ក្រុមហ៊ុន Lilium នៅ​សប្ដាហ៍​នេះ បាន​ទទួល​ជោគជ័យ​ក្នុង​ការ​សាកល្បង​យន្តហោះ​ប្រើ​អគ្គិសនី​ដំបូង​របស់​ខ្លួន និង​មុន​គេ​លើ​លោក ដែល​ជា​យន្តហោះ​មាន​សមត្ថភាព​អាច​ចាប់​ហោះហើរ និង​ចុះ​ចត​ក្នុង​ទម្រង់​បញ្ឈរ​នៅ​នឹង​កន្លែង ពោល​គឺ​មិន​ចាំបាច់​រត់​ចម្ងាយ ដើម្បី​បង្ហើប ឬ​បន្ទាប​គ្នា​ម្ដង​បន្តិចៗ​ដូច​យន្តហោះ​ទូទៅ​ឡើយ។ សូម​ទស្សនា​វីដេអូ​ធ្វើតេស្ត​ដូច​ខាង​ក្រោម៖ https://youtu.be/ohig71bwRUE Lilium Jet គឺ​ជា​យន្តហោះ​ខ្នាត​តូច ដំណើរការ​បាន​ដោយ​ប្រើ​អគ្គិសនី​សុទ្ធសាធ និង​អាច​ហោះ​បាន​ក្នុង​ចម្ងាយ​ប្រហែល ៣០០គីឡូម៉ែត្រ។ បច្ចុប្បន្ន​ក្រុមហ៊ុន Lilium កំពុង​អភិវឌ្ឍ​យន្តហោះ​ខ្នាត​ធំ​ជាង​នេះ ជា​យន្តហោះ​មាន ៥កៅអី ឌីហ្សាញ​សម្រាប់​បំពេញ​វិស័យ​ដឹកជញ្ជូន ពោល​គឺ​តាកស៊ី​ផ្លូវ​អាកាស។

សហ​ស្ថាបនិក និង​ជា​នាយក​ប្រតិបត្តិ​ក្រុមហ៊ុន Lilium ​លោក Daniel Wiegand បាន​លើកឡើង​ថា លោក​សម្លឹង Lilium Jet ហោះ​ទៅ​លើ​មេឃ ហើយ​បំពេញ​មុខងារ​ហោះហើរ យ៉ាង​ប៉ិនប្រសព្វ​ដូច្នេះ​គឺ​ឆ្លុះ​បញ្ចាំង​ឱ្យ​ឃើញ​ពី​ស្មារតី​ក្រុម​ដ៏​អស្ចារ្យ​ដែល​អាច​ធ្វើ​វា​បាន។ ក្រុមហ៊ុន​បាន​ខិតខំ​រក​ដំណោះស្រាយ​ក្នុង​ការ​ផលិត​ម៉ាស៊ីន​មាន​សមត្ថភាព ជា​អ្វី​ដែល​ក្រុម​ការងារ​បាន​ឌីហ្សាញ​ស្រប​តាម​​ស្តង់ដារ​បច្ចេកទេស៕ ប្រែ​សម្រួល៖ រឹទ្ធិរាជ ប្រភព៖ Lilium