សញ្ញា៤យ៉ាង បញ្ជាក់ថាអ្នកជាមនុស្សគំនិតខ្លី (មើលឃើញតែប្រយោជន៍រយៈពេលខ្លី)
ប្រយោជន៍រយៈពេលវែង ជាប្រយោជន៍ដែលទាមទារឲ្យមនុស្សគ្រប់គ្នាមើលធ្លុះអំពីវា និង មានការអត់ធ្មត់ដើម្បីបន្តធ្វើកិច្ចជាហូរហែ ទម្រាំបានសម្រេច។ ប៉ុន្តែជាទូទៅ មនុស្សគឺចូលចិត្តគិតតែលើប្រយោជន៍រយៈពេលខ្លី ព្រោះវាងាយធ្វើ ហើយឆាប់ទទួលបានផល ប៉ុន្តែក៏ឆាប់អស់ផលនោះផងដែរ។ ផ្ទុយទៅវិញ ប្រយោជន៍រយៈពេលវែង គឺត្រូវការពេលវេលា ពិបាកធ្វើ តែវានឹងហុចផលឲ្យយ៉ាងគាប់ចិត្ត។ ដោយសារតែគិតតែប្រយោជន៍រយៈពេលខ្លី ដូច្នេះហើយ មានជាមនុស្សជាច្រើនសាងបញ្ហាដល់ខ្លួនឯង និង សង្គមមិនចេះចប់។ បើមានចំណុចទាំងនេះ មានន័យថា ជាអ្នកមនុស្សគិតគំនិតខ្លី ព្រោះមើលឃើញតែប្រយោជន៍ក្នុងរយៈពេលខ្លី៖
១) ចង់បានអ្វីដែលងាយៗ៖ គ្មានរឿងអស្ចារ្យណាមួយអាចកើតឡើង ដោយសារតែសកម្មភាពធម្មតានោះទេ។ ដូច្នេះហើយបើអ្នកចង់បានអ្វីដែលងាយៗនោះ អ្នកនឹងទទួលបានផលទៅតាមនោះដែរ ហើយកុំបន្ទោសអ្នកនេះឬអ្នកនោះឲ្យសោះ ព្រោះអ្វីៗស្ថិតលើការសម្រេចចិត្ត និង ការគិតឃើញរបស់អ្នកប៉ុណ្ណោះ។
២) ចង់បានផលភ្លាមៗ៖ ដើមត្នោត គឺជាប្រភេទដើមឈើដ៏មានប្រយោជន៍ ពោលគឺមានប្រយោជន៍រាប់សឹងមិនអស់ តាំងពីចុងរហូតដល់គល់។ ដើម្បីក្លាយជាដើមត្នោតមួយដើមពេញលេញ ឬ អាចហុចផលបានពេញសមត្ថភាពនោះ គឺវាទាមទារពេលវេលា ប្រហែល១០ឆ្នាំ។ ដូច្នេះហើយ បើអ្នកចង់បានផលភ្លាមៗនោះ ប្រហែលជារកនឹកមិនឃើញ ចំពោះការដាំដើមត្នោតនោះឡើយ ព្រោះត្រូវចំណាយពេលយូរពេក។ ការសម្រេចចិត្តមិនដាំដើមត្នោតនេះ នឹងធ្វើឲ្យអ្នកមិនអាចទទួលបានប្រយោជន៍ជាច្រើននៅរយៈពេល១០ឆ្នាំក្រោយ។ មួយវិញទៀត ទាក់ទងនឹងការសិក្សារៀនសូត្រ។ ការសិក្សារៀនសូត្រនេះ គឺមិនអាចហុចផលភ្លាមៗនោះទេ ពោលគឺមិនអាចប្រើពេល១ថ្ងៃ ឬ មួយខែបានឡើយ ព្រោះត្រូវចំណាយពេលរាប់ឆ្នាំ។ បើអ្នកគិតឃើញថា ការរៀនសូត្រមិនបានប្រយោជន៍អ្វីសោះ ព្រោះមិនងាយហុចផល នោះបញ្ជាក់យ៉ាងច្បាស់ថា អ្នកមនុស្សគំនិតខ្លី។
៣) គ្មានការតស៊ូ៖ មនុស្សដែលមានគំនិតខ្លី គឺគ្មានឡើយការតស៊ូដើម្បីសម្រេចកិច្ចការអ្វីមួយដ៏អស្ចារ្យ ព្រោះនៅពេលជួបការលំបាក ក៏សម្រេចចិត្តបោះបង់ ហើយទៅធ្វើការងារណាដែលងាយៗវិញ។ ប៉ុន្តែងាយធ្វើ ឆាប់បាន ក៏ឆាប់អស់តាមហ្នឹងដែរ។ សម្រាប់មនុស្សដែលមានគំនិតវែងឆ្ងាយវិញ គឺ គេនឹងចាប់ផ្ដើមធ្វើការងារណាដែលគិតថា វាល្អ និង ពេញចិត្ត ហើយអាចហុចផលបានជាទីគាប់ចិត្តនៅពេលខាងមុខ បើទោះបីជាត្រូវការពេលវេលាយូរ និង ការលំបាករាប់មិនអស់ក៏ដោយ។
៤) មិនដែលគិតអំពីអនាគត៖ ធម្មជាតិរបស់មនុស្សចូលចិត្តភាពសប្បាយរីករាយ។ វាមិនមែនជារឿងខុសនោះទេ ប៉ុន្តែ ខុសនៅត្រង់ថា ការបង្កើតភាពសប្បាយរីករាយហួសកំណត់ ដែលនាំតែទុក្ខទោសដាក់ខ្លួន។ នៅពេលដែលមនុស្សចូលចិត្តភាពសប្បាយរីករាយហួសកំណត់ នាំឲ្យពូកគេភ្លេចគិតអំពីថ្ងៃស្អែកថា នឹងមានអ្វីកើតឡើង។ ចំពោះអ្នកដែលខ្វល់ខ្វាយ និង បានគិតអំពីអនាគតរបស់ខ្លួននោះ ពួកគេតែងព្យាយាមដាក់ព្រំដែននៃការបង្កើតភាពរីករាយរបស់ខ្លួន ដើម្បីប្រាកដថា វានាំមកនូវរឿងល្អ មិនមែននាំមកនូវបញ្ហានៅថ្ងៃក្រោយនោះទេ៕ សូមអានអត្ថបទល្អៗផ្សេងទៀត៖ ទម្លាប់ពិសេសៗរបស់លោក Bill Gate លោក Steve Jobs និង លោក Obama ដែលអ្នកគួរដឹង! អ្នកនិពន្ធដ៏ល្បី លោក សន ខូវិយ៍ (Sean Covey)៖ ទម្លាប់អាក្រក់៧យ៉ាង ធ្វើឲ្យយុវជនរកមិនឃើញភាពជោគជ័យក្នុងជីវិត រៀនមេរៀនជីវិតពីសម្រង់សម្ដីទាំង៨ឃ្លារបស់លោកLi Ka Shing មហាសេដ្ឋីហុងកុងល្បីបំផុតនៅអាស៊ី
ដោយ៖ រតនា វិចិត្រ
