ប្រជាជននៅជប៉ុនមានពេល ១០នាទីដើម្បីត្រៀមខ្លួនចំពោះ ការវាយប្រហារមីស៊ីលកូរ៉េខាងជើង!
អាជ្ញាធរជប៉ុនបានទទួលស្គាល់ថា ប្រជាជននៅជប៉ុនអាចមានពេលប្រហែល ១០នាទី ដើម្បីត្រៀមខ្លួនការវាយប្រហារដោយមីស៊ីលរបស់កូរ៉េខាងជើង។ នេះបើយោងតាមអត្ថបទចុះផ្សាយរបស់សារព័ត៌មាន The Time។
ការប្រកាសនេះ ត្រូវបានធ្វើឡើងស្របពេលដែលមានការចាប់អារម្មណ៍ខ្លាំងលើគេហទំព័រ មួយដែលមានផ្ដល់នូវអត្ថបទក្នុងគោលដៅការពារប្រជាជនជប៉ុន ដំណើរការដោយលេខាធិការដ្ឋាននៃទីស្នីការគណៈរដ្ឋមន្ត្រីជប៉ុន។ អ្វីដែលគួរឱ្យកត់សម្គាល់គឺ គេហទំព័រនេះទទួលបានអ្នកអានប្រមាណ ២.៦លាននាក់គិតចាប់តាំងពីខែមីនារហូតដល់ខែមេសា នេះ។
អានអត្ថបទពាក់ព័ន្ធ៖ គួរធ្វើយ៉ាងណាដើម្បីការពារខ្លួនបើមានការវាយប្រហារដោយមីស៊ីល? ដំបូន្មានពីរដ្ឋាភិបាលជប៉ុន!
អភិបាលក្រុង Osaka ដែលមានប្រជាជនរស់នៅ ៨.៨លាននាក់ លោក Hirofumi Yoshimura បានថ្លែងដូច្នេះថា ៖«មីស៊ីលមួយគ្រាប់បើបាញ់ភ្លាមមិនអាចត្រូវបានរ៉ាដាចាប់បានភ្លែតៗនោះទេ ពោលគឺនៅពេលដែលវារត់ចេញពីជើងទម្រសិន ហើយវាអាចចំណាយពេលច្រើននាទីទើបរ៉ាដាចាប់បាន។ ចំណែកសញ្ញាប្រកាសអាសន្ន គឺអាចបញ្ជូនដំណឹងតែប្រមាណ បួន ឬប្រាំនាទីមុនពេលដែលមីស៊ីលធ្លាក់ប៉ុណ្ណោះ»។
អានអត្ថបទពាក់ព័ន្ធ៖ ទាំងនេះគឺជាជម្រើសរបស់ជប៉ុនដើម្បីប្រឆាំងនឹងកូរ៉េខាងជើង!
នៅក្នុងករណីដែលមានការវាយប្រហារដោយកូរ៉េខាងជើង ប្រជាជនជប៉ុនត្រូវបានផ្ដល់ដំបូន្មានស្វែងរកជម្រកនៅក្រោមដី ឬអគារដែលមានគ្រឹះរឹងមាំដើម្បីគេចផុតពីគ្រោះថ្នាក់។ ដោយឡែក ក្មេងៗសិស្សសាលានៅអូសាកាគឺត្រូវបានផ្ដល់ដំបូន្មានឱ្យក្រាបក្រោមតុបើមានការវាយប្រហារពិតមែន៕
ដោយ៖ យោធិន
