Apple បាន​បន្ថែម​មុខងារ Live Photos ​តាំងពី​ចេញ​ទូរស័ព្ទ iPhoe 6S និង iPhone 6S Plus ​ចុង​ឆ្នាំ២០១៥ នេះ ហើយ​ពេល​នេះ បណ្ដាញ​សង្គម Facebook ​ក៏​នឹង​ផ្ដល់​ការ​គាំទ្រ​ប្រើ​មុខងារ​នេះ​នៅ​លើ​កម្មវិធី iOS app ​ផង​ដែរ។ យោង​តាម​របាយការណ៍​ពី​គេហទំព័រ TechCrunch ​ឱ្យ​ដឹង​ថា កម្មវិធី Facebook សម្រាប់ iOS ​ចាប់ផ្ដើម​គាំទ្រ​មុខងារ Live Photos នេះ​សម្រាប់​បណ្ដា​អ្នក​ប្រើ Facebook app មួយ​ចំនួន​ហើយ។ Live Photos អាច​ត្រូវ​បាន​អាប់ឡូដ (upload) ​តាម​កម្មវិធី Facebook ​តាម​ធម្មតា​ដូច​រូប​ទូទៅ ប៉ុន្តែ​មាន​ជំហាន​បន្ថែម។ នៅ​ពេល​អ្នក​បង្ហោះ (upload) ​រូបថត ប្រអប់ Live box បង្ហាញ​ឡើង ហើយ​អ្នក​ត្រូវ​ចុច (tab) ដើម្បី upload រូប​ថត​មាន​ចលនា Live Photos។ មុខងារ​នេះ នឹង​គាំទ្រ​សម្រាប់​តែ​កម្មវិធី Facebook ​លើ iOS ​ហើយ​ជា​ទូរស័ព្ទ​ស៊េរី​ក្រោយ​បង្អស់​របស់ Apple គឺ iPhone 6S និង 6S Plus។ គេ​មិន​ទាន់​ដឹង​ថា តើ​ពេល​ណា Facebook ​នឹង​បញ្ចេញ​មុខងារ​នេះ​ឱ្យ​គ្រប់​អ្នក​ប្រើ​បណ្ដាញ​សង្គម​របស់​ខ្លួន​ប្រើ​បាន​ទាំង​អស់​នៅឡើយ៕