ក្ដី​សង្ឃឹម​នឹង​បាន​ឃើញ​ស្មាតហ្វូន​បត់ (foldable) របស់ Samsung ក្នុង​ឆ្នាំ​នេះ ត្រូវ​រលាយ​អស់​នៅ​ថ្ងៃ​នេះ។ ​វិស្វករ​របស់​ក្រុមហ៊ុន Samsung Display Principal ​លោក Kim Tae-woong ​បាន​ឱ្យ​ដឹង​ថា ការ​លក់​អេក្រង់​ដែល​មាន​គែម​ស្ដើង (bezel-less display) ​គឺ​មាន​ផល​វិជ្ជមាន​ល្អ ហើយ​ពុំ​ចាំបាច់​បង្ខំ​ពន្លឿន​បច្ចេកវិទ្យា​ទូរស័ព្ទ​បត់​បាន​ដូច​សៀវភៅ​នោះ​ទេ គឺ​រង់ចាំ​ដល់​ឆ្នាំ២០១៩ ក៏​មិន​អី​ដែរ។ ការ​លើកឡើង​នេះ គឺ​ធ្វើ​ឡើង​ក្រោយ​មាន​ការ​លេច​ឮ​ពី​ដំណឹង Galaxy X ​ដែល​រំពឹង​ថា នឹង​ចេញ​នៅ​ក្នុង​ព្រឹត្តិការណ៍ IFA ខែ​កញ្ញា។ ក្រុម​អ្នក​វិភាគ​កូរ៉េ​ខាង​ត្បូង អះអាង​ថា អេក្រង់​ស្ទើរ​គ្មាន​សល់​គែម គឺ​ជា​ផលិតផល​សំខាន់​ជួយ​រក​ប្រាក់​ចំណូល​ដល់ Samsung។ អ្នក​វិភាគ​បន្ត​លើកឡើង​ទៀត​ថា ក្រុមហ៊ុន​មិន​ត្រូវការ ប្រញាប់​អភិវឌ្ឍ​ចេញ​ផលិតផល​ដែល​មិន​ទាន់​រួចរាល់​នេះ​ឡើយ។ យោងតាម​លោក Chung Won-seok ​ឱ្យ​ដឹង​ថា Samsung Display ​បង្កើត​បាន​នូវ​ប្រាក់​ចំណេញ​ប្រមាណ ២០% ​ពី​អេក្រង់​ស្ទើរ​គ្មាន​គែម (edgeless OLED) នេះ។ លោក​លើកឡើង​ថា៖ “នៅ​ពេល​តម្រូវការ​ស្មាតហ្វូន​អេក្រង់​ស្ទើរ​គ្មាន​គែម (bezel-free) ថយ​ចុះ Samsung នឹង​បញ្ចេញ​អេក្រង់​បត់បែន​បាន​សម្រាប់​ជា​យុទ្ធសាស្ត្រ​វាយលុក​ទីផ្សារ​បន្ទាប់"៕ ប្រែ​សម្រួល៖ រឹទ្ធិរាជ ប្រភព៖ koreaherald.com