សុភាសិតរុស្ស៊ី៖ «បើសរសើរ ត្រូវសរសើរឲ្យឮៗ តែបើបន្ទោស ត្រូវបន្ទោសស្ងាត់ៗ »
«បើសរសើរ ត្រូវសរសើរឲ្យឮៗ តែបើបន្ទោស ត្រូវបន្ទោសស្ងាត់ៗ »។ នេះជាសុភាសិតរបស់រុស្ស៊ី ដែលក្នុងន័យនេះចង់បង្រៀន និង ដាស់តឿនពីវិធីក្នុងការសរសើរ និង បន្ទោសមនុស្សឲ្យមានប្រសិទ្ធភាព។
ជាធម្មតាទេ មនុស្សណាក៏ធ្លាប់ខុសដែរ គ្រាន់តែតិចឬច្រើន អចេតនា ឬដោយចេតនា។ ប៉ុន្តែអ្វីដែលសំខាន់នោះ ជាពិសេសក្នុងនាមជាថ្នាក់លើគេ នៅពេលឃើញនរណាម្នាក់ធ្វើខុស គឺមិនត្រូវស្រែកជេរ ឬ ស្ដីបន្ទោសខ្លាំងៗនៅមុខគេឯងនោះឡើយ។ ការធ្វើបែបនេះ នឹងគ្មានលទ្ធផលល្អឡើយព្រោះ បុគ្គលដែលធ្វើខុសនោះ នឹងមានអារម្មណ៍ថា«បាក់មុខខ្លាំង» ហើយមិនត្រឹមតែមិនបើកចិត្តក្នុងការកែប្រែនោះទេ ហើយថែមទាំងស្អប់អ្នកខ្លាំងទៀត។ បន្ទោសបែបនេះ គេហៅថា មនុស្ស«គ្មានសិល្បៈក្នុងការបន្ទោស»។ វិធីដ៏ល្អនោះ គឺហៅម្នាក់ដែលធ្វើខុសនោះ មកនិយាយទល់មុខគ្នាក្នុងបន្ទប់ ដោយប្រាប់ពីចំណុចដែលបានធ្វើខុស ហើយក៏ត្រូវស្ដាប់ការបកស្រាយរបស់គេផងដែរ។ មិនត្រឹមតែប៉ុណ្ណោះ អ្នកក៏ត្រូវលើកទឹកចិត្តឲ្យបុគ្គលដែលធ្វើខុសនោះ ឲ្យខិតខំបំពេញការងារឡើងវិញ។ ផ្ទុយទៅវិញ បើនរណាម្នាក់សាងគុណសម្បត្តិ អ្នកមិនត្រូវប្រកើយកន្តើយក្នុងការសរសើរ ឬ ផ្ដល់រង្វាន់នោះ ព្រោះការធ្វើបែបនេះ ជួយឲ្យអ្នកដែលខិតខំបំពេញការងារយ៉ាងល្អនោះ មានកម្លាំងចិត្តធ្វើការងារកាន់តែខ្លាំង ហើយគិតថា ការខិតខំរបស់គេគឺពិតជាមានតម្លៃ៕
ដោយ៖ រតនា វិចិត្រ
