អ្នកប្រាជ្ញចិន ខុង ជឺ៖ «គោរពខ្លួនឯងសិន ទើបអ្នកដទៃគោរពអ្នក»
«គោរពខ្លួនឯងសិន ទើបអ្នកដទៃគោរពអ្នក»។ នេះជាគតិរបស់លោក ខុង ជឺ ដែលជាអ្នកប្រាជ្ញជំនាន់ដើមរបស់ចិន។ ក្នុងន័យនេះ លោកចង់ឲ្យមនុស្សទូទៅ ព្យាយាមផ្ដល់តម្លៃ និង ការគោរពចំពោះខ្លួនឯង មុនពេលព្យាយាមចង់ឲ្យគេគោរព និង ផ្ដល់តម្លៃខ្លួន។
ជាធម្មតាទេ ដែលអ្នកដទៃមិនសូវយកចិត្តទុកដាក់ គោរព ឬ ផ្ដល់តម្លៃដល់អ្នក ប៉ុន្តែអ្វីដែលសំខាន់នោះ ថាតើអ្នកបានគោរពខ្លួនឯងឬនៅ? គោរពខ្លួនឯងក្នុងន័យនេះ មានន័យថា ត្រូវពង្រឹងខ្លួនឯង និង ច្នៃខ្លួនឯងឲ្យទៅជាមនុស្សមានតម្លៃ និង មានប្រយោជន៍ មិនមែនជាមនុស្សចោលម្សៀតនោះទេ។
អ្នកខ្លះតែង និយាយថាមានមនុស្សជាច្រើនមិនគោរពខ្លួន និង មិនផ្ដល់តម្លៃឲ្យខ្លួន ប៉ុន្តែខ្លួនឯងផ្ទាល់មិនដែលផ្ដល់តម្លៃដល់ខ្លួនឯងនោះទេ អ៊ីចឹងហើយ តើនរណាអាចគោរពអ្នកកើត។
ដូច្នេះហើយ ត្រូវព្យាយាមច្នៃខ្លួនឯងឲ្យទៅជាមនុស្សមានតម្លៃ ហើយបើទោះបីជាមិនទាន់មាននរណាទទួលស្គាល់អ្នកក៏ដោយ គឺត្រូវព្យាយាមធ្វើឲ្យខ្លួនឯងជោគជ័យ ៕
ដោយ៖ រតនា វិចិត្រ
