កំពូលអ្នកមានចិន លោក ជេក ម៉ា៖ អ្នកដឹកនាំដ៏អស្ចារ្យ មានចំណុចពិសេស ៣យ៉ាង ដែលបុគ្គលិកគ្មាន
លោក ចេក ម៉ា គឺជាមហាសេដ្ឋីចិន និង ជាស្ថាបនិករបស់ក្រុមហ៊ុនAlibabaដែលជាក្រុមហ៊ុនទីផ្សារអនឡាញយក្សក្នុងតំបន់អាស៊ី។ មិនថា ក្រុមហ៊ុនឬ ស្ថាប័នណានោះទេ គឺពិតជាត្រូវការអ្នកដឹកនាំដែលពូកែ និង ឆ្លាតវៃជាងបុគ្គលថ្នាក់ ទើបធ្វើឲ្យប្រតិបត្តិការអង្គភាពទាំងមូល ដំណើរការទៅដោយរលូន និង ឆ្ពោះទៅរកការរីកចម្រើន ហើយបើតាមលោកចេក ម៉ា មេដឹកនាំដែលពូកែត្រូវតែងមានចំណុចពិសេស៣យ៉ាង។
ចំណុចពិសេសទី១ ដែលមេដឹកនាំពូកែមាននោះ គឺចក្ខុវិស័យវែងឆ្ងាយ ដែលបុគ្គលិកធម្មតាមិនអាចធ្វើបាន។ ចក្ខុវិស័យវែងឆ្ងាយនេះគឺពិតជាសំខាន់ខ្លាំងណាស់ ដើម្បីអាចប្រមើលឃើញពីរឿងរ៉ាវនៅពេលខាងក្រោម និង ដើម្បីត្រៀមខ្លួនរៀបចំយុទ្ធសាស្ត្រ និង ផែនការឲ្យបានល្អ សម្រាប់ទប់ទល់ជាមួយបញ្ហា និង ទាញយកប្រយោជន៍សម្រាប់អង្គភាពទាំងមូល។
ចំណុចពិសេសទី២ គឺ ភាពតស៊ូជាមួយនឹងបញ្ហាដែលកំពុងកើតឡើង និង បម្រុងនឹងកើតឡើង ដោយមិនងាយនឹងបោះបង់។ ចំណុចនេះគឺពិតជាសំខាន់ព្រោះថា ក្នុងនាមជាអ្នកដឹកនាំ ម្នាក់ដែលគ្មានការតស៊ូ ហើយឆាប់បោះបង់ងាយៗនោះ តើបុគ្គលិកថ្នាក់ក្រោមមានអារម្មណ៍យ៉ាងណា ហើយពួកគេគួរពឹងលើអ្នកណាបានទៀត។ ត្រង់ចំណុចនេះ បើបុគ្គលិកសម្រេចចិត្តបោះបង់ គឺឱកាសជោគជ័យនៅតែមានសង្ឃឹម តែបើអ្នកដឹកនាំបោះបង់ហើយ នោះអ្វីៗទាំងមូលគឺប្រាកដជាចប់។
ចំណុចទី៣ ត្រូវចេះទទួលស្គាល់ការបរាជ័យរបស់ខ្លួន។ គ្មាននរណាម្នាក់ដែលមិនធ្លាប់បរាជ័យនោះទេប៉ុន្តែអ្វីដែលសំខាន់នោះ គឺត្រូវទទួលស្គាល់ថា ខ្លួនពិតជាបរាជ័យមែន ព្រោះការទទួលបែបនេះ នឹងជួយឲ្យអ្នកអាចបញ្ចៀសការបរាជ័យទៅថ្ងៃក្រោយ ហើយអាចស្វែងរកវិធីសាស្ត្រថ្មី ដើម្បីកែប្រែស្ថានការណ៍ឲ្យប្រសើរជាងមុន។ ប៉ុន្តែបើមិនទទួលថា ខ្លួនបរាជ័យទេនោះកុំសង្ឃឹមថា អាចរត់ផុតពីភាពបរាជ័យបានឲ្យសោះ៕
ដោយ៖ រតនា វិចិត្រ
