជប៉ុន៖ «អ្នកមិនអាចធ្វើអ្វីមួយជោគជ័យ ដោយគ្មានការលះបង់នោះទេ»
ដោយ៖ រតនា វិចិត្រ
