Galaxy S8 និង S8 Plus មកដល់ពេលនេះ នៅតែបន្តលេចធ្លាយរូបរាងហូរហែឥតដាច់ ដោយថ្មីៗនេះ ទើបត្រូវទម្លាយចេញនៅលើគេហទំព័រ phonearena ចំនួន ៤សន្លឹកទៀតហើយ។ សង្កេតឃើញ រូបថតជាច្រើនសន្លឹកមកហើយ ដែលសុទ្ធតែមានរូបរាងដូចគ្នានឹងរូបថតចុងក្រោយនេះ។ នេះកាន់តែធ្វើឱ្យសាធារណជន រឹតតែជឿជាក់ថា Galaxy S8 នឹងមានរចនាបថបែបនេះមិនខាន។
៤សន្លឹកដែលទើបបែកធ្លាយនេះ គឺសុទ្ធតែត្រូវបានថតចំផ្នែកមុខទូរស័ព្ទ និងដែលគេសង្កេតឃើញមាន ៣ពណ៌ គឺពណ៌ស ប្រផេះ និងពណ៌ខៀវ។ កន្លងទៅ ក៏ធ្លាប់មានលេចរូប Poster ស្ដីពីព្រឹត្តិការណ៍ប្រកាស Galaxy S8 អមជាមួយចចាមអារ៉ាមថា ម៉ូដែល Galaxy S8 ភ្ជាប់ RAM 6GB នឹងមានលក់តែនៅលើទីផ្សារចិនប៉ុណ្ណោះ។
alaxy S8 ត្រូវគេរំពឹងថា នឹងបង្ហាញខ្លួនជាមួយអេក្រង់ទំហំ ៥,៨អ៊ីញ កម្រិត QHD និងម៉ូដែល ៦,២អ៊ីញកម្រិត QHD ដូចគ្នា។ កំពូលស្មាតហ្វូន Android ថ្មីនេះ ត្រូវគេរំពឹងថា នឹងប្រើបន្ទះឈីប Snapdragon s835 និងជម្រើស Exynos អមដោយ RAM ពីរជម្រើស គឺទំហំ 4GB និង 6GB។ Galaxy S8 មាន RAM 6GB ត្រូវគេរំពឹងថា នឹងមានលក់តែនៅលើទីផ្សារប្រទេសចិនប៉ុណ្ណោះ។ ក្រៅពីលក្ខណៈសម្បត្តិខាងលើ S8 ត្រូវគេរំពឹងទៀតថា នឹងបំពាក់កាមេរ៉ាក្រោយទំហំ 12MP ហើយខាងមុខទំហំ 8MP ដើរដោយប្រព័ន្ធប្រតិបត្តិការ Android Nougat ចេញពីប្រអប់ស្រាប់។
ក្រុមហ៊ុន Samsung នឹងប្រកាសចេញ Galaxy S8 ផ្លូវការនៅព្រឹត្តិការណ៍មួយក្នុងទីក្រុងញូវយ៉ក ក្នុងខែមីនានេះ នៅថ្ងៃទី២៩ ខាងមុខ។ ចចាមអារ៉ាមបានលើកឡើងថា S8 នឹងមានលក់លើទីផ្សារចាប់ពីថ្ងៃទី២៨ ខែមេសាក្រោយប្រកាសបាន ១ខែ៕
ប្រែសម្រួល៖ រឹទ្ធិរាជ
ប្រភព៖ phonearena
