អ្នកជំនួញអាមេរិក លោកRamit Sethi ៖ បើចង់ក្លាយជាសេដ្ឋី កុំភ្លេចចាំសារដ៏សំខាន់ពីរយ៉ាងនេះនៅវ័យខ្ទង់ ២០ឆ្នាំ
លោក Ramit Sethi ជាអ្នកនិពន្ធ និងជាសេដ្ឋីជនជាតិអាមេរិក និយាយថា ចង់ក្លាយក្លាយជាសេដ្ឋីនោះ ត្រូវចាំសារដ៏សំខាន់ពីរយ៉ាង គឺទី១ អ្នកអាចធ្វើបាន និងទី២ កាលណាអ្នកផ្លាស់ប្ដូរទម្លាប់គ្រប់គ្រងហិរញ្ញវត្ថុរបស់អ្នក នោះឱកាសនឹងមានកាន់តែច្រើន។
«ខ្ញុំសង្ឃឹមថា មនុស្សដែលមានវ័យ២២ឆ្នាំទាំងអស់ដឹងថា ពួកគេអាចរស់នៅក្នុងជីវិតជាអ្នកមានបាន។ អ្នកអាចក្លាយជាសេដ្ឋី គឺគ្មានបញ្ហានោះទេ។ ប៉ុន្តែអ្នកត្រូវតែអនុវត្តឲ្យបានកាន់តែចាប់កាន់តែល្អ»។
នេះបើតាមការបញ្ជាក់របស់សេដ្ឋីខាងលើ ដែលជាអ្នកនិពន្ធសៀវភៅ «I Will Teach You to be Rich» ដែលជាភាសាខ្មែរមានន័យថា «ខ្ញុំនឹងបង្រៀនអ្នកឲ្យក្លាយជាអ្នកមាន»។ ចំណុចសំខាន់បំផុតដំបូង គឺត្រូវគិតថា ខ្លួនឯងអាចធ្វើបាន ព្រោះបើគិតថា ខ្លួនឯងមិនអាចធ្វើបាន ឬ មិនអាចក្លាយជាអ្នកមានទេ នោះវាមានន័យស្មើនឹងបោះបង់ទៅហើយ។
បន្ទាប់ពីគិតថា ខ្លួនឯងអាចធ្វើបានហើយ គឺត្រូវមានទម្លាប់ក្នុងការគ្រប់គ្រងហិរញ្ញវត្ថុឲ្យបានល្អទៀត។ ក្នុងពេលឆ្លើយប្រាប់ទៅកាន់សារព័ត៌មាន CNBC អ្នកនិពន្ធ និងជាស្ថាបនិកក្រុមហ៊ុន GrowthLab.com ខាងលើ បានអះអាងថា ការផ្លាស់ប្ដូរទម្លាប់ ក្នុងការគ្រប់គ្រងហិរញ្ញវត្ថុ គឺមានជាមានសារសំខាន់ខ្លាំងណាស់ ព្រោះបើមានទម្លាប់ចាយវាយខ្ជះខ្ជាយនោះ មានប៉ុន្មានក៏មិនសល់។
ប៉ុន្តែបើមានទម្លាប់ល្អវិញ នោះលុយដែលអ្នកមានក្នុងដៃ នឹងកើតជាកូនពូនជាចៅមិនខាន៕
ដោយ៖ រតនា វិចិត្រ
