ដើមចម ៩ យ៉ាង ដែលធ្វើឱ្យអ្នកមិនអាចក្លាយជាអ្នកមានបានអស់មួយជីវិត
អ្នកណាក៏ដោយក៏ចង់ក្លាយជាអ្នកមានលុយ និងទ្រព្យសម្បត្តិស្ដុកស្ដម្ភដែរ ប៉ុន្តែសំណួរសួរថា ៖«ដើម្បីក្លាយជាអ្នកមានបាន តើត្រូវដើតាមវិធីណា?»។ ខាងក្រោមនេះជាហេតុផលដែលធ្វើឱ្យមនុស្សជាច្រើនមិនអាចក្លាយជាអ្នកមានបាន។
១) ខ្លាចបរាជ័យ
អ្នកដែលក្លាយបរាជ័យច្បាស់ជាមិនហ៊ានរកស៊ីអីនោះទេ។ ដើម្បីមានទ្រព្យសម្បត្តិច្រើន ចូរអ្នកគិតថា បរាជ័យគឺជាផ្នែកមួយនៃដំណើរឆ្ពោះទៅរកជោគជ័យ។ តាមរយៈបរាជ័យនេះហើយដែលធ្វើឱ្យមនុស្ស និងមហាសេដ្ឋីជាច្រើននាក់មានថ្ងៃនេះ។ ដូច្នេះត្រូវហ៊ានសាកល្បង កុំខ្លាច។
២) អ្នកគិតថា អ្នកមិនអាចជោគជ័យបានទេ
នេះគឺជាគំនិតអវិជ្ជមានមួយដែលធ្វើឱ្យអ្នកឃ្លាតកាន់តែឆ្ងាយពីពាក្យថា "អ្នកមាន" ឬ "សេដ្ឋី"។ នៅពេលដែលគិតថាអ្នកនឹងជោគជ័យកាន់តែខ្លាំង នោះអ្នកនឹងកាន់តែខិតទៅកាន់ជិតគោលដៅរបស់អ្នក។ ត្រូវមានស្រមៃខ្ពស់។ បើអ្នកមិនដឹងថាចាប់ផ្ដើមយ៉ាងម៉េចទេ សូមអានសៀវភៅ "Think and Grow Rich” របស់លោក Napoleon Hill។
៣) អ្នកសេពគប់ជាមួយមនុស្សខុស៖
សុភាសិតដ៏ពេញនិយមមួយលើកឡើងថា "ប្រាប់ខ្ញុំពីមិត្តរបស់អ្នក ខ្ញុំនឹងប្រាប់អ្នកថា អ្នកជាមនុស្សយ៉ាងម៉េច"។ សុភាសិតនេះបានបង្ហាញពីសារសំខាន់នៃសេពគប់មិត្តភក្ដិ។ សេពគប់មិត្តអ្នករកស៊ី នឹងធ្វើឱ្យមានគំនិតរកស៊ីដែរ តែបើសេពគប់ចំមនុស្សបោរឡែ នោះលោកអ្នកនឹងបោរឡែដែរជាមិនខាន។
៤) អ្នកគិតថា អ្នកគ្មានជំនាញនិងបទពិសោធន៍រកស៊ីទេ
នេះជាការដាក់កំណត់ខ្លួនឯង។ ជំនាញ និងបទពិសោធន៍មិនមែនហាមអ្នកមិនអាចរកស៊ីនោះទេ។អ្នកមិនទាន់ហួសពេលឯណា ដ៏រាបណាអ្នកនៅមានជីវិត ដូច្នេះត្រូវចេះស្រវាឱកាស និងចាប់រៀនសូត្រពីគេ។
៥) អ្នកគ្មានគោលដៅច្បាស់លាស់
ពិតណាស់ថា បើអ្នកមិនបានបង្កើត និងកំណត់គោលដៅច្បាស់លាស់នោះទេ នោះអ្នកមិនអាច ក្លាយជាអ្នកមានបានឡើយ។ បន្តិចស្រមៃចង់ធ្វើនេះ បន្តិចស្រមៃចង់ធ្វើនោះទេ ផែនការអីចេះ ផែនការអីចុះ នោះជាមូលហេតុដែលធ្វើឱ្យអ្នកមិនអាចក្លាយជាអ្នកមាន។ ត្រូវកំណត់គោលដៅមួយច្បាស់លាស់សម្រាប់ខ្លួន ហើយគោលដៅនោះមិនត្រូវរេដូចចុងស្រល់នោះទេ។
៦) អ្នកមិនសូវចេះត្រូវជ្រាវតាមអ៊ីនធឺណិត
ការប្រើប្រាស់អ៊ីនធឺណិតដូចជាបណ្ដាញសង្គមមិនមែនគ្មានប្រយោជន៍នោះទេ វានឹងផ្ដល់នូវព័ត៌មានបង្ហាញពីនិន្នាការរបស់មនុស្ស និងការផ្លាស់ប្ដូររបត់សង្គមតាមរយៈពិភពឌីជីថល។ បើលោកអ្នកមិនខ្វល់នឹងវា ឬមិនបានប្រើប្រាស់ត្រឹមត្រូវនោះទេ ច្បាស់ណាស់លោកអ្នកមិនដឹងថា ពិភពលោកដើរដល់ណាហើយ? អ្នកមានគេរកស៊ីយ៉ាងម៉េចខ្លះ? គេចែករំលែកគំនិតអ្វីខ្លះ? សូមប្រើវាឱ្យមានប្រយោជន៍។
៧) លេងល្បែង
មិនត្រឹមតែមិនអាចក្លាយជាអ្នកមានប៉ុណ្ណោះទេ ប៉ុន្តែលោកអ្នកនឹងអស់ពីខ្លួនថែមទៀតផងប្រសិនបើលោកអ្នកជ្រើសរើសយកវិធីលេងល្បែងដើម្បីក្លាយជាអ្នកមាន។ ចូរអ្នកលេងល្បែងអាជីវកម្ម កុំលេងល្បែងស៊ីសង។
៨) គ្មានអ្នកបង្ហាញផ្លូវ៖
ដើម្បីក្លាយជាអ្នករកស៊ី លោកអ្នកក៏ត្រូវការអ្នកបង្ហាញផ្លូវដែរ។ ពេលខ្លះមនុស្សមិនមែននៅសុខៗ ចេះធ្វើអ្វីដែលត្រូវនោះទេ។ ជាយោបល់លោកអ្នកគួររាប់អាននិងស្វែងរកអ្នកដែលបង្ហាញផ្លូវពីការរកស៊ីដល់អ្នក។
៩) កុំមើលឃើញលុយជារឿងអាក្រក់៖
មានមនុស្សមួយចំនួនយល់ឃើញថា លុយជាប្រភពនៃអំពើអាក្រក់។ នេះជាការយល់ខុស។ យើងពីនិយាយពីការរកស៊ី និងនិយាយពីការរកស៊ីដោយសុច្ចរិត ហើយកុំគិតឱ្យសោះថាលុយជាប្រភពនៃអំពើអាក្រក់គ្រប់យ៉ាង។ ត្រូវគិតថា បើអ្នកអត់លុយ ជីវិតរបស់អ្នក ឬក្រុមគ្រួសាររបស់អ្នកលំបាកយ៉ាងណា?
