សំណួរដែលអ្នកគួរសួរ ទៅអ្នកសម្ភាសន៍ការងារ ដើម្បីធ្វើឲ្យពួកគេភ្ញាក់ផ្អើលនឹងអ្នក
តាមធម្មតា ពេលអ្នកសម្ភាសន៍ការងារជិតចប់ ខាងក្រុមហ៊ុននឹងសួរមកកាន់អ្នកវិញថាតើអ្នកមានសំណួរសួរគេទេ? បើអ្នកនិយាយថាគ្មាន ពួកគេនឹងគិតថាអ្នកមិនចាប់អារម្មណ៍លើការងារ ហើយមិនចាប់អារម្មណ៍ពីក្រុមហ៊ុនរបស់គេទៀត។ ហេតុនេះអ្នកត្រូវរៀនស្រាវជ្រាវថា តើសំណួរណាខ្លះដែលអ្នកគួរសួរគេវិញ ហើយធ្វើឲ្យគេភ្ញាក់ផ្អើលនឹងសំណួរនោះ។
១) សំណួរពាក់ព័ន្ធនឹងក្រុមហ៊ុន៖ នេះជាឱកាស ដែលអ្នកអាចបង្ហាញថាអ្នកចេះដឹងអ្វីខ្លះពីក្រុមហ៊ុននោះ។ ក្នុងនោះសំណួរគួរមាន៖ « ខ្ញុំឃើញថាក្រុមហ៊ុនអ្នក ផ្ដោតសំខាន់លើការងារនេះ តើអ្នកអាចប្រាប់ខ្ញុំឲ្យបានច្បាស់ថែមទៀតបានទេ? តើអ្នកអាចប្រាប់ខ្ញុំពីវប្បធម៌ធ្វើការងារនៅទីនេះបានទេ? តើក្រុមហ៊ុននេះឲ្យនិយមន័យពាក្យជោគជ័យដូចម្ដេចទៅ? »
២) សំណួរពាក់ព័ន្ធនឹង តួនាទី៖ អ្នកគួរបង្ហាញការចាប់អារម្មណ៍របស់អ្នកមកលើតួនាទី ណាមួយ។ ដោយក្នុងនោះអ្នកអាចនិយាយពីតួនាទី ដែលអ្នកសម្ភាសន៍អ្នកបានលើកមកនិយាយក៏បាន។ សំណួរទាំងនោះគួរមាន៖ « តើអ្នករំពឹងថាតួនាទីមួយនេះ អាចនឹងក្លាយជាអ្វីដែរ ក្នុងរយៈពេល១ឬ២ឆ្នាំទៅមុខទៀត? តើតួនាទីនេះប្រឈមមុខនឹងអ្វីខ្លាំងជាងគេ? តើតួនាទីនេះ បុគ្គលិកមុនៗ រ៉ាប់រងអ្វីខ្លះ? »
៣) សំណួរពាក់ព័ន្ធនឹងអ្នកសួរ៖ សួរអ្នកសម្ភាសន៍អ្នក ពាក់ព័ន្ធនឹងតួនាទី និងពាក់ព័ន្ធនឹងក្រុមហ៊ុនរបស់អ្នក ក្នុងនោះគួរមាន៖ « តើអ្នកចូលចិត្តធ្វើអ្វីជាងគេនៅក្នុងក្រុមហ៊ុននេះ? តើអ្នកធ្វើការនៅទីនេះយូរប៉ុណ្ណាហើយ? តើអ្នកចង់អភិវឌ្ឍក្រុមហ៊ុនអ្វីខ្លះទៅ ? តើការងារជាក្រុមមានថាមពលអ្វីខ្លះ ក្នុងការពន្លឿនការងារ? »
ប្រែសម្រួល៖ ព្រំ សុវណ្ណកណ្ណិកា ប្រភព៖ lifehack
