ហេតុផល៤យ៉ាងបញ្ជាក់ថា អ្នកត្រូវព្យាយាមពង្រឹងភាសាអង់គ្លេសឲ្យខ្លាំង
ជាការពិតណាស់ ភាសាអង់គ្លេសបានផ្ដល់គុណប្រយោជន៍ជាច្រើនមកកាន់ជីវិតប្រចាំថ្ងៃរបស់មនុស្ស។ ភាសាអង់គ្លេសត្រូវបានចាត់ទុកជាភាសាទីពីរ(Second Language) និង ត្រូវបានបង្រៀនជាភាសាបរទេស(Foreign Language)នៅប្រទេសមួយចំនួនថែមទៀតផង។ បន្ថែមពីលើនេះទៅទៀត ភាសាអង់គ្លេសក៏បានក្លាយជាភាសាផ្លូវការ(Official Language) នៅប្រមាណជាង៩០ប្រទេសផងដែរ។ អត្ថបទថ្ងៃនេះនឹងបង្ហាញពីសារៈសំខាន់នៃភាសាអង់គ្លេស៖
១) ជាភាសាសកល៖ ភាសាអង់គ្លេសជាប់ចំណាត់ថ្នាក់ទីបួនដែលត្រូវបានប្រើប្រាស់ច្រើនជាងគេលើពិភពលោក។ បើយោងទៅតាមរបាយការណ៍ របស់ Globally Speaking មនុស្សប្រមាណ១ពាន់លាននាក់ប្រើប្រាស់ឬចេះភាសាអង់គ្លេស ដែលចំនួននេះស្មើនឹងមួយភាគបួននៃចំនួនមនុស្សទាំងអស់ទូទាំងពិភពលោក។
២) ក្នុងកម្មវិធីផ្លូវការ ៖ វាជាភាសាមួយដែលត្រូវបានគេជ្រើសរើសមកប្រើប្រាស់ក្នុងកម្មវិធីផ្លូវការនានាដូចជាកិច្ចប្រជុំអាស៊ាន និង កិច្ចប្រជុំធំៗផ្សេងទៀត។ មិនត្រឹមតែនៅក្នុងប្រទេសកម្ពុជានោះទេ អាជ្ញាធរឬមន្ត្រីរាជការនៅប្រទេសជាច្រើនទៀតតែងតែប្រើប្រាស់ភាសាអង់គ្លេសក្នុងការធ្វើកិច្ចពិភាក្សាលើប្រធានបទឬបញ្ហានានាដើម្បីរកដំណោះស្រាយរួម។ ហេតុនេះហើយ ភាសាអង់គ្លេសពិតជាមានសារៈសំខាន់ពិតប្រាកដមែន។
៣) ការសិក្សា៖ នៅសកលវិទ្យាល័យឬវិទ្យាល័យល្បីល្បាញទូទាំងពិភពលោកដូចជាHarvard Oxfordឬ Standfordដែលជាសាលាក្នុងក្តីសុបិនរបស់សិស្សភាគច្រើន សាលាទាំងអស់នេះសុទ្ធតែប្រើប្រាស់ភាសាអង់គ្លេសជាភាសាគោលក្នុងការរៀន។ ដូច្នេះហើយ ការចេះភាសាអង់គ្លេសនឹងជួយអ្នកយ៉ាងខ្លាំងក្នុងការសិក្សា ក្រេបយកចំណេះនិងប្រកួតប្រជែងជាមួយសិស្សដទៃ។ ម៉្យាងវិញទៀត សៀវភៅជាច្រើនត្រូវបានសរសេរជាភាសាអង់គ្លេស អ៊ីចឹងហើយ ប្រសិនជាអ្នកចេះភាសាអង់គ្លេស វានឹងជួយអ្នកឲ្យយល់ពីខ្លឹមសារនៃអត្ថបទបានងាយស្រួលនិងច្បាស់លាស់។
៤)ផ្ដល់ភាពងាយស្រួលក្នុងការងារប្រចាំថ្ងៃ៖ ប្រសិនជាយើងនិយាយពីការងារវិញ ក្នុងការិយាល័យ ក្រុមហ៊ុនធំៗជាច្រើនឬស្ថាប័នរដ្ឋនានា បុគ្គលិកភាគច្រើនសុទ្ធតែទាមទារឲ្យចេះនូវភាសាអង់គ្លេសពីព្រោះថាពួកគាត់ត្រូវជួបអតិថិជនបរទេសក្នុងកិច្ចការប្រចាំថ្ងៃ។ បន្ថែមពីលើនេះ បុគ្គលិកដែលចេះភាសាអង់គ្លេសក៏មានឱកាសចាត់តាំងទៅធ្វើការឬទៅប្រជុំនៅក្រៅប្រទេសទៀតផង៕
ប្រែសម្រួល៖ អុឹង មុយយូ ប្រភព៖ inlinguamalta.com
