មេរៀន៤យ៉ាង មិនត្រឹមតែអាចសង្គ្រោះជំនួញរបស់អ្នកនោះទេ ថែមទាំងនាំភាពជោគជ័យដល់អ្នកទៀតផង
ទោះបីជាធ្វើការបានប្រាក់ខែខ្ពស់ឬមានឋានៈខ្ពស់យ៉ាងណា សម្រាប់មនុស្សមួយចំនួននៅតែមានបំណងប្រាថ្នាបើកជំនួញផ្ទាល់ខ្លួនមួយ។ តែ ការចាប់ផ្តើមជំនួញមិនមែនជារឿងងាយស្រួលនោះទេ។ អត្ថបទថ្ងៃនេះនឹងនាំយកគំនិតដែលអាចជួយអ្នកជោគជ័យក្នុងជំនួញបាន៖
១) ស្មោះត្រង់នឹងខ្លួនឯង៖ ការទទួលស្គាល់ថាអ្វីដែលអ្នកធ្វើមិនជោគជ័យពិតជារឿងពិបាកក្នុងការទទួលយក។ អ្នកប្រហែលជាគិតថាការទទួលស្គាល់វាគឺជារឿងបរាជ័យ។ ប៉ុន្តែ ប្រសិនជាអ្នកនៅតែមិនទទួលស្គាល់ហើយបន្តធ្វើសកម្មភាពដដែលៗ លទ្ធផលក៏នៅតែដដែលដូចគ្នាហើយអាចនាំអ្នកខាតបង់កាន់តែច្រើន។
២) រកជំនួយ៖ ការជ្រើសរើសមនុស្សត្រឹមត្រូវ ឱ្យមកជួយអ្នក គឺជារឿងសំខាន់ក្នុងមុខជំនួញ។ យើងទាំងអស់គ្នាសុទ្ធតែចង់បានមនុស្សម្នាក់ដែលមានបទពិសោធន៍ច្រើននិងហ៊ានប្រាប់ការពិតដល់អ្នកលើគ្រប់បញ្ហា។ អ្នកក៏អាចរកគ្រូបង្ហាត់បង្រៀន (Coach) សម្រាប់ការណែនាំបានផងដែរ។
៣) រំលឹកខ្លួនឯងហេតុអ្វីបានជាអ្នកចាប់ផ្តើមវា?៖ នេះជាចំណុចសំខាន់មួយជាពិសេសសម្រាប់អ្នកជំនួញ។ ពេលខ្លះ យើងងាយនឹងភ្លេចនូវហេតុផលដែលយើងចាប់ផ្តើមជំនួញនេះឡើង។ ប៉ុន្តែ អ្នកត្រូវរំលឹកខ្លួនឯងថា «ហេតុអ្វីបានជាអ្នកចាប់ផ្ដើមវាឡើង?» វានឹងជួយអ្នកឲ្យមានកម្លាំងចិត្តឡើងវិញ។
៤) ធ្វើឱ្យអស់ពីលទ្ធភាព៖ ក្រោយពីដឹងនូវ«ហេតុអ្វី»ហើយ អ្នកត្រូវដាក់កម្លាំងចិត្តនិងប្ដេជ្ញាចិត្តក្នុងជំនួញរបស់អ្នក។ មិនថាកិច្ចការធំឬតូច អ្នកត្រូវធ្វើឲ្យអស់ពីសមត្ថភាព។ មុននិងក្រោយ អ្នកគង់តែជោគជ័យនោះទេ ៕
ប្រែសម្រួល៖ អុឹង មុយយូ ប្រភព៖ www.addicted2success.com
