ក្រុមហ៊ុន Samsung បានចាប់ផ្ដើមចែកចាយលក់រាល់ Galaxy S8 និង S8+ ដែលបានដាក់ឱ្យកុម្ម៉ង់ទិញកន្លងទៅ នៅលើទីផ្សារកូរ៉េខាងត្បូង ដែលជាទឹកដីកំណើតខ្លួន។ S8 ទាំងពីរម៉ូដែល កំពុងទទួលបានការចាប់អារម្មណ៍យ៉ាងខ្លាំងទៅលើការឌីហ្សាញរូបរាង ពិសេសគឺនៅលើអេក្រង់លាតសន្ធឹងពេញផ្ទៃមុខ ស្ទើរគ្មានគែមតែម្ដង។ យ៉ាងណា ដំណើរការចែកចាយលក់ អាចមិនទាន់ធ្វើទៅបានរលូន តាមការរំពឹងទុកពីក្រុមហ៊ុននៅឡើយ ដោយសារ អតិថិជនចាប់ផ្ដើមត្អូញត្អែរពីបញ្ហាអេក្រង់។
អតិថិជនខ្លះ ដែលបានកំពុងប្រើ Galaxy S8 នៅពេលនេះ កំពុងត្អូញត្អែរអំពីចំណុចអវិជ្ជមានមួយ គឺនៅត្រង់ការបង្ហាញរូបនៅលើអេក្រង់ ហាក់មានពណ៌ក្រហមប្រឿងៗ មិនដូចជាអេក្រង់ស្មាតហ្វូនទូទៅនោះឡើយ។ ឆ្លើយតបទៅនឹងបញ្ហានេះ ក្រុមហ៊ុន Samsung បានលើកឡើងថា វាមិនបណ្ដាលមកពីបញ្ហាអេក្រង់នោះទេ ហើយអ្នកប្រើ អាចធ្វើការកំណត់ (adjust) លក្ខណៈនេះ នៅលើទូរស័ព្ទបានដោយខ្លួនឯង។
ប្រសិនពណ៌នៅតែបង្ហាញ មានសភាពក្រហម អតិថិជនអាចផ្លាស់ប្ដូរបាន ដោយទាក់ទងទៅផ្នែកបម្រើអតិថិជននៅតាមបណ្ដាសាខា ឬដៃគូចែកចាយរបស់ Samsung។ សេចក្ដីរាយការណ៍ បានលើកឡើងថា ការកែអេក្រង់របស់ទូរស័ព្ទ មិនបានជួយអ្វីជាដុំកំភួនទេ ហើយការកែនៅក្នុង Settings នៃអេក្រង់ទូរស័ព្ទ ក៏មិនដោះស្រាយបានដែរ៕
ប្រែសម្រួល៖ រឹទ្ធិរាជ
ប្រភព៖ GSMArena
