ខណៈ ឆ្នាំ២០១៥ ជិតផ្លាស់ចូលឆ្នាំថ្មី២០១៦ មានការសរុបលទ្ធផលពាក់ព័ន្ធវិស័យបច្ចេកវិទ្យាជាច្រើន។ ដូច្នេះទំព័រនេះដែរ BizKhmer សូមលើកយកកម្មវិធីស្មាតហ្វូនដែលមានការពេញនិយមប្រើច្រើនបំផុតប្រចាំឆ្នាំ២០១៥ មកបង្ហាញជូនដល់ប្រិយមិត្ត ដែលនេះជាលទ្ធផលស្រាវជ្រាវបានពីក្រុមហ៊ុនវិភាគទីផ្សារអ្នកប្រើប្រាស់ល្បីលំដាប់ពិភពលោក Nielsen។
១) Facebook
-តួលេខអ្នកប្រើពិតប្រាកដជាមធ្យមមាន ១២៦.៧០២.០០០នាក់
-កំណើនអ្នកប្រើប្រចាំឆ្នាំ ៨%
Facebook ជាប់ជាកម្មវិធីស្មាតហ្វូនពេញនិយមបំផុតក្នុងឆ្នាំ២០១៥។ មានមនុស្សប្រមាណជាង ១២៦លាននាក់ប្រើប្រាស់ប្រចាំខែ។ វាបានផ្ដល់នូវបទពិសោធន៍ងាយស្រួលភ្ជាប់ទំនាក់ទំនងរវាងមនុស្សលើលោក។
២) Youtube
-តួលេខអ្នកប្រើពិតប្រាកដជាមធ្យមមាន ៩៧.៦២៧.០០នាក់
-កំណើនអ្នកប្រើប្រចាំឆ្នាំមាន ៥%
ប្រហែលអ្នកខ្លះមិនបានចាប់អារម្មណ៍នូវកម្មវិធីដែលខ្លួនចូលចិត្តទស្សនាវីដេអូនេះឡើយ។ Youtube បានឈរនៅលើរៀងទី២ ជាកម្មវិធីពេញនិយមបំផុតបន្ទាប់ពី Facebook។ នៅក្នុងឆ្នាំ២០១៥ នេះ Youtube មានអ្នកប្រើលើពិភពលោកប្រមាណ ៩៧លាននាក់។
៣) Facebook Messenger
-តួលេខអ្នកប្រើពិតប្រាកដជាមធ្យមមាន ៩៦.៤៤៤.០០០នាក់
-កំណើនអ្នកប្រើប្រចាំឆ្នាំមាន ៣១%
ជាកម្មវិធីឯកទេសសម្រាប់ chat របស់ Facebook ដែលប្រើអបជាមួយ Facebook app។ វាផ្ដល់ភាពងាយស្រួល និងការភ្ជាប់ទំនាក់ទំនងរហ័សក្នុងការផ្ញើសារប្រភេទ chat និងមានរូបស្ទីកកឺស្អាតៗសម្រាប់បង្ហាញអារម្មណ៍។ Facebook Messenger ក៏ជាកម្មវិធីមួយ មានការពេញនិយមបំផុតក្នុងឆ្នាំ២០១៥ នេះដែរ។
៤) Google Search
-តួលេខអ្នកប្រើប្រចាំខែមាន ៩៥.០៤១.០០០នាក់
-កំណើនប្រចាំឆ្នាំមាន ៣%
Google មានកម្មវិធីមួយសម្រាប់ស្វែងរកអ្វីៗនៅលើពិភពអ៊ីនធឺណិត។ Google Search មានអ្នកប្រើជាង ៩៥លាននាក់ ហើយអ្វីដែលគេ search ច្រើនជាងគេក្នុងឆ្នាំ២០១៥ នេះគឺជាអតីតអ្នកលេងបាល់បោះអាជីពរបស់អាមេរិកនៅក្រុម NBA។
៥) Google Play
-តួលេខអ្នកប្រើប្រាស់រាល់ខែមាន ៨៩.៧០៨.០០០នាក់
-កំណើនប្រចាំឆ្នាំមាន ៧%
អ្នកពិតជាមិនអាចទាញយកកម្មវិធីនេះបានទេ ប៉ុន្តែប្រសិនអ្នកមានស្មាតហ្វូន Android កម្មវិធីនេះមានស្រាប់នៅលើនោះតែម្ដង។ Google Play គឺជា store ផ្ទុកកម្មវិធីយ៉ាងច្រើនសំបូរបែបសម្រាប់ឱ្យអ្នកប្រើស្មាតហ្វូន Android ទាញយកទៅប្រើ។ បច្ចុប្បន្នមានកម្មវិធីប្រមាណជាង ១.៦០០.០០០កម្មវិធីហើយ។
៦) Google Maps
-តួលេខអ្នកប្រើពិតប្រាកដមាន ៨៧.៧៨២.០០០នាក់
-កំណើនប្រចាំឆ្នាំមាន ៨%
ក្នុងឆ្នាំ២០១៥នេះ Google Maps ក៏ជាកម្មវិធីពេញនិយមខ្លាំងបំផុតមួយផងដែរ ដែលមានការដំឡើងប្រើនៅលើស្មាតហ្វូនប្រមាណជាង ៨៧លាន។ អាចនិយាយបានថា វាជាជំនួយការបង្ហាញផ្លូវយ៉ាងពិសេស ងាយស្រួលដល់អ្នកចូលចិត្តធ្វើដំណើរឆ្ងាយៗអាចស្គាល់ច្បាស់នូវភូមិសាស្ត្រនានា។
៧) Gmail របស់ Google
-តួលេខអ្នកប្រើពិតប្រាកដមាន ៧៥.១០៥.០០០នាក់
-កំណើនប្រចាំឆ្នាំមាន ៤%
Gmail ក៏ជាប់ជាកម្មវិធីស្មាតហ្វូនមានការពេញនិយមខ្លាំងមួយផងដែរ សម្រាប់ឆ្នាំ២០១៥។ វាផ្ដល់ភាពងាយស្រួលក្នុងការផ្ញើ និងទទួលអ៊ីមែលបានរហ័សចំណេញពេល ដោយពុំចាំបាច់ត្រូវបើក តាមកម្មវិធី browser នោះឡើយ។ Gmail ត្រូវបានបង្កើតនៅឆ្នាំ២០០៤ ដែលមានទំហំផ្ទុកទិន្នន័យបាន 1GB។ បច្ចុប្បន្នស្មាតហ្វូនប្រមាណ ៧៥លានគ្រឿងសុទ្ធតែមានប្រើ Gmail app នេះ។ នេះជាភាពជោគជ័យមួយរបស់ Google។
៨) Instagram
-តួលេខអ្នកប្រើពិតប្រាកដជាមធ្យមមាន ៥៥.៤១៣.០០០នាក់
-កំណើនប្រចាំឆ្នាំ២៣%
ជាកម្មវិធីបណ្ដាញចែកចាយរូបថតមួយដ៏ពេញនិយម និងស្ថិតក្រោមការគ្រប់គ្រងរបស់ Facebook ផងដែរ។ Instagram ក៏បានជាប់ជាកម្មវិធីពេញនិយមប្រើបំផុតមួយផងដែរ ដោយសារវាផ្ដល់លក្ខណៈ ពិសេសងាយស្រួលចែករំលែករូបថត និងមានមុខងារកែរូបថតបានស្អាតៗ និងអាចធ្វើការចែកចាយ (share) ទៅលើបណ្ដាញសង្គម Facebook បាន។ សព្វថ្ងៃ Instagram មានអ្នកប្រើជាង ៥៥លាននាក់។
៩) Apple Music
-តួលេខអ្នកប្រើពិតប្រាកដជាមធ្យមមាន ៥៤.៥៥០.០០០
-កំណើនប្រចាំឆ្នាំមាន ២៦%
គឺជាសេវាកម្ម music streaming របស់ Apple ដែលទទួលបានប្រជាប្រិយភាពប្រើប្រាស់ច្រើនផងដែរ។
១០) Apple Maps
-តួលេខអ្នកប្រើពិតប្រាកដជាមធ្យមមាន ៤៦.៤០៦.០០០
-កំណើនប្រចាំឆ្នាំមាន ១៦%
Apple Maps ជាកម្មវិធីមួយមិនខុសពី Google Maps នោះទេ គឺជាកម្មវិធីមើលផែនទីដែលមានការពេញនិយមប្រើច្រើន។ យ៉ាងណាតួលេខអ្នកប្រើ Apple Maps មិនទាន់អាចប្រៀបបាននឹង Google Maps នៅឡើយ។ Apple Maps ត្រូវបានបង្កើតនិងដាក់ឱ្យប្រើនៅលើឧបករណ៍ iOS តាំងពីថ្ងៃទី១៩ ខែកញ្ញា ឆ្នាំ២០១២ គិតមកដល់ពេលនេះ មានរយៈពេលប្រហែល ៣ឆ្នាំ។ ចំណែក Google Maps ត្រូវបានដាក់ឱ្យប្រើនៅថ្ងៃទី៨ ខែកុម្ភៈ ឆ្នាំ២០១៥ គិតមកត្រឹមពេលនេះមានរយៈពេលប្រហែល ១០ឆ្នាំមកហើយ៕
