តើសសរគ្រឹះអ្វីខ្លះទ្រទ្រង់ភាពរឹងមាំនៃសេដ្ឋកិច្ចរបស់ប្រទេសហុល្លង់ ?
ហុល្លង់ជាប់ជាប្រទេសមួយដែលមានសេដ្ឋកិច្ចធំជាងគេលំដាប់ទី១៦របស់ពិភពលោក និងលំដាប់ទី៦របស់សហភាពអឺរ៉ុប។ ថ្វីត្បិតតែប្រជាប្រិយភាពរបស់សេដ្ឋកិច្ចហុល្លង់មិនសូវត្រូវបានគេលើកឡើងកន្លងមកក៏ដោយ យ៉ាងណាមិញតំបន់ភូមិសាស្ត្រនៃទឹកដីដែលមានទំហំ៤១ ៨៦៤គីឡូម៉ែត្រការ៉េ ដែលមានលក្ខណៈជាតំបន់ដីសណ្ដ ដែលច្រើនជាង១ភាគ៤នៃផ្ទៃដីសរុបជាផ្នែកក្រោមសមុទ្រ នាំឲ្យដែនដីរបស់ហុល្លង់ក្លាយជាដង្ហើមដ៏សំខាន់មួយសម្រាប់ការដោះដូរពាណិជ្ជកម្មអន្តរជាតិរបស់អឺរ៉ុប។
ចំកណ្ដាលបេះដូងនៃគោលជំហរសេដ្ឋកិច្ចរបស់ហុល្លង់គឺជាការដោះដូរពាណិជ្ជកម្មអន្តរជាតិនេះឯង និងស្ថិតនៅក្នុងចំណោមប្រទេសចំនួន១០ដែលនាំមុខគេខាងការនាំចេញ ដែលក្នុងឆ្នាំ២០០៩ បន្ទាប់ពីអាល្លឺម៉ង់ នោះគឺហុល្លង់នេះហើយដែលស្ថិតនៅក្នុងលំដាប់ទី២ខាងផ្នែកនាំចេញដ៏ធំជាងគេរបស់អឺរ៉ុប។ ដៃគូពាណិជ្ជកម្មដ៏សំខាន់របស់ហុល្លង់គឺជាបណ្ដាប្រទេសជិតខាងមានដូចជា អាល្លឺម៉ង់ បែលហ្ស៊ិក ចក្រភពអង់គ្លេស និងបារាំង។ សសរគ្រឹះសំខាន់ៗដែលទប់លំនឹងសេដ្ឋកិច្ចហុល្លង់ឲ្យមានភាពរឹងមាំបានដល់កម្រិតនេះ គឺជាផ្នែកឧស្សាហកម្មសេវាកម្ម ផលិតផលកសិកម្មនិងអាហារ ឧស្សាហកម្មគីមី ថាមពល បច្ចេកវិទ្យាទំនើប សាកវប្បកម្ម(ការដាំដុះ) ផ្នែកសុខភាព ផ្នែកដឹកជញ្ជូន ទឹក និងឧស្សាហកម្មច្នៃប្រឌិត។ អ្វីដែលជាភាពអស្ចារ្យនៃភាពជោគជ័យផ្នែកផលិតផលកសិកម្មរួមចំណែកដល់ភាពរឹងមាំនៃសេដ្ឋកិច្ចរបស់ហុល្លង់ នោះគឺផ្នែកកសិកម្មដែលរួមចំណែកផ្ដល់ការងារប្រមាណតែ២ភាគរយនៃកម្លាំងពលកម្មទាំងអស់ប៉ុណ្ណោះ ប៉ុន្តែផលិតផលកសិកម្មទាំងអស់បានធ្វើឲ្យប្រទេសនេះឈរខ្ពស់រហូតដល់តំណែងទី២ជាអ្នកនាំចេញផលិតផលកសិកម្មដ៏ធំជាងគេរបស់ពិភពលោក។ ក្រៅពីនេះ តឹកតាងដែលបញ្ជាក់ពីភាពរឹងមាំនៃសេដ្ឋកិច្ចរបស់ប្រទេសដែលមានប្រជាជនប្រមាណ១៦.៧លាននាក់នេះ នោះគឺទិន្នន័យពីវេទិកាសេដ្ឋកិច្ចពិភពលោកបានចាត់ប្រទេសហុល្លង់ស្ថិតក្នុងលេខរៀងទី៤ក្នុងសន្ទស្សន៍ការប្រកួតប្រជែងរបស់សកលលោករវាងឆ្នាំ២០១៦ដល់២០១៧៕
ប្រែសម្រួល៖ ស្រីពៅ ប្រភព៖ utrechtsummerschool & hollandtradeandinvest & theodora
