លោក Napoleon Hill៖ ៦ជំហានដើម្បីឲ្យក្ដីប្រាថ្នាចង់ក្លាយជាសេដ្ឋីក្លាយជាការពិត
Napoleon Hill គឺជាអតីតអ្នកនិពន្ធដ៏ល្បីក្នុង ប្រវត្តិសាស្ត្ររបស់អាមេរិក។ លោកគឺជាអ្នកនិពន្ធសៀវភៅ «Think and Grow Rich» ដែលសៀវភៅនេះទទួលបានការគាំទ្រលើសលប់ ទាំងក្នុងទឹកដីអាមេរិក និង ហូរទៅដល់បណ្ដាប្រទេសជាច្រើនទៀតនៅក្នុងសកលលោក។ ខាងក្រោមនេះ គន្លឹះសំខាន់ចំនួន៦យ៉ាងពីលោក Napoleon Hill ដើម្បីឲ្យក្ដីប្រាថ្នាក្លាយជាអ្នកមានរបស់ខ្លួន បានសម្រេច៖
១) កំណត់ចំនួនលុយដែលអ្នកចង់បានឲ្យច្បាស់៖ ដើម្បីក្លាយជាអ្នកមែន មិនមែនអ្នកគ្រាន់តែនិយាយថា ចង់បានលុយច្រើនតែប៉ុណ្ណឹងទេ ពោលគឺត្រូវកំណត់ឲ្យច្បាស់ថា ១ លាន ឬ ១ពាន់លានដុល្លារដែលអ្នកចង់បាន។ ការកំណត់យ៉ាងច្បាស់នេះ គឺមិនមែនមានន័យថា អ្នកនឹងទទួលបាន១០០ភាគរយនោះទេ ប៉ុន្តែវាជួយឲ្យអ្នកអាចដឹងច្បាស់ពីគោលដៅដែលអ្នកត្រូវសម្រេចឲ្យបាន។
២) ត្រូវកំណត់ឲ្យច្បាស់ថា គួរធ្វើអ្វីដែលអាចធ្វើឲ្យអ្នករកលុយបានច្រើន៖ ត្រូវចាំថា លុយមិនអាចរត់រកអ្នក ដោយគ្រាន់តែអ្នកគិតថា នឹងទទួលបានវានោះទេ ពោលគឺត្រូវតែមានផែនការ ឬ គម្រោងច្បាស់លាស់ថា ត្រូវធ្វើយ៉ាងណា ឬ រកស៊ីអ្វីទើបអាចទទួលបានលុយដែលអ្នកប្រាថ្នាចង់បាន។
៣) ត្រូវកំណត់ពេលវេលាឲ្យច្បាស់ ពេលណាអ្នកអាចសម្រេចវា៖ ការកំណត់ពេលវេលាគឺពិតជាសំខាន់ខ្លាំងណាស់ ព្រោះវាជាកត្តាមួយដែលធ្វើឲ្យអ្នកព្យាយាម និង រិះរកវិធីដើម្បីសម្រេចឲ្យបានតាមកាលកំណត់។ មានន័យថា បើអ្នកចង់បានលុយមួយលានដុល្លារ តើប៉ុន្មានឆ្នាំក្រោយដែលអ្នកចង់សម្រេចវា (៥ ឬ ១០ឆ្នាំក្រោយ)។
៤) រៀបចំផែនការឲ្យច្បាស់៖ គ្មានរឿងអស្ចារ្យណាមួយកើតឡើងដោយគ្មានការខិតខំប្រឹងប្រែងនោះទេ ហើយគ្មានការខិតខំប្រឹងប្រែងណាមួយដែលអាចសម្រេចបានដោយងាយឡើយ ប្រសិនបើគ្មានការរៀបចំផែនការ ឬ យុទ្ធសាស្ត្រច្បាស់លាស់។ ដូច្នេះហើយ ផែនការ និង យុទ្ធសាស្ត្រគឺពិតជាសំខាន់ខ្លាំងណាស់ ដើម្បីនាំឲ្យក្តីប្រាថ្នារបស់អ្នក សម្រេចដូចអ្វីដែលចង់បាន។
៥) សរសេរជាចំណុចនីមួយៗឲ្យច្បាស់ (ពី១ដល់៤)៖ ដើម្បីឲ្យអ្វីៗដំណើរការទៅយ៉ាងល្អ អ្នកត្រូវតែចំណាយពេលក្នុងការសរសេរវា ដើម្បីទុកជាឯកសារ ជៀសវាងការភ្លេច ឬ ច្រឡំចំណុចណាមួយជាយថាហេតុ។ ដូច្នេះកុំខ្ជិលសរសេរវាឲ្យសោះ ព្រោះសរសេរកាន់តែលម្អិត គឺកាន់តែល្អ ព្រោះវាប្រៀបដូចជាផែនទីមួយផ្ទាំងអ៊ីចឹង ដែលអាចកំណត់គោលដៅ និង ទីតាំងរបស់អ្នកយ៉ាងច្បាស់។
៦) អានកំណត់ត្រារបស់អ្នកជាប្រចាំ៖ អ្នកត្រូវចំណាយពេលអាន និង ត្រួតពិនិត្យមើលកំណត់ត្រារបស់អ្នកជាប្រចាំ ឬ រាល់ថ្ងៃក៏បាន ដើម្បីដឹងច្បាស់ថា មានចំណុចណាមួយដែលខ្វះខាត និង ដើម្បីដឹងថា អ្នកបានដើរដល់ចំណុចណាហើយ៕
អត្ថបទល្អៗផ្សេងទៀត៖ កម្រងសុភាសិតល្អៗរបស់អ៊ីស្រាអែល ដែលអ្នកគួររៀនសូត្រ សម្រង់សម្ដីសំខាន់ៗរបស់លោកណាប៉ូឡេអុង ហ៊ីល (Napoleon Hill) អ្នកនិពន្ធសៀវភៅ «Think and Grow Rich» ដ៏ល្បីល្បាញលើពិភពលោក កម្រងគំនិតសំខាន់ៗរបស់លោក Thomas Jefferson ប្រធានាធិបតីទី៣របស់អាមេរិក ដែលគួរយល់ដឹង
ដោយ៖ រតនា វិចិត្រ
