ថ្មីៗនេះ Google បានដាក់ឱ្យប្រើមុខងារផ្ញើប្រាក់ (send money) ឱ្យគ្នាទៅវិញទៅមកបាន តាមកម្មវិធី gmail មាននៅលើទូរស័ព្ទ Android ផ្ទាល់។ ការដាក់ចេញមុខងារថ្មីនេះ បន្ទាប់ពីក្រុមហ៊ុនស្វែងរករុករកខ្នាតយក្សនេះ ធ្លាប់បានបញ្ចេញមុខងារ ផ្ទេរប្រាក់ដោយប្រើ Google Wallet ផ្ញើប្រាក់តាម Gmail នៅលើកុំព្យូទ័រ Desktop ប៉ុន្មានឆ្នាំនេះរួចមកហើយ ប៉ុន្តែប្រហែលមិនសូវមានអ្នកបានដឹង។
ឥឡូវនេះ អ្នកប្រើ Gmail app នៅលើស្មាតហ្វូន Android គឺអាចផ្ញើ ឬស្នើសុំប្រាក់ពីនរណាម្នាក់បាន រួមទាំងអ្នកដែលគ្មានអាសយដ្ឋាន Gmail ក៏បាន។ មុខងារថ្មីនេះ គឺមានលក្ខណៈងាយស្រួលប្រើនោះទេ ដោយគ្រាន់តែចុចលើរូបសញ្ញា attachment ហើយចុចលើ “Send money”។ នោះ Google Wallet នឹងលោតឡើង ជាមួយសំនួរថា តើអ្នកចង់ផ្ញើនូវទឹកប្រាក់ប៉ុន្មាន ហើយវានឹងធ្វើការ forward ការទូទាត់ (payment) របស់អ្នកទៅកាន់អ្នកទទួល (recipient)។
អ្នកទទួលមិនចាំបាច់មានអាសយដ្ឋាន Gmail ក៏បាន ពោលគេអាចទៅដកប្រាក់នៅធនាគារផ្ទាល់នូវចំនួនទឹកប្រាក់ដែលដៃគូផ្ញើឱ្យ ហើយអ្នកក៏អាចកំណត់ទម្រង់ការប្រើប្រាស់របៀបនេះនៅពេលក្រោយៗទៀតក៏បាន។ មុខងារផ្ញើប្រាក់ដោយការប្រើមុខងារ Wallet ជំនួយនេះ គឺវាមិនដូចសេវាកម្មប្រកួតប្រជែងដូចជា Venmo ឬ Square Cash នោះទេ អ្វីដែលដូចគ្នាគឺថា សេវាកម្មទាំងនោះ ដំណើរការបានតែសម្រាប់អ្នករស់នៅអាមេរិកប៉ុណ្ណោះ។
គេសង្កេតឃើញថា បច្ចុប្បន្នក្រុមហ៊ុនបច្ចេកវិទ្យាធំៗ ចាប់អារម្មណ៍នៅក្នុងការអភិវឌ្ឍសេវាកម្មផ្ញើសារ ដោយបន្ថែមមុខងារ ជាបទពិសោធន៍ថ្មីៗដល់អ្នកប្រើ ជាក់ស្ដែងការបន្ថែមសេវាផ្ទេរប្រាក់តាម Gmail ឬ តាម FB Messenger ដែល Facebook ទើបប្រកាសកាលពីកន្លងទៅតែម្ដង ដែលវាគាំទ្រសេវាកម្មក្រុមហ៊ុនហិរញ្ញវត្ថុដូចជា PayPal, Stripe, TransferWise និងផ្សេងទៀត។ ហើយក្រុមហ៊ុន Snapchat ក៏បានចេញមុខងារទូទាត់ថ្លៃចំណាយតាមកម្មវិធី Snapcash បានផងដែរ៕
ប្រែសម្រួល៖ រឹទ្ធិរាជ
ប្រភព៖ techspot
