​ស្មាតហ្វូន S8 ដែល​កំពុង​ល្បី​មាន​ការ​ចាប់អារម្មណ៍​ខ្លាំង ដោយសារ​បាន​បំពាក់​បច្ចេកវិទ្យា​ទំនើប ថ្មីៗ​ រួម​ទាំង​មុខងារ សម្គាល់​មុខ​មនុស្ស​នោះ ពេល​នេះ ហាក់​លេច​ចេញ​ចំណុច​ខ្សោយ​ទៅ​វិញ ព្រោះ​គេ​អាច​បើក​សោ​ Galaxy S8 ​បាន​ដោយ​គ្រាន់តែ ដាក់​រូបថត​ពី​មុខ​ទូរស័ព្ទ​ប៉ុណ្ណោះ។ សូម​ទស្សនា​វីដេអូ៖ https://youtu.be/uS1NmvJvHNk វីដេអូ​នេះ គឺ​ត្រូវ​បាន​បង្ហោះ​ផ្សាយ​ដោយ​បុរស​ម្នាក់​នៅ​លើ​គេហទំព័រ iDeviceHelp ដែល​បង្ហាញ​ពី​មុខងារ​ចំណាំ​មុខ​មាត់ នៅ​លើ Galaxy S8 ដោយ​អាច​ប្រើ​វិធី​បំបែក bypassed ជាមួយ​រូបថត​នៅ​លើ​ទូរស័ព្ទ​មួយ​គ្រឿង​ទៀត។ ដូច​ប្រិយមិត្ត​បាន​ឃើញ​ក្នុង​វីដេអូ​អីចឹង គឺ​គេ​អាច​ដោះ​សោ (unlock) ទូរស័ព្ទ​ដោយ​ប្រើ​រូបថត​នៅ​លើ​ស្មាតហ្វូន​មួយ​គ្រឿង​ទៀត​បាន ដូច្នេះ​វា​ហាក់​នៅ​មាន​ចំណុច​ខ្សោយ​នៅ​ឡើយ។ ទោះ​ជា​យ៉ាងណា ក៏​នៅ​មាន​មុខងារ​សុវត្ថិភាព​ផ្សេងៗ​ទៀត​នៅ​លើ កំពូល​ស្មាតហ្វូន Android នេះ​ដែរ។

គេហទំព័រ Ars Technica ​បាន​បញ្ជាក់​ប្រាប់​ទៅ​ខាង​ក្រុមហ៊ុន Samsung ឱ្យ​បាន​ដឹង​នូវ​លទ្ធផល​ធ្វើតេស្ត​ក្នុង​វីដេអូ​នេះ។ Galaxy S8 ​ត្រូវ​បាន​បញ្ចូល​មុខងារ​បញ្ជាក់​ការពិត​នៃ​កម្រិត​ជីវមាត្រ​ផ្សេងៗ​គ្នា ជាមួយ​កម្រិត​បញ្ជាក់​ខ្ពស់​បំផុត ពី​មុខងារ​ស្កេន​ប្រស្រី​ភ្នែក និង​មុខងារ​ស្កេន​ក្រយៅដៃ​ទៅ​ទៀត។ Galaxy S8 ​ផ្ដល់​ឱ្យ​អ្នក​ប្រើ អម​ដោយ​ជម្រើស​នៃ​ការ​ដោះសោ​របៀប​ផ្សេង​គ្នា គឺ ដោយ​ប្រើ​ជម្រើស​នៃ​សរីរាង្គ​មនុស្ស។

 

បច្ចុប្បន្ន​មុខងារ​ស្កេន​មុខ (facial recognition) នេះ​នៅ​មាន​កម្រិត​នៃ​ការ​ប្រើ ដោយ​មិន​ទាន់​ស្គាល់​ជាមួយ​មុខងារ Samsung Pay ឬ Secure Folder នៅ​ឡើយ។ មាន​ន័យ​ថា មុខងារ​នេះ​អាច​ប្រើ​បាន​ត្រឹម​តែ​ដោះ​សារ​ទូរស័ព្ទ​ប៉ុណ្ណោះ មិន​អាច​ប្រើ​ជាមួយ​មុខងារ​បង់ប្រាក់​តាម​ទូរស័ព្ទ​ចល័ត ឬ​ភ្ជាប់​ចូល​មុខងារ​សុវត្ថិភាព​ថត​ឯកសារ (secure folder) ​នោះ​ឡើយ៕ ប្រែ​សម្រួល៖ រឹទ្ធិរាជ ប្រភព៖ Ars Technica