លក្ខណៈពិសេស៤យ៉ាងរបស់មហាយក្សចិន ដែលអ្នកគួរដឹង!
ក្រៅពីមានឫទ្ធានុភាពដ៏ខ្លាំងក្លានៃសេដ្ឋកិច្ចនៅលើឆាកអន្តរជាតិ ថាតើប្រទេសចិនដែលមានវប្បធម៌ដ៏មានឥទ្ធិពលរហូតរីកសាយភាយមកលើវប្បធម៌របស់ខ្មែរយើងរាប់ទសវត្សកន្លងមកនេះ មានភាពលេចធ្លោជាងគេលើផ្នែកណាទៀត ដែលភាពអស្ចារ្យទាំងនោះរួមគ្នាលើកមុខមាត់មហាអំណាចរបស់ពិភពលោកមួយនេះ ឲ្យមានឈ្មោះល្បីល្បាញជុំវិញសកលលោក ?
១) ការប្រកាន់យកគំនិតសមស្របតាមសភាពជាក់ស្ដែងជាជាងភាពអណ្ដែតអណ្ដូងទៅលើទ្រឹស្ដី៖ តើចំណុចអ្វីខ្លះរបស់ប្រទេសចិន ដែលអះអាងថាម្ចាស់នៃទឹកដីដ៏ធំមួយនេះ តែងប្រកាន់យកនូវគោលគំនិតសាមញ្ញស្របតាមសភាពជាក់ស្ដែងនោះ ? អ្នកកសាងចិនសម័យទំនើប លោក តេង សៀវភីង បាននិយាយថា "វាមិនសំខាន់នោះឡើយថាតើវាជាឆ្មាពណ៌សឬពណ៌ខ្មៅ ឲ្យតែវាអាចចាប់កណ្ដុរបាន"។
ចាប់តាំងពីរបបដឹកនាំផ្ដាច់ការកុំមុយនិសរបស់ម៉ៅ សេទុងបានដួលរលំទៅ ដែលលោកបានបិទច្រកសេដ្ឋកិច្ចជាមួយប្រទេសខាងក្រៅធ្វើឲ្យសេដ្ឋកិច្ចរងនូវភាពលំបាកវេទនាជាខ្លាំងនោះ ក្នុងឆ្នាំ១៩៧៨ លោកតេង សៀវភីងបានចូលកាន់តំណែងបន្ត និងបានដើរផ្លូវផ្ទុយពីផ្លូវបរាជ័យរបស់ម៉ៅ សេទុង ដោយបើកចំហសេដ្ឋកិច្ចទីផ្សារសេរីជាមួយបរទេស ធ្វើឲ្យសេដ្ឋកិច្ចរបស់មហាអំណាចមួយនេះទទួលបានផល៤ដងលើសពីមុន ត្រឹមឆ្នាំ២០០០ប៉ុណ្ណោះ។
២) ភាពរហ័សរហួនក្នុងការសាងសង់៖ តម្រូវការសំណង់អាគារសម្រាប់ជាទីកន្លែងស្នាក់នៅបានកើនឡើងជាលំដាប់ ដែលជាលទ្ធផលមកពីសម្ទុះរីកចម្រើននៃសេដ្ឋកិច្ចបង្កជាកំណើនពួកវណ្ណៈកណ្ដាល ឬអ្នកមានជីវភាពមធ្យម រួមផ្សំនឹងកំណើននៃការធ្វើដំណើរកម្សាន្តក្នុងស្រុក ធ្វើឲ្យចិនបានភ្ញាក់ផ្អើលពិភពលោកជាមួយនឹងសំណង់សាងសង់ដែលចំណាយពេលដ៏ខ្លីរបស់ខ្លួន។
សណ្ឋាគារ៣០ជាន់មួយនៅខេត្តហ៊ូណាន ចំណាយពេលសាងសង់ត្រឹមតែ១៥ថ្ងៃប៉ុណ្ណោះ ដោយចំណាយអស់ប្រាក់ចំនួន១៧លានដុល្លារ។ ក្រុមហ៊ុនសាងសង់នេះទៀតសោត ថែមទាំងមានគោលដៅបង្រួមរយៈពេលសាងសង់ឲ្យនៅសល់ត្រឹម៨ថ្ងៃតែប៉ុណ្ណោះ។
៣) អ្នកចម្លងតាមដ៏ពូកែ៖ អ្នកអាចយកការចម្លងតាមរបស់ចិនពីផលិតផលទូរស័ព្ទ iPhone 6 Plusរបស់ក្រុមហ៊ុនបច្ចេកវិទ្យាពិភពលោកដ៏ល្បីរបស់ Apple ជាឧទាហរណ៍បញ្ជាក់បាន។ ស្របពេលដែលម៉ូដែលមួយគ្រឿងនេះ ត្រូវបានដាក់លក់ក្នុងប្រទេសចិនក្នុងតម្លៃជិត២,៤០០ដុល្លារ និង២៩៩ដុល្លារក្នុងប្រទេសកំណើតនៃម៉ាកទូរស័ព្ទនេះ ដែលសំដៅទៅលើសហរដ្ឋអាមេរិក ក្រោយពីនោះមក ម៉ូដែលចម្លងរបស់iPhone 6 Plusក៏បានលេចមុខឡើងមក ជាមួយនឹងតម្លៃត្រឹមតែចន្លោះពី២ដុល្លារដល់៧៥ដុល្លារប៉ុណ្ណោះ ដែលបានដាក់លក់នៅលើហាងទំនិញអនឡាញ Taobaoរបស់ប្រទេសចិន។
៤) ផ្ទាំងគំនូរសិល្បៈអក្សរផ្ចង់ (Calligraphy)៖ អក្សរផ្ចង់គឺជាសិល្បៈដែលមានទំនៀមទម្លាប់យ៉ាងចំណាស់តាំងពីរាប់ពាន់ឆ្នាំមកហើយរបស់ជនជាតិចិន និងជាសិល្បៈមួយនៃការហ្វឹកហាត់ស្មិងស្មាធិ៍អារម្មណ៍ ព្រមទាំងត្រូវបានសរសេរដោយអ្នកជំនាញខ្ពស់ក្នុងផ្នែកនេះ។ វាត្រូវបានគេឲ្យតម្លៃរហូតដល់ឥឡូវនេះបានក្លាយជាការវិនិយោគទុនប្រាក់រាប់លានដុល្លារឯណោះ។
គំនូរអក្សរផ្ចង់មួយត្រូវបានដាក់តាំងលក់នៅកន្លែងដេញថ្លៃរបស់ Sotheby ក្នុងទីក្រុងញូយ៉ក កាលពីឆ្នាំ២០១៣ ជាមួយនឹងតម្លៃ៨.២លានដុល្លារ ដែលសរសេរថា "Gong Fu Tie" ដែលមានត្រឹមតែ៩តួអក្សរចិនតែប៉ុណ្ណោះ៕
ប្រែសម្រួល៖ ស្រីពៅ
ប្រភព៖ www.edition.cnn.com & www.cia.gov
